Mag-andam nin Sadiri Nindong Pag-atubang kan Magasin
1 Pinahahalagahan niato an mga magasin na An Torrengbantayan asin Awake! huli sa napapanahon asin nakaiimpormar na mga artikulo kaiyan, na kinokobrehan an gabos na bagay poon sa mga isyu kan kinaban sagkod sa “hararom na mga bagay nin Dios.” (1 Cor. 2:10) Nagigirumdoman niato gabos an dakol na bago asin nakapakokosog na mga bagay na nabasa niato sa mga magasin na ini, na ginagamit ni Jehova sa progresibong paghahayag kan katotoohan. (Tal. 4:18) Boot niatong magin galagang magwaras kaiyan sagkod sa pinakamahiwas na mapupuede.
2 Analisaron an Saindong Teritoryo: Anong klaseng mga tawo an nag-iistar sa saindong lugar? Kun sinda perming naghihidale, tibaad kaipuhan nindong mag-andam nin pag-atubang na halipot asin diretso sa punto. Kun igwa kamong teritoryo na bakong gayong sibot an mga tawo, tibaad makapagtaram kamo nin mas dakol. Kun an kadaklan na kagharong nagtatrabaho durante kan aldaw, puede kamong magkaigwa nin orog na kapangganahan sa pagdalaw sa saindang harong sa banggi. O puede nindong makaolay an nagkapira sa aldaw paagi sa pagpatotoo sa tinampo o paghuhulit sa mga tindahan. An ibang parahayag nagkakamit nin marahay na mga resulta paagi sa pagdolok sa mga tawo sa mga paradahan asin parke.
3 Magin Kamong Pamilyar sa mga Magasin: Basahon an kada luwas oras na maresibi nindo iyan. Pilion an mga artikulo na sa paghona nindo makaaakit sa mga tawo sa saindong teritoryo. Anong mga tema an ikinahahadit ninda? Humanap nin espesipikong punto na puede nindong kotaron sa artikulong plano nindong itampok. Umisip nin hapot na puede nindong palatawon tangani na mapukaw an interes. Pumili nin teksto na babasahon sa kagharong kun magkaoportunidad kamong gibohon iyan. Isipon kun paano nindo ikalalaag an pundasyon para sa masunod na pagdalaw liwat.
4 Andamon an Saindong Pambukas na mga Tataramon: Maingat na pumili nin mga tataramon na gagamiton nindo sa pagpoon nin orolay. May mga nakanompong nin kapangganahan paagi sa pambukas na komentong ini: “Nabasa ko an sarong magayon na marhay na artikulo sa magasin na ini, asin boot kong ihiras iyan sa iba.” An dakol minapoon paagi sa sarong hapot na nakasentro sa mga puntong mapag-oolayan na plano nindang gamiton. Halimbawa:
5 Kun itinatampok an sarong artikulo manongod sa pagigin lakop nin krimen, puede nindong ihapot:
◼ “Ano an kaipuhan tangani na magin posible para sa sato na magtorog sa banggi na dai natatakot na mahabonan o makolgan?” Ipaliwanag na igwa kamo nin impormasyon dapit sa remedyo sa problemang ini. An remedyo hahaleon man sa dai mahahaloy an gabos na klase nin karibokan sa sosyedad. Buksan an sarong bagay sa magasin na nagtatao nin siring na paglaom. Pagdalaw liwat nindo, puede nindong darahon an atension kan kagharong sa kapitulo 1 kan librong Kaaraman.
6 Kun iinaalok an sarong artikulo manongod sa buhay pampamilya, puede nindong sabihon ini:
◼ “An kadaklan na magurang nanonompongan na tunay na angat na magpadakula nin mga aki sa mga aldaw na ini. Dakol nang libro an isinurat manongod sa temang iyan, alagad maski an mga eksperto dai minaoyon. Igwa daw nin siisay man na makapagtatao nin masasarigan na paggiya?” Ihiras an sarong espesipikong komento sa magasin na nagpapaheling kan madonong na sadol na makukua sa Biblia. Sa pagdalaw liwat nindo, ipakipag-olay an Makakasuratan na mga punto manongod sa pag-ataman sa mga aki na kinokobrehan sa librong Kaaraman, pahina 145-8.
7 Sa pagtampok nin sarong artikulo manongod sa sarong problema nin sosyedad, puede nindong sabihon:
◼ “An dakol na tawo nakamamate na nagigipit huli sa nagtataong tension na mga panahon na kinabubuhayan niato. Sa paghona daw nindo intension nin Dios na mabuhay kita nin siring kaini?” Itokdo an sarong artikulo na nagpapaheling kun paano makapanggagana sa mga problema ngonyan o na nagtatao nin mga dahelan na maglaom sa sarong ngapit na mayo nang kahaditan. Sa masunod nindong pagsongko, ipakipag-olay an ilustrasyon asin kapsion sa pahina 4-5 kan librong Kaaraman, dangan direktang darahon sa pag-adal sa Biblia sa harong.
8 Ibagay sa Kagharong: Makanonompong kamo nin mga tawo na may laen-laen na intereses asin pinaghalean. Mag-andam nin pundamental na pag-atubang na puede nindong liwaton para sa kada kagharong. Magin preparadong ibagay an sasabihon nindo sa sarong lalaki, babae, gurang, o hoben. Mayong estriktong susundon dapit sa kun ano an dapat nindong sabihon. Gamiton an ano man na pasil para sa saindo asin nagbubunga. Minsan siring, magin entusiastiko, magtaram gikan sa puso, asin magin marahay na parahinanyog. An mga “may tamang tendensia” mamamatean an saindong sinseridad asin maghihimate.—Gibo 13:48.
9 Magtarabangan: Paagi sa paghirirasan nin mga ideya, nakanonood kita nin bagong mga paagi na ikapahayag an satong sadiri. An iriba niatong pag-ensayo nin mga pag-atubang nagtatao sa sato nin kompiansa. (Tal. 27:17) Kun ineensayo nindo an sasabihon nindo, magigin kamong mas pamugtak an boot sa pinto. Mahalaga na magtagama nin panahon an mga magurang na tabangan an saindang mga aki sa pag-andam, maghinanyog mantang ineensayo ninda an saindang pag-atubang, asin magtao nin mga suhestion para sa pag-oswag. An mga bagohan makikinabang paagi sa pag-iba sa orog na may kabatidan na mga parahayag.
10 An pag-andam nin sadiri nindong pag-atubang kan magasin bako man depisil. Iyan pagsaisip sana nin sarong espesipikong bagay na sasabihon dangan pagpahayag kaiyan sa kaakit-akit na paagi. Paagi sa patienot na paghorophorop, puede kamong makapag-andam nin marahay na pag-atubang na magkakaigwang marahay na reaksion.
11 An pagwaras nin magasin saro sa pinakapangenot na paagi na ilinalakop niato an mensahe kan Kahadean sa bilog na kinaban. Kun ikapasasakamot nindo sa sinserong mga tawo An Torrengbantayan asin Awake!, an mga magasin makapagtataram para sa sainda man sana. Perming girumdomon an kahalagahan kaiyan asin kun paano an mensahe kaiyan makapagliligtas nin buhay. An klaseng ini nin ‘paggibo nin marahay asin paghiras nin mga bagay sa iba’ iyo an nakapaoogmang gayo ki Jehova!—Heb. 13:16.