‘Sa Ngaran kan Banal na Espiritu’
“Kaya paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran . . . kan banal na espiritu.”—MATEO 28:19.
1. Anong bagong ekspresyon an ginamit ni Juan na Bautisador may koneksion sa banal na espiritu?
KAN taon 29 kan satong Komon na Kapanahonan, si Juan na Bautisador aktibo sa Israel sa pag-andam kan dalan para sa Mesiyas, asin sa pagpadagos kan saiyang ministeryo, iinanunsiar nia an sarong bagay na bago manongod sa banal na espiritu. Siyempre, aram na kan mga Judio an sinasabi kan Hebreong Kasuratan manongod sa espiritu. Alagad, tibaad nagngaralas sinda kan sabihon ni Juan: “Ako nagbabautismo sa saindo nin tubig huli sa saindong pagsolsol; alagad an saro na masunod sa sako . . . mabautismo saindo sa banal na espiritu.” (Mateo 3:11) An ‘bautismo sa banal na espiritu’ sarong bagong kapahayagan.
2. Anong bagong kapahayagan manongod sa banal na espiritu an iinintrodusir ni Jesus?
2 An sarong madatong iyo si Jesus. Durante kan saiyang daganon na buhay, bakong aktuwal na nagbautismo si Jesus sa kiisay man sa banal na espiritu, minsan ngani dakol na beses siang nagtaram manongod sa espiritu. Saro pa, pakatapos kan saiyang pagkabuhay liwat, nagtaram sia manongod sa banal na espiritu sa saro pang bagong paagi. Sinabihan nia an saiyang mga disipulo: “Kaya paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu.” (Mateo 28:19) An ekspresyon na “sa ngaran kan” nangangahulogan “sa pagmidbid sa.” An bautismo sa tubig sa pagmidbid sa Ama, Aki, asin sa banal na espiritu nalalaen sa bautismo sa banal na espiritu. Iyan man sarong bagong kapahayagan na kalabot an banal na espiritu.
Bautismo sa Banal na Espiritu
3, 4. (a) Kasuarin nangyari an enot na pagbautismo sa banal na espiritu? (b) Apuwera sa pagbautismo sainda, paano naghiro an banal na espiritu sa mga disipulo ni Jesus kan Pentecostes 33 C.E.?
3 Kun manongod sa bautismo sa banal na espiritu, ipinanuga ni Jesus sa saiyang mga disipulo bago sia sumakat sa langit: “Kamo babautismohan sa banal na espiritu pirang aldaw na sana poon ngonyan.” (Gibo 1:5, 8) Dai naghaloy pakatapos, an panugang iyan naotob. An banal na espiritu buminaba sa mga 120 disipulo na nagkakatiripon sa sarong kuwarto sa itaas sa Jerusalem mantang si Jesus, hale sa langit naggibo kan saiyang enot na pagbautismo sa banal na espiritu. (Gibo 2:1-4, 33) Ano an resulta? An mga disipulo nagin kabtang kan espirituwal na hawak ni Cristo. Siring kan ipinaliwanag ni apostol Pablo, “paagi sa sarong espiritu [sinda] nabautismohan sa sarong hawak.” (1 Corinto 12:13) Kadungan kaiyan, linahidan sinda na magin mga hade asin saserdote sa ngapit sa langitnon na Kahadean nin Dios. (Efeso 1:13, 14; 2 Timoteo 2:12; Kapahayagan 20:6) An banal na espiritu nagserbi man bilang sarong patienot na tatak asin patotoo kan mamuraway na manang iyan sa ngapit, alagad bako sanang iyan.—2 Corinto 1:21, 22.
4 Nagkapirang taon bago kaiyan, sinabi ni Jesus ki Nicodemo: “Kun an saro dai namundag giraray, dai sia makaheheling kan kahadean nin Dios. . . . Kun an saro dai namundag sa tubig asin espiritu, dai sia makalalaog sa kahadean nin Dios.” (Juan 3:3, 5) Ngonyan 120 katawo an namundag giraray. Paagi sa banal na espiritu, sinda ipinaniaki bilang espirituwal na mga aki nin Dios, mga tugang ni Cristo. (Juan 1:11-13; Roma 8:14, 15) An gabos na aktibidad na ini kan banal na espiritu sa mismong pambihirang paagi kaiyan mas makangangalas kisa sa mga milagro. Saro pa, bakong siring kan mga milagro kaidto, an banal na espiritu dai natapos pagkagadan kan mga apostol kundi nagpadagos na magin aktibo sa paaging ini sagkod sa satong panahon. Pribilehiyo kan mga Saksi ni Jehova na nasa tahaw ninda an huring bautisado sa banal na espiritu na mga miembro kan hawak ni Cristo, asin an mga ini naglilingkod bilang an “maimbod asin madonong na oripon” na nagtatao nin espirituwal na kakanon sa igong panahon.—Mateo 24:45-47.
