Ipinaiisi kan mga Magasin an Kahadean
1 Bilang Mga Saksi ni Jehova, kita midbid na marhay sa satong maigot na paghuhulit dapit sa Kahadean nin Dios. An mga magasin na Torrengbantayan asin Awake! na idinidistribwir niato may mapuersang kabtang sa pagtabang sa minilyon na tawo na makanood manongod sa mga katuyohan nin Dios. An laog kaiyan na mensahe talagang maogmang bareta, huli ta ipinaiisi kaiyan an langitnon na Kahadean nin Dios bilang an solamenteng paglaom para sa katawohan. Kaya an Abril asin Mayo nagtatao nin marahay na oportunidad na ialok an duwang magasin na ini paagi sa pagpasuskribir.
2 An mga magasin nagpapaliwanag kan tunay na mga pangangaipo nin mga tawo—sa emosyon, sosyedad, asin espirituwal. Huli sa lakop na pagbagsak kan moral asin mga pamantayan sa pamilya, An Torrengbantayan asin Awake! nakatatabang sa mga tawo na paoswagon an kualidad kan saindang buhay paagi sa pagpaheling sa sainda kun paano iaaplikar an mga prinsipyo sa Biblia. Kaogmahan niato na itampok an mga magasin ngonyan na Abril asin sa Mayo.
3 Iyan Tunay na Nakaaakit: An Torrengbantayan asin Awake! makukua sa mga lenguahe nin haros gabos na populasyon kan kinaban. Huli kaini, midbid na marhay an satong mga magasin. Uya an nagkapirang rason kun taano an mga tawo ta naaakit dian:
◼ Bilang mga babasahon na may integridad asin katotoohan, malinaw na ipinaheheling kaiyan an pagkakalaen kan marahay asin maraot.
◼ Nagtatao iyan nin paglaom manongod sa sarong maabot na matanos na paraiso, basado sa panuga nin Dios na sakopon an daga sa pamamahala kan saiyang Kahadean.
◼ Manlaenlaen na napapanahon na tema an iinaatubang, na nakaaakit sa mga tawo kan gabos na pinaghalean asin kultura.
◼ An mga artikulo diretso sa punto, nakapagtotokdo, totoo, asin mayo nin prehuwisyo patin pakikikompromiso.
◼ An nakaaapod nin atension na mga ilustrasyon madaling makainteres, asin an simpleng estilo nin pagkasurat ginigibo an mga magasin na pasil basahon.
4 Idistribwir Iyan nin Mahiwas: An epektibong pagdistribwir nin magasin dependeng marhay sa satong kahigosan sa pagpreparar kan satong mga pag-atubang, pag-iskedyul kan satong panahon, asin pag-organisar kan satong paghuhulit. Itinao an praktikal na mga suhestion sa Enero 1996 asin Oktubre 1996 na mga luwas kan An Satong Ministeryo sa Kahadean, na marahay na repasohon asin iaplikar.
5 Magin Kamong Pamilyar sa mga Magasin: Mantang binabasa nindo an kada luwas, mag-isip nin saro na aapresyaron an pagkaigwa nia nin kopya. Hanapon an espesipikong mga punto o teksto na puede nindong kotaron sa saindong pag-atubang. Mag-isip nin hapot na magagamit nindo tangani na makapoon nin pag-orolay asin makapukaw nin interes sa tema.
6 Ibagay sa Tawo an Pag-atubang: Mag-andam nin simple, madaling ibagay na pag-atubang na puedeng liwaton para sa sarong lalaki, babae, gurang, o hoben, baga man kamidbid o estranghero.
7 Magin Mapaggirumdom sa Torrengbantayan Asin Awake!: Mantang an mga magasin pasil sanang magkaigo sa sarong bag, portamoneda, o bulsa, puede kitang magdara nin mga kopya kun nagbibiahe o nananaod. Ialok iyan kun nakikipag-olay sa mga paryente, kataed, katrabaho, kaeskuela, o paratokdo. Magtagama nin sarong aldaw kada semana, pangenot na para sa pagpapatotoo paagi sa magasin.
8 Pahalagahan an mga Magasin: Iyan nungkang nawawaran nin halaga. An pag-agi nin panahon dai nakaiina sa importansia kan laog kaiyan na mensahe. Siempre, kun kita espesyalmenteng maghihingoa na ikapasakamot an gabos na magasin na kinukua niato, dai dapat na matipon an mas daan na mga luwas sa satong mga eskaparate.
9 Epektibo an Pagpapatotoo sa Tinampo: Ini saro sa pinakamarahay na mga paagi na ialok an mga magasin sa dakol-dakol na tawo. An ibang mga parahayag naghuhulit sa sibot na mga agihan sa regular na pag-oltanan na oras kun mga aldaw nin pananaod.
10 Mabunga an Teritoryo nin Negosyo: Sa paghuhulit sa mga tindahan, pipira sana an dai niato nanonompongan. An kadaklan na negosyante magalang, asin dakol an maogmang nag-aako kan mga magasin. Itampok an mga artikulo na angay sa partikular na negosyo na kinakaolay.
11 May Potensial an mga Ruta sa Magasin: Mantang an mga magasin ipinupublikar nin duwang beses kada bulan, angay sanang songkoon liwat an mga tawo na nagbabasa kaiyan asin iatubang an minasunod na mga luwas. Maninigo kitang regular na dumalaw liwat, bako sanang tanganing makapasakamot nin mga magasin kundi tangani man na pataluboon an interes kan tawong iyan sa Biblia. An mga ruta sa magasin ekselenteng gikanan nin potensial na mga pag-adal sa Biblia.
12 Aprobetsaran an Abril Asin Mayo: An Torrengbantayan asin Awake! nakamtan an kompiansa nin minilyon na mapag-apresyar na parabasa. Huling epektibong gayo iyan sa pagpaisi kan Kahadean, maninigo na pagmaigotan niatong darahon iyan asin ialok iyan sa gabos na oportunidad. An mga bulan nin Abril asin Mayo magin logod marahayon na mga bulan para sa pagdistribwir nin magasin!