Makikinabang Ka daw sa Pagkaigwa nin Personal na Teritoryo?

1. Ano an personal na teritoryo?

¹ Ano an personal na teritoryo? Sadiri mo ining teritoryo, tibaad harani sa istaran mo, na puwedeng hagadon kun mahiwas an teritoryo kan kongregasyon. An librong Organisado, pahina 103, nagpapaliwanag: “An pagkaigwa nin personal na teritoryo na kombenyente an lugar makakatabang na magamit nindo nin lubos an panahon na ikakadusay nindo sa paglilingkod sa langtad. Siring man, tibaad gusto nindong mag-imbitar nin ibang parahayag na umiba saindo sa personal na teritoryo nindo.”

2. Paano magagamit an personal na teritoryo bilang dagdag sa pagpapatotoo bilang grupo?

² Dagdag sa Pagpapatotoo Bilang Grupo: Kun an saimong personal na teritoryo harani sa trabaho mo, puwede kang maghulit pag lunch break o bago magpuli, tibaad kaiba nin saro pang parahayag na harani man diyan an trabaho. Kun an teritoryo harani sa harong nindo, kombenyente iyan sa saimo saka sa pamilya mo kun magpapatotoo kamo sa banggi. Siyempre, kun mayong pagtiripon bago maglingkod sa langtad, angay na mamibi para sa paggiya ni Jehova bago ka maghulit. (Fil. 4:6) Saro pa, maninigo na balansehon mo an panahon na ginagamit mo para sa personal na teritoryo asin sa pagsuportar sa areglo kan kongregasyon na pagpapatotoo bilang grupo. Lalo na sa katapusan kan semana, na dakul an nag-aatender sa pagtiripon bago maglingkod sa langtad, pinakamarahay na suportaran an saindong grupo sa paglilingkod.

3. Ano an mga pakinabang sa pagkaigwa nin personal na teritoryo?

³ Mga Pakinabang: Kun igwa kang personal na teritoryo, may mahuhulitan ka ano man na oras na puwede sa iskedyul mo. Madadagdagan an oras mo sa paghuhulit asin mababawasan an oras sa pagbiyahe. Huli kaiyan, may mga nakakapag-auxiliary o regular payunir. Dahil harani sana an kagharong na nagpahiling nin interes, mas madaling makadalaw liwat asin magkondukta nin mga pag-adal sa Bibliya. Naeksperyensiyahan nin dakul na an paghuhulit sa personal na teritoryo nakakatabang sa sainda na magin pamilyar sa mga nakaistar diyan asin makua an tiwala ninda, lalo na kun magigibo an teritoryo nin labi sa sarong beses bago iyan ibalik tanganing magamit man kan iba. Makakatabang daw sa saimo saka sa pamilya mo an personal na teritoryo tanganing mas lubos nindong mautob an saindong ministeryo?—2 Tim. 4:5.