Bautismohan “sa Ngaran kan . . . Banal na Espiritu”
5, 6. Paano an enot na mga pagbautismo sa banal na espiritu naggiya sa mga pagbautismo sa tubig?
5 Alagad kumusta an ipinanugang bautismo sa tubig sa ngaran kan Ama, kan Aki, asin kan banal na espiritu? An enot na mga disipulo na binautismohan sa espiritu dai nagkaigwa kan siring na bautismo sa tubig. Nag-ako na sinda kan bautismo sa tubig ni Juan, asin mantang iyan inaako ni Jehova kan partikular na panahon na iyan, dai sinda nangangaipong bautismohan giraray. Alagad kan Pentecostes 33 C.E., sarong dakulang kadaklan nin mga kalag an nag-ako kan bagong bautismo sa tubig. Paano ini nangyari?
6 An bautismo kan 120 sa banal na espiritu sinundan nin makosog na ribok na nakaakit sa kadaklan. Nagngaralas sinda kan madangog an mga disipulo na nagtararam nin mga lenguahe, an boot sabihon, nin ibang lenguahe na nasasabotan kan mga presente. Si apostol Pedro nagpaliwanag na an milagrong ini patotoo na an espiritu nin Dios ibinubo ni Jesus, na binuhay liwat hale sa mga gadan asin ngonyan nagtutukaw na sa toong kamot nin Dios sa langit. Dinagka ni Jesus an mga nagdadangog saiya: “Kaya maaraman logod kan bilog na harong ni Israel na may kasiertohan na ginibo sia nin Dios na magin Kagurangnan asin Cristo, an Jesus na ini na saindong ipinako.” Dangan nagtapos sia sa pagsabing: “Magsorolsol kamo, asin an lambang saro logod saindo mabautismohan sa ngaran ni Jesu-Cristo para sa kapatawadan kan saindong mga kasalan, asin aakoon nindo an daing bayad na regalo nin banal na espiritu.” Mga 3,000 na kalag an naghimate.—Gibo 2:36, 38, 41.
7. Sa anong paagi an 3,000 na binautismohan kan Pentecostes 33 C.E. binautismohan sa ngaran kan Ama, kan Aki, asin kan banal na espiritu?
7 Puwede daw sabihon na an mga ini nabautismohan sa ngaran kan (sa pagmidbid sa) Ama, kan Aki, asin kan banal na espiritu? Iyo. Maski ngani dai sinda sinabihan ni Pedro na mabautismohan sa ngaran kan Ama, inako na ninda si Jehova bilang Soberanong Kagurangnan, mantang sinda mga Judio sa laman, mga miembro kan nasyon na dusay na sa saiya. Sinabi ni Pedro: ‘Mabautismohan sa ngaran kan Aki.’ Kaya an bautismo ninda nagpapaheling kan saindang pagmidbid ki Jesus bilang Kagurangnan asin Cristo. Sinda ngonyan mga disipulo nia asin nag-ako na kan kapatawadan sa mga kasalan poon kaidto paagi sa saiya. Sa katapustapusi, an bautismo bilang pagmidbid sa banal na espiritu, asin iyan isinasagibo bilang paghimate sa panuga na aakoon an espiritu bilang libreng regalo.
8. (a) Dugang pa sa bautismo sa tubig, ano pang ibang bautismo an inako kan linahidan na mga Kristiano? (b) Sairisay apuwera sa 144,000 an nag-ako kan bautismo sa tubig sa ngaran kan banal na espiritu?
8 An mga nabautismohan sa tubig kan aldaw nin Pentecostes 33 C.E. nabautismohan man sa espiritu, bilang linahidan na mga hade asin saserdote sa ngapit sa langitnon na Kahadean. Sono sa libro nin Kapahayagan, 144,000 sana sinda. Kaya an mga binautismohan sa banal na espiritu asin sa katapustapusi ‘tinatakan’ bilang mga paramana kan Kahadean may bilang sanang 144,000. (Kapahayagan 7:4; 14:1) Alagad, gabos na bagong disipulo—ano man an saindang paglaom—binabautismohan sa tubig sa ngaran kan Ama, kan Aki, patin kan banal na espiritu. (Mateo 28:19, 20) Ano kun siring an ipinaririsa kan bautismo sa ngaran kan banal na espiritu para sa gabos na Kristiano, kabilang man sa “sadangoton na aripompon” o sa “ibang karnero”? (Lucas 12:32; Juan 10:16) Bago iyan simbagon, mangnohon niato an nagkapirang aktibidad kan espiritu sa panahon Kristiano.
An Bunga kan Espiritu
9. Anong aktibidad kan banal na espiritu an mahalaga sa gabos na Kristiano?
9 An sarong mahalagang aktibidad kan banal na espiritu iyo an pagtabang sato na paoswagon an Kristianong mga personalidad. Totoo, huli sa pagkabakong sangkap dai ta malilikayan na magkasala. (Roma 7:21-23) Alagad kun sinsero kitang nagbabakle, pinatatawad kita ni Jehova huli sa atang ni Cristo. (Mateo 12:31, 32; Roma 7:24, 25; 1 Juan 2:1, 2) Saro pa, linalaom ni Jehova na tutumangon niato an satong tendensia sa kasalan, asin an banal na espiritu tinatabangan kitang gibohon ini. “Magpadagos kamong maglakaw sa espiritu,” an sabi ni Pablo, “asin dai kamo makagigibo nin ano man na horot nin laman.” (Galacia 5:16) Padagos na ipinaheling ni Pablo na an espiritu makapagbubunga nin pinakamarahay na mga kuwalidad sa sato. Isinurat nia: “An bunga kan espiritu iyo an pagkamoot, kagayagayahan, katoninongan, pakatios, kabootan, karahayan, pagtubod, kahoyoan, pagpopogol sa sadiri.”—Galacia 5:22, 23.
10. Paano nag-ooswag an bunga kan espiritu sa sarong Kristiano?
10 Paano pinagigin posible kan espiritu an siring na bunga sa sarong Kristiano? Dai iyan automatikong nangyayari huli sana ta kita nagdusay asin bautisadong mga Kristiano. Kaipuhan niatong pagmaigotan iyan. Alagad kun nakikiasosyar kita sa ibang Kristiano na nagpapaheling kan mga kuwalidad na ini, kun namimibi kita sa Dios para sa saiyang espiritu na tabangan kitang paoswagon an espisipikong mga kuwalidad, kun linilikayan niato an maraot na kairiba asin nag-aadal kan Biblia para sa sadol asin marahay na mga halimbawa, dangan an bunga kan espiritu mag-ooswag sa sato.—Talinhaga 13:20; 1 Corinto 15:33; Galacia 5:24-26; Hebreo 10:24, 25.
Ninombrahan kan Banal na Espiritu
11. Sa anong paagi an mga magurang ninombrahan kan banal na espiritu?
11 Si Pablo, kan nakikipag-olay sa kamagurangan kan Efeso, nag-introdusir kan saro pang aktibidad kan banal na espiritu kan sabihon nia: “Mag-ingat kamo sa saindong sadiri asin sa bilog na aripompon, na sa tahaw kaiyan kamo ninombrahan kan banal na espiritu bilang mga paraataman, na pastoran an kongregasyon nin Dios, na saiyang binakal paagi sa dugo kan saiyang sadiring Aki.” (Gibo 20:28) Iyo, an mga paraataman sa kongregasyon, o mga magurang, ninombrahan kan banal na espiritu. Sa anong paagi? Sa bagay na an nombradong mga magurang maninigong aboton an mga kuwalipikasyon na nasusurat sa ipinasabong na Biblia. (1 Timoteo 3:1-13; Tito 1:5-9) Puwede nindang paoswagon an mga kuwalipikasyon na iyan solamente sa tabang kan banal na espiritu. Saro pa, an grupo nin mga magurang na nagrerekomendar nin bagong magurang namimibi para sa paggiya kan banal na espiritu tanganing maaraman kun naaabot nia an mga kuwalipikasyon o dai. Asin an aktuwal na pagnombrar ginigibo sa pangangataman kan linahidan nin espiritung maimbod asin madonong na oripon.
Magiyahan kan Espiritu
12. Paano an espiritu makaiimpluwensia sa sato paagi sa Biblia?
12 Minimidbid kan mga Kristiano na an Banal na Kasuratan isinurat sa irarom kan impluwensia kan banal na espiritu. Kaya, maingat nindang sinisiyasat iyan para sa ipinasabong nin espiritung kadonongan, siring kan bago an Kristianong mga saksi ni Jehova. (Talinhaga 2:1-9) Binabasa ninda iyan, hinohorophorop iyan, asin tinotogotan iyan na giyahan an saindang buhay. (Salmo 1:1-3; 2 Timoteo 3:16) Sa siring tinatabangan sinda kan espiritu na ‘siyasaton an hararom na mga bagay nin Dios.’ (1 Corinto 2:10, 13; 3:19) An paggiya sa mga lingkod nin Dios sa paaging ini saro pang mahalagang aktibidad kan espiritu nin Dios sa panahon niato.
13, 14. Ano an ginamit ni Jesus sa pag-atubang sa mga problema sa kongregasyon, asin paano nia ginigibo an siring ngonyan?
13 Saro pa, sa libro nin Kapahayagan, an binuhay liwat na si Jesus nagpadara nin mga mensahe sa pitong kongregasyon sa Asia Minor. (Kapahayagan, kapitulo 2 asin 3) Ipinahayag nia sa sainda na siniyasat nia an mga kongregasyon asin naaraman an saindang espirituwal na kamugtakan. Nanompongan nia an iba na nagpapaheling nin marahay na halimbawa sa pagtubod. