An Espiritu ni Jehova Yaon sa Sato
1 Bilang Mga Saksi ni Jehova, dakulaon na gibohon an iinasignar sa sato. Si Jesus nagsabi: “Sa gabos na nasyon an maogmang bareta kaipuhan na ikahulit nguna.” (Mar. 13:10) Kun mamansayon sa punto de vista nin tawo, ini garo baga imposible, alagad bakong siring kaiyan. Yaon sa sato an pinakamakapangyarihan na puersa sa uniberso na nagsusuportar sa sato—an espiritu nin Dios!—Mat. 19:26.
2 Ebidensia kan Enot na Siglo: Sa pag-aplikar kan hula ni Isaias sa saiyang sadiri, nagsabi si Jesus: “An espiritu ni Jehova yaon sa sako . . . na magpahayag kan maogmang bareta.” (Luc. 4:17, 18) Bago sumakat sa langit, sinabihan nia an mga apostol nia na sinda man tatawan nin kapangyarihan kan banal na espiritu tangani na magpatotoo “sagkod sa kaporoporohi kan daga.” Pakatapos kaiyan, idinirehir si Felipe kan banal na espiritu na hulitan an sarong Etiopeng opisyal sa palasyo, isinugo si Pedro kan espiritu sa sarong Romanong senturyon, asin isinugo kaiyan si Pablo asin Bernabe na maghulit sa paganong mga nasyon. Siisay an maghohona na an mga tawo sa siring na mga pinaghalean maghihimate sa katotoohan? Alagad ta naghimate sinda!—Gibo 1:8; 8:29-38; 10:19, 20, 44-48; 13:2-4, 46-48.
3 Ebidensia sa Presenteng Aldaw: An libro nin Kapahayagan nagdodoon kan pakikilabot kan banal na espiritu sa paghuhulit ngonyan paagi sa pagsabi: “An espiritu asin an nobya padagos na nagsasabi: ‘Madia!’ . . . An siisay man na boot kumua kan tubig nin buhay na daing bayad.” (Kap. 22:17) Minotibar kan espiritu an grupong nobya ni Cristo asin an saindang kairiba na “ibang karnero” na ihulit an maogmang bareta sa gabos na tawo. (Juan 10:16) Maninigo kitang magin mapuso sa satong paghuhulit, na dai noarin man nag-aalangan na dumolok sa gabos na klase nin tawo, na pirmeng kompiado na tatabangan kita kan espiritu nin Dios. An 1998 Yearbook nagtatao nin nakakokombensir na prueba na an espiritu nin Dios padagos na yaon sa saiyang mga lingkod. Helinga an resulta! Durante kan nakaaging duwang taon nin paglilingkod, nabautismohan an promedyong labi sa 1,000 aroaldaw!
4 Laoman nindo na an espiritu nin Dios mapadagos na yaon sa sato mantang ihinuhulit niato an mensahe kan Kahadean sagkod na boot ni Jehova. An kaaraman na ini maninigong magparigon sa boot niato asin magmotibar sa sato na padagos na maghingoang marhay sa pinakaimportanteng gibohon na pan-Kahadean.—1 Tim. 4:10.