Ialok an mga Magasin na Nagpapatotoo sa Katotoohan
1. Ano an kabtang kan An Torrengbantayan asin Awake!?
1 An Torrengbantayan Nagpapahayag kan Kahadean ni Jehova asin an kapadis kaiyan na magasin na Awake! may pangenot na kabtang sa paghuhulit kan Kahadean asin paggibo nin mga disipulo. (Mat. 24:14; 28:19, 20) Ikinakaogma niatong marhay an regular na pagpresentar kan duwang napapanahon na magasin na ini mientras na kita nagpapartisipar sa manlaenlaen na aspekto nin paglilingkod sa Kahadean.
2. Anong mga pagbabago an naheling niato sa An Torrengbantayan asin Awake!, asin taano ta ginibo iyan?
2 Sa nag-aging mga taon naheling niato an mga pagbabago sa sokol asin laog kan mga magasin saka sa mga paagi na ginagamit niato sa pagwaras kaiyan. Ginibo an mga pagbabagong ini sa katuyohan na magin mas kaakit-akit asin epektibo an mga magasin, tanganing an mensahe kan Kahadean makataros sa puso kan ‘gabos na klase nin tawo na paagi kaiyan tibaad sinda makaligtas asin makaabot sa tamang kaaraman dapit sa katotoohan.’—1 Tim. 2:4.
3. Paano gagamiton sa ministeryo an mga magasin?
3 Poon kan Enero 2006, natuod na kita sa paggamit nin manlaenlaen na presentasyon para sa sarong bulanan na isyu kan Awake! Ngonyan gigibohon man niato an paaging iyan sa satong pampublikong ministeryo tanganing ialok an saro sana sa duwang bulanan na isyu kan An Torrengbantayan Nagpapahayag kan Kahadean ni Jehova. An sampol na mga presentasyon para sa kada magasin maheheling sa likod na pahina kan An Satong Ministeryo sa Kahadean. Sa parate itinatampok kaini an saro sa enot na mga artikulo sa magasin, alagad kun beses itinatampok kaini an nagkapirang iba pang artikulo na nakakapukaw sa interes nin dakol na tawo. Magagamit niato nin pinakaepektibo an mga suhestion kun pamilyar kitang marhay sa itinatampok na artikulo asin kun gagamiton niato an sadiri niatong mga tataramon tanganing ibagay an presentasyon sa satong teritoryo.
4. Taano ta tibaad magigin kapakipakinabang na gumamit nin ibang presentasyon apuera sa isinuherir na mga presentasyon sa An Satong Ministeryo sa Kahadean?
4 Minsan ngani An Satong Ministeryo sa Kahadean igwa nin duwang suhestion para sa kada magasin, dai kamo mag-alangan na gumamit nin biyong laen na presentasyon. An sarong dahelan sa paggibo kaiyan iyo na tibaad an saro sa iba pang mga artikulo mas makakapukaw sa interes nin mga tawo na nasa saindong teritoryo. O tibaad namamatean nindo na makakagibo kamo nin mas epektibong presentasyon paagi sa paggamit nin artikulo na dian kamo mas interesado.
5. Bago mag-andam nin presentasyon para sa magasin na itatampok, ano an dapat nindong gibohon?
5 Kun Paano Aandamon an Saindong Presentasyon: Enot sa gabos, dapat na magin kamong lubos na pamilyar sa artikulo na pinili nindong itampok. Tibaad dai kamo pirmeng magigin pamilyar sa gabos na artikulo sa magasin bago nindo iyan ponan na gamiton sa ministeryo sa langtad. Minsan siring, dapat kamong magpaheling nin entusiasmo asin sinseridad mapadapit sa mga artikulo na pinili nindong itampok. Magigibo sana nindo iyan kun pamilyar kamong marhay sa impormasyon na ipepresentar nindo.
6. Paano niato puedeng andamon an sadiri niatong mga presentasyon?
6 Sunod, gibohon na madaling ibagay an pambukas na mga tataramon na inaandam nindo. An deretso sa punto asin nakakapukaw sa interes na hapot na konektado sa artikulo puedeng gamiton tanganing ponan an pag-oolay. Pirmeng manarig sa puersa kan Tataramon nin Dios na mataros an puso. (Heb. 4:12) Pumili nin angay na teksto na konektado sa tema na ipapakipag-olay nindo, na mas marahay kun iyan sarong teksto na sitado o kotado sa artikulo na itatampok nindo. Pag-isipan kun paano ikokonektar sa artikulo an tekstong iyan.
7. Paano niato orog pang mapapaoswag an satong mga presentasyon?
7 Sa Lambang Oportunidad: Tangani na talagang magin epektibo an presentasyon, dapat na gamiton iyan. Makiiba sa kongregasyon sa pagpatotoo paagi sa magasin sa aldaw nin Sabado. Ialok an mga magasin sa mga tawo na nag-ako na kaidto nin ibang literatura. Pirmeng ialok an mga magasin sa saindong mga inaadalan sa Biblia asin sa iba pang mga tawo na tibaad presente kun kamo nagdadalaw liwat. Puede kamong makapasakamot nin mga magasin sa mga tawo na nakakaolay nindo kun kamo namamakal, nagbibiahe, o mientras na naghahalat sa klinika nin sarong doktor. Paoswagon an saindong mga presentasyon mientras na ginagamit nindo iyan sa bilog na bulan.
8. Sa anong mga paagi na daing kaagid An Torrengbantayan asin Awake!?
8 Daing kaagid an mga magasin na An Torrengbantayan asin Awake! Pinapamuraway kaiyan si Jehova bilang an Soberano kan uniberso. (Gibo 4:24) Rinaranga kaiyan an mga tawo paagi sa maogmang bareta kan Kahadean nin Dios asin dinadagka sinda kaiyan na magtubod ki Jesu-Cristo. (Mat. 24:14; Gibo 10:43) Dugang pa, padagos na binabantayan kaiyan an mga pangyayari sa kinaban mientras na inootob kaini an hula sa Biblia. (Mat. 25:13) Tabangan nindo an mga tawo sa saindong teritoryo na makinabang sa mga magasin na ini paagi sa pag-andam na ialok iyan sa lambang angay na oportunidad!
9. Paano kita makakabugtak nin pundasyon para sa sarong pagdalaw liwat?
9 Kun makapasakamot kamo nin magasin, o dawa kun nagkaigwa sana kamo nin makikatood na pakipag-olay sa sarong tawo dapit sa espirituwal na mga bagay, magin andam na magtao nin hapot o nakakapukaw sa isip na pananaram na puedeng magbukas nin dalan para sa sarong pagdalaw liwat asin saro pang pakipag-olay dapit sa espirituwal na mga bagay. Kun maigot kita sa pagsabwag nin mga banhi nin katotoohan, makakasegurado kita na bubukasan ni Jehova an puso kan mga tawo na sinserong nagmamawot na mamidbid asin paglingkodan Sia.—1 Cor. 3:6.