“Dakol Nang Beses na Nahulitan Mi an Samong Teritoryo!”
1 Inisip na daw nindo na parate nang gayo na nahuhulitan an saindong teritoryo kaya mayo na nin arog-karnerong mga tawo na natada dian? Tibaad napag-isip-isip nindo: ‘Aram ko na kun ano an magigin reaksion nin mga tawo. Taano ta magpaparabalikbalik pa sa mga bakong interesado?’ Totoo na dakol na teritoryo an parateng nahuhulitan. Minsan siring, an katunayan na ini maninigong mansayon nin positibo, bakong negatibo. Taano man? Mangnoha an apat na rason na itinao sa ibaba.
2 Sinimbag an mga Pamibi Niato: Nagsabi si Jesus: “Totoong gayo na kadakol kan anihon, alagad ta kakadikit kan paraani. Kun siring makimaherak kamo sa Kagurangnan kan anihon na magsobol nin mga paraani sa saiyang anihon.” (Luc. 10:2) Sa dakol na dekada nagngayongayo kita ki Jehova para sa orog pang tabang. Sa dakol na lugar, igwa na kita ngonyan kan dagdag na mga trabahador na kaipuhan, asin mas parate ta nang nagigibo an teritoryo. Bako daw na maninigo niatong ipaggayagaya an katunayan na sinimbag ni Jehova an mga pamibi niato?
3 An Pagkadesidido May Marahay na Ibinubunga: Dawa sa mga teritoryong parateng nahuhulitan, naghihimate an mga tawo sa mensahe kan Kahadean asin sinda nakaaaram kan katotoohan. Kun siring, maninigo kitang magsongko nin paorootro sa paglaom na makakua nin dakol pang sadiosan an puso. (Isa. 6:8-11) Siring kan ginibo kan enot na mga disipulo ni Jesus, “padagos kamong magduman” sa mga tawo sa teritoryong asignado sa saindo, na naghihingoang pukawon an interes ninda sa Kahadean nin Dios.—Mat. 10:6, 7.
4 Sa Portugal dakol na kongregasyon an ginigibo an teritoryo ninda serosemana, alagad nakakukua pa man giraray sinda nin mga arog-karnero. Sarong tugang na babae an partikularmenteng igwa nin positibong marhay na aktitud. Sabi nia: “Bago humale para sa paglilingkod kada aga, namimibi ako ki Jehova na logod tabangan akong makanompong nin interesado sa pag-adal sa Biblia.” Sarong aldaw iinareglo nia an sarong pakipag-adal sa mga nagtatrabaho sa sarong parlor sa buhok. Pero, sa huri saro sanang tawo an nag-abot para sa pag-adal. Nagsabi an tawong iyan: “An iba bakong interesado, alagad ako iyo.” Dai pang sarong bulan sia namamayo na nin duwang sadiri niang pag-adal sa Biblia. Dai nahaloy pakatapos kaiyan sia nabautismohan, asin sa huri sia naglaog sa paglilingkod bilang payunir!
5 Matatapos Na an Gibohon: Ihinuhulit an maogmang bareta, siring kan ihinula ni Jesus na mangyayari. (Mat. 24:14) Maski sa mga lugar na an mga tawo habong “maghinanyog sa [sato],” sinda pinaiisi paagi sa paghuhulit. Inaasahan niato na an nagkapira dai maghihimate o makontra pa ngani sa katotoohan. Pero, an mga siring dapat na patanidan manongod sa nagdadangadang na paghokom hale ki Jehova.—Ezeq. 2:4, 5; 3:7, 8, 19.
6 Dai Pa Kita Tapos: Bako kita an madesisyon kun noarin ipopondo an paghuhulit. Aram ni Jehova nin eksakto kun noarin iyan maninigong matapos. Aram nia kun baga igwa nin mga tawo sa satong teritoryo na tibaad maghimate pa sa maogmang bareta. Ngonyan, may mga tawong nagsasabi na bako sindang interesado, alagad an grabeng mga pagbabago sa saindang buhay—an pagkawara nin trabaho, grabeng helang, pagkagadan nin sarong namomotan—tibaad magpangyari sa sainda na magin mas andam nang maghimate sa ibang panahon. Huli sa prehuwisyo o huli sana sa pagigin sibot-sibot na mayo nang panahon maghinanyog, dakol na tawo an dai pa talaga noarin man nakadangog kan ihinuhulit niato. An paorootrong makikatood na mga pagsongko tibaad magpangyari sa sainda na magmangno asin maghinanyog.
7 An mga nagdakula na sa nakaagi pa sanang mga taon asin ngonyan igwa na nin sadiri nindang pamilya mas sineseryoso na an buhay patin nagpapalataw nin mga hapot na solamente an Tataramon nin Dios an makasisimbag. An duwang Saksi pinadagos nin sarong hoben pang ina sa saiyang harong asin nagsabi: “Kan ako aki pa, dai ko masabotan kun taano an sakong ina ta sinasayumahan an mga Saksi asin sinasabihan sinda na bako siang interesado, mantang an gusto man sana ninda makipag-olay manongod sa Biblia. Nagdesisyon ako kaidto na pagdakula ko, pakapag-agom, asin magkaigwa nin sadiri kong harong, padadagoson ko an mga Saksi ni Jehova asin hahagadon ko sainda na ipaliwanag sa sako an Biblia.” Iyan an ginibo nia, na ikinaogmang marhay kan mga Saksi na nagsongko sa saiya.
8 Puede daw Kamong Magin Orog na Epektibo? Tibaad bako man pirme an mga tawong sinosongko niato an garo baga nagpapadepisil na hulitan nin parate an teritoryo. Kun beses kita mismo. Kita daw minapoon na may negatibong mga ideya? Iyan puedeng makaapektar sa satong aktitud asin posibleng marhay sa satong tono nin boses asin panlauog. Magpaheling nin positibong espiritu asin maogmang lalauogon. Probaran an sarong bagong paagi. Liwatliwaton an pag-atubang nindo, asin pagmaigotan na mapaoswag iyan. Tibaad puede nindong liwaton an pambukas na hapot nindo o gumamit nin ibang teksto sa pakikipag-olay. Hapoton an ibang mga tugang na lalaki asin babae kun ano an nadiskobre ninda na mapanggana sa paghuhulit sa teritoryo. Makiiba sa paglilingkod sa laen-laen na parahayag asin payunir, asin obserbaran kun ano an nagpapangyari sa saindang ministeryo na magin epektibo.
9 May pag-oyon asin bendisyon ni Jehova an paghuhulit kan Kahadean, asin an satong pakikikabtang dian nagpapatunay kan satong pagkamoot sa saiya saka sa satong kapwa. (Mat. 22:37-39) Kaya gibohon niato an satong trabaho sagkod na iyan matapos, na dai napapagal sa paorootrong paghuhulit sa teritoryo.