Kun Paano Mag-aandam nin Pag-atubang nin Magasin
1. Taano ta mas marahay na mag-andam nin personal na pag-atubang nin magasin imbes na tuomon sana an sarong sampol na yaon sa An Satong Ministeryo sa Kahadean?
1 ‘Taano ta maninigo kitang mag-andam nin mga pag-atubang nin magasin,’ tibaad isip-isipon nindo, ‘mantang may mga pag-atubang na sa kada isyu kan An Satong Ministeryo sa Kahadean?’ Minsan ngani nanonompongan kan dakol na makakatabang an sampol na ini nin mga pag-atubang, kaipuhan pa man giraray an personal na pag-andam. An sarong pag-atubang na epektibo sa sarong teritoryo tibaad bakong praktikal sa ibang teritoryo. Kun siring, dai kita maninigong makamate na obligado kitang iatubang an mga magasin na ginagamit nin eksakto an mga tataramon sa sampol na mga pag-atubang. Dawa kun pilion niato na gamiton an sarong sampol na pag-atubang, pinakamarahay na ipahayag iyan sa sadiri niatong tataramon.
2. Ano an kalabot sa pagdeterminar kun anong artikulo an itatampok nindo?
2 Pumili nin Sarong Artikulo: Pakabasa nindo kan magasin, pumili nin sarong artikulo na angay sa saindong teritoryo asin espesyalmenteng interesante para sa saindo. An saindong kombiksion asin entusiasmo kun iinaatubang an artikulo tibaad makapahiro sa kagharong na mawoton na basahon man iyan. Minsan ngani tibaad itampok nindo an artikulo na makakaakit sa kadaklan na tawo sa lokal na teritoryo, magin pamilyar man na marhay sa ibang artikulo sa magasin. Ini mapangyari sa saindo na ibagay an saindong pag-atubang kun an makaolay nindo tibaad mas interesado sa ibang tema.
3. Anong klase nin introduksion an gagamiton nindo para sa pinakamarahay na mga resulta?
3 Maghapot: Sunod, iandam nin maingat an saindong pambukas na mga tataramon. Mahalaga an saindong introduksion. Tibaad makakatabang na hapoton an kagharong nin sarong nakakapukaw nin isip na hapot tanganing pukawon an saiyang interes sa artikulo na pinili nindong itampok. Pinakaepektibo an mga hapot sa punto de vista. Likayan na maghapot nin sarong bagay na magigin dahelan na an kagharong mauyam o makiargumento.
4. Ano an mga pakinabang nin pagbasa nin sarong teksto sa kagharong kun itinotogot kan mga kamugtakan?
4 Magbasa nin Sarong Teksto: Ultimo, pumili nin sarong teksto tanganing basahon kun itinotogot kan mga kamugtakan kan kagharong, tibaad saro na nasa artikulo na saindong itatampok. An pagbasa nin sarong teksto matabang sa kagharong na masabotan na an satong mensahe hale sa Tataramon nin Dios. (1 Tes. 2:13) An teksto magtatao man sa saiya nin patotoo dawa kun sayumahan nia an mga magasin. Napukaw kan nagkapira an interes kan kagharong paagi sa pagbasa nin sarong teksto bago maghapot nin sarong espesipikong hapot. Puede nindong iintrodusir an teksto paagi sa pagsabing, “Gusto kong hagadon an opinyon nindo sa kun ano an sinasabi sa bersikulong ini sa Biblia.” Dangan darahon an atension kan tawong iyan sa sarong konektadong punto sa magasin, asin magkomento nin halipot tanganing orog pang pukawon an saiyang interes bago ialok iyan.
5. Anong pundamental na mga giya an maninigong girumdomon nindo kun nag-aandam nin pag-atubang nin magasin?
5 Mayo nin estriktong mga susundon manongod sa kun ano an sasabihon kun iinaalok an mga magasin. Sa pangkagabsan, pinakamarahay na papagdanayon na simple asin halipot an saindong pag-atubang. Gumamit nin pagdolok na pasil para sa saindo asin may marahay na mga resulta. Magkonsentrar sa nakakalabing halaga kan mga magasin, asin magin entusiastiko. Kun kamo andam na marhay, magigin mas epektibo kamo sa pagpasakamot kan An Torrengbantayan asin Awake! sa mga “may tamang tendensia sa buhay na daing katapusan.”—Gibo 13:48.