Kun Mayo sa Harong an mga Tawo
1. Ano an lakop na kadepisilan kun nakikikabtang sa ministeryo sa harong-harong?
1 Sa dakol na lugar paorog nang paorog na nagigin depisil na manompongan an mga tawo sa harong. Sa “delikadong mga panahon” na ini, dakol an napipiritan na magtrabaho nin dakol na oras tangani sanang makua an pundamental na mga pangangaipo. (2 Tim. 3:1) An nagkapira puedeng mayo sa harong huling namamakal o nag-aaling-aling. Paano daw niato mapapaabotan kan maogmang bareta an siring na mga tawo?
2. Paano niato masesegurado na maaasikaso an mga harong na mayo nin tawo kan nakaagi?
2 Magkaigwa nin Marahay na mga Rekord: An enot na paagi iyo na isurat an mga harong na mayo nin tawo. Itinao an House-to-House Record (S-8) para sa katuyohan na iyan. Nangorognang importante ini kun parate nindong nahuhulitan an saindong teritoryo. Isinusurat daw nindo an ngaran kan kalye, ngaran nindo, asin an petsa? Puede kamong magwalat nin espasyo para sa dagdag na mga nota kun dadalawon liwat o huhulitan nindo o nin ibang parahayag an mga harong na mayo nin tawo kan nakaagi. Sa katapusan kan peryodo nin paghuhulit, girumdomon na itao an rekord sa saro na nagkakapot kan kard kan teritoryo, apuera sana kun umoyon sia na kamo an maghulit sa mga harong na mayo nin tawo kan nakaagi. Gumamit nin suhay na papel sa pagrekord nin siisay man na interesado na nanompongan na dadalawon liwat nindo.
3. Ano an nagkapirang suhestion sa paghihingoang makaolay an mga tawo na mayo sa harong kan nakaagi?
3 Probaran sa Ibang Panahon: Tibaad an nagkapira na mayo sa harong sa aldaw nin trabaho puedeng nasa harong kun banggi o sa katapusan kan semana. Puede daw nindong iareglo an saindong iskedyul na dumalaw liwat sa mas angay na panahon? (1 Cor. 10:24) Kun dai, puede nindong itao an lista nin mga harong na mayo nin tawo kan nakaagi sa sarong parahayag na makakadalaw liwat sa ibang panahon. Kun dai man, puede nindong suratan an mga harong na mayo nin tawo kan nakaagi o pagmaigotan na makaolay sinda paagi sa telepono. An mga parahayag na huli sa saindang mga problema sa salud nalilimitaran an saindang pakikikabtang sa pagharongharong maoogmang tabangan kamo sa bagay na ini.
4. Ano an nagpapaheling kan importansia nin pagdalaw liwat sa mga harong na mayo nin tawo kan nakaagi?
4 An sarong kamugtakan nagpapaheling kan importansia nin pagmamaigot na makaolay an mga tawo na mayo sa harong kan nakaagi. Pakatapos na an mga parahayag paorootrong magdalaw liwat sa sarong harong sa laog nin tolong taon, sa katapustapusi nakaolay an kagharong. Haloy na palan siang nagpaparahalat na umabot an sarong Saksi tanganing ikapagpadagos nia an saiyang dating pag-adal sa Biblia bago buminalyo sa lugar na iyan.
5. Noarin masasabing tapos na an sarong teritoryo?
5 Taposon an Teritoryo: Noarin masasabing tapos na an sarong teritoryo? Sa pangkagabsan, ini sa panahon na nagibo na an rasonableng mga paghihingoa na may makaolay sa kada harong. Tibaad angay na magwalat sa mga harong na mayo nin tawo nin sarong pulyeto o haloy nang magasin na dai naheheling kan mga nag-aagi, nangorogna sa mga teritoryo na bihirang nahuhulitan. Maninigong matapos an teritoryo sa laog nin apat na bulan. Dangan maninigo na isurat kan lingkod na nag-aasikaso kan teritoryo an bagong petsa sa saiyang mga rekord.
6. Taano ta maninigo niatong pagmaigotan na mapaabotan kan maogmang bareta an gabos na nasa teritoryo niato?
6 Boot niato na an pinakadakol na tawong mapupuede magkaigwa nin oportunidad na makanood na mag-apod sa ngaran ni Jehova asin maligtas. (Roma 10:13, 14) Kaiba digdi an mga mayo sa saindang harong kun kita naghaharongharong. Siring ki apostol Pablo, gibohon nindong kamawotan na “lubos na magpatotoo sa maogmang bareta manongod sa dai na kutana maninigong kabootan nin Dios.”—Gibo 20:24.