Igwa daw Kamo nin Personal na Teritoryo?

1. Ano an personal na teritoryo?

¹ An personal na teritoryo saro na iinasignar sa saindo. Tibaad kombenyenteng lugar iyan kaya pasil sana nindong madumanan iyan asin makapaghulit kamo magsalang nin solo o kaiba nin saro pang parahayag. Minsan ngani kapakipakinabang na suportaran an mga areglo kan kongregasyon sa paghuhulit bilang grupo kun posible, an pagkaigwa nin personal na teritoryo na mahuhulitan sa ibang panahon makakatabang sa pagtao nin lubos na patotoo, nangorogna sa mga kongregasyon na igwa nin dakulang teritoryo.—Gibo 10:42.

2. Ano an nagkapirang pakinabang sa pagkaigwa nin personal na teritoryo?

² Mga Pakinabang: Nanompongan nin nagkapira an dagdag na pakinabang sa paghuhulit sa personal na teritoryo na harani sa saindang pinagtatrabawohan durante kan saindang pahingalo sa udto o tolos-tolos pagkatapos nin trabaho. An iba ikinaogma an iribanan na paghuhulit bilang pamilya sa saindang pagtaraed sa laog nin sarong oras o labi pa bago an Pag-adal sa Libro kan Kongregasyon. Bilang resulta, harani sana an naeestablisar na mga pagdalaw liwat asin pag-adal sa Biblia, na an bunga nakakaekonomiya sa kosog, panahon, asin gastos. Huling dakol an magigibo sa dikit na panahon, an pagkaigwa nin personal na teritoryo puedeng makatabang sa nagkapira na mag-auxiliary payunir sa panapanahon o magpalista pa ngani bilang regular payunir. Dugang pa, an paghuhulit sa personal na teritoryo asin pagigin pamilyar sa mga kagharong makakatabang sa sato na makua an saindang pagtitiwala asin ibagay an satong presentasyon sa saindang mga kapurisawan, na ginigibong mas epektibo an satong ministeryo.

3. Ano an eksperyensia nin sarong payunir na babae na nagkaigwa nin personal na teritoryo?

³ An sarong payunir na babae na naparigon kan paraataman sa sirkito na magkaigwa nin personal na teritoryo nag-estorya: “Inako ko an sadol na ini asin dai nahaloy ako nagin pamilyar na marhay asin makikatood sa mga kagharong sa sakong teritoryo. Ibinagay ko an mga oras kan sakong pagdalaw oyon sa saindang pagigin kombenyente. Bilang resulta, an sakong mga pagdalaw liwat luminangkaw poon 35 sagkod labing 80 kada bulan, asin igwa ako nin pitong pag-adal sa Biblia.”

4. Paano kamo magkakaigwa nin asin makakapaghulit sa sarong personal na teritoryo?

⁴ Kun Paano Iyan Gigibohon: Kun gusto nindong maghagad nin personal na teritoryo, makipag-olay sa lingkod na nag-aasikaso kan teritoryo. Dai mag-alangan na mag-imbitar nin saro pang parahayag na makakaibanan nindo, asin magkaigwa nin rekord kan mga harong na mayo nin tawo. Maninigo nindong pagmaigotan na taposon an teritoryo sa laog nin apat na bulan. Kun nadedepisilan kamong gibohon iyan, puede kamong humagad nin tabang sa saindong paraataman sa Pag-adal sa Libro kan Kongregasyon o sa iba pa. Sa katapusan kan apat na bulan, puede nindong magsalang ibalik an natapos na teritoryo o makiolay na gibohon giraray iyan. Minsan siring, dai kamo magdanay nin daing talaan sa iyo man sanang teritoryo kundi ibalik iyan tangani na puede man iyan na gibohon nin iba. Kun nasa kongregasyon kamo na limitado an teritoryo asin dai puedeng magkaigwa nin personal na teritoryo, tibaad puede nindong ipakipag-olay sa saindong paraataman sa pag-adal sa libro na itao sa saindo an sarong kabtang nin sarong teritoryo.

5. Ano an kaipuhan tanganing maotob an sugo sa sato na maghulit?

⁵ An sugo sa sato na maghulit “sa bilog na ineerokan na daga” sarong pambihirang asignasyon. (Mat. 24:14) Nagkakaipo iyan nin marahay na koordinasyon nin paghihingoa. Dugang pa sa paghuhulit bilang grupo, makakatabang sa sato an paghuhulit sa personal na teritoryo na mapaabotan kan maogmang bareta an pinakadakol na tawong mapupuede.