Lubos daw Nindong Inootob an Saindong Ministeryo?
1 Sa libro nin Mga Gibo, sinasabi sa sato na inotob kan mga disipulo ni Jesus an saindang ministeryo paagi sa ‘lubos na pagpatotoo’ sa mga tawo. (Gibo 2:40; 8:25; 28:23) Tunay nanggad na iyan an katuyohan ni apostol Pablo. (Gibo 20:24) Bako daw na iyan an pasohan nindo bilang ministro kan maogmang bareta? Paano daw nindo maootob ini?
2 Andamon an Saindong Pag-atubang: Tanganing masegurado na makatatao kamo nin epektibong patotoo sa ministeryo, importante an pag-andam. Nangorognang totoo ini kun nag-aalok kan mga magasin, huling an tema danay na nagbabago. Tangani na tabangan kita na makapag-andam nin mas marahay, an isyung ini kan An Satong Ministeryo sa Kahadean nag-iintrodusir nin sarong bagong kabtang—an kolumna na nasa wala, na nakalista an sampol nin mga pag-atubang para sa bagong mga magasin na Torrengbantayan asin Awake! Itatampok sa kada isyu an napapanahon na tema na makaaakit sa dakol na tawo. Paano daw nindo magigibo an halipot na mga pag-atubang na ini?
3 Pumili nin sarong suhestion na iniisip nindong magigin pinakaepektibo sa saindong teritoryo. Maingat na basahon an tampok na artikulo, asin tawan nin atension an espesipikong mga punto na posibleng makapukaw nin interes. Humanap nin sarong sitadong teksto sa magasin na konektado sa tinotokar asin na puede nindong basahon sa kagharong. Dagdagan nin halipot na konklusyon na maenkaminar sa naghihinanyog sa saindo na basahon an magasin asin nin halipot na mga tataramon, kun angay, na an kagharong puedeng magdonar para sa pambilog na kinaban na gibohon kan Mga Saksi ni Jehova. Dangan, ensayohon an pag-atubang nindo.
4 Planohon na Gamiton an Biblia: Paagi sa marahay na pagplano, an sarong teksto parateng ikaiiba sa saindong pag-atubang. Halimbawa, an eksperyensiadong mga parahayag sa dakol na lugar nagigin mapanggana paagi sa pagduman sa mga harong na kapot an Biblia, na tinataratara an kagharong, asin nagsasabing:
◼ “Hinahapot mi an mga tawo kun nagtutubod sinda kaini . . .” Basahon an Genesis 1:1, dangan maghapot: “Minaoyon daw kamo sa mga tataramon na iyan?” Kun umoyon sia, dangan magsabi: “Iyo man ako. Minsan siring, sa paghona daw nindo kun an Dios an naglalang kan gabos na bagay, sia man an responsable sa karatan?” Pakapasalamat sa simbag nia, basahon an Eclesiastes 7:29. Buksan an librong Kaaraman sa pahina 71, asin basahon an parapo 2. Enkaminaron sia na basahon an libro. Kun dai minaoyon an kagharong sa mga tataramon sa Genesis 1:1, sadolon sia na siyasaton an librong Creation.
5 Kultibaron an Gabos na Interes: Dai nindo lubos na maootob an saindong ministeryo kun dai nindo kukultibaron an interes na nanompongan. Kun nagin marahay an pag-oolay nindo, baga man nakapasakamot kamo o dai nin mga magasin o iba pang literatura, irekord an ngaran asin adres kan tawo. Maigot na hingoahon na kultibaron an interes nia paagi sa pagbalik tolos-tolos. Siertohon na mag-alok nin pag-adal sa Biblia.
6 Aram kan mga disipulo kan enot na siglo na pinagbotan sinda ni Jesus na “magtao nin lubos na pagpatotoo.” (Gibo 10:42) An iyo man sanang pagboot na iyan aplikado man sa sato, huli ta iyan an solamenteng paagi na kita makagigibo nin mga disipulo. (Mat. 28:19, 20) Gibohon niato an satong pinakamakakaya na lubos na otobon an satong ministeryo.—2 Tim. 4:5.