Itampok an mga Magasin sa Saindong Ministeryo
1, 2. Paano naapektaran kan An Torrengbantayan asin Awake! an buhay nin mga tawo?
1 “Interesante, napapanahon, asin nakakaparigon sa boot.” “An pinakanakakaparigon sa boot na mga magasin na nabasa ko kasuarin man.” An mga komentong ini naglaladawan nanggad kan saboot kan mga parabasa sa bilog na kinaban manongod sa An Torrengbantayan asin Awake! Tunay nanggad, an satong mga magasin nagin mahalagang marhay na kasangkapan sa pagpaabot kan maogmang bareta sa “gabos na klase nin tawo.”—1 Tim. 2:4.
2 An sarong lalaking negosyante nag-ako nin magasin na Awake! manongod sa sarong tema na nagin interesante sa saiya. Pagkatapos, binasa nia an kaibanan na isyu kan An Torrengbantayan, na igwang artikulo na nagpahiro sa saiya na pakasiyasaton an saiyang haloy nang paniniwala sa Trinidad. Napukaw kaini an interes nia. Pakalihis nin anom na bulan sia nabautismohan. An saro pang lalaki regular na nagreresibi nin mga magasin alagad dai noarin man iyan binabasa. An agom nia, sa ibong na lado, naglilikay sa mga Saksi alagad binabasa an mga magasin na iwinawalat sa mister nia. Napahiro an puso kan babae kan panuga kan Biblia na sarong daganon na paraiso na pano nin matanos na mga tawo. Pag-abot nin panahon, sia, an saiyang aking lalaki, asin an saiyang tugang na babae nagin lingkod ni Jehova.
3. Ano an bentaha sa pag-alok kan mga magasin na magkapadis?
3 Ialok Iyan na Magkapadis: Arog kan ipinapaheling kan nasambitan sa enotan na mga halimbawa, dai kita makakasegurado kun siisay an mabasa kan mga magasin niato o kun ano an makakapukaw kan interes ninda. (Ecl. 11:6) Kun siring, may bentahang ialok An Torrengbantayan asin Awake! na magkapadis, dawa ngani sa pankagabsan saro sanang magasin an itatampok niato sa satong pag-atubang. Sa nagkapirang kamugtakan, tibaad angay na ialok an nagkapirang laen-laen na isyu kan satong mga magasin sa sarong pagdalaw.
4. Paano kita makakapag-iskedyul nin pagwaras nin magasin?
4 Kapakipakinabang na mag-iskedyul nin sarong aldaw kada semana sa pakikikabtang sa pagwaras nin magasin. Sa 2005 Calendar of Jehovah’s Witnesses, an kada Sabado pinili bilang “Aldaw nin Pagwaras nin Magasin.” Siempre, mantang nagkakalaenlaen an lokal asin personal na mga kamugtakan, an nagkapira puedeng magtagama nin ibang aldaw tangani na magkonsentrar sa pag-alok kan satong mga magasin. Kabtang daw ini kan saindong semanal na iskedyul?
5. Maninigo kitang magin listo sa anong mga oportunidad na magpasakamot nin mga magasin, asin ano an makakatabang sa sato na gibohon iyan?
5 Magbugtak nin Personal na Pasohan: An pagbugtak nin personal na bulanan na pasohan na makapasakamot nin mga magasin makakatabang sa sato na orog na makapagkonsentrar sa pagpasakamot nin mga magasin. Igwa daw kamo nin ruta nin magasin? Nag-aalok daw kamo nin mga magasin sa mga nanonompongan nindo sa ministeryo? Puede daw kamong mag-alok nin mga magasin sa paghuhulit sa tinampo, sa komersial na teritoryo, asin sa pampublikong mga lugar? Nagdadara daw kamo nin mga magasin kun nagbibiahe, namamakal, asin kun makikitagbuan sa mga kaolay nindo? Aprobetsaran an gabos na angay na oportunidad tangani na tabangan an iba na makinabang sa An Torrengbantayan asin Awake!
6. Paano niato magagamit nin tama an haloy nang mga isyu kan mga magasin?
6 Puede man niatong gibohon na pasohan na ipasakamot an haloy nang mga isyu na yaon sa sato. Dawa kun dai ikapasakamot an mga magasin sa laog nin saro o duwang bulan na petsa kan isyu, mahalaga pa man giraray an impormasyon kaiyan. Ipasakamot iyan sa mga interesado. Para sa minilyon katawo, an mga magasin na Torrengbantayan asin Awake! nagin “tataramon . . . sa tamang kapanahonan.” (Tal. 25:11) Gamiton niato iyan sa pagtabang sa minilyon pa na mamidbid asin maglingkod ki Jehova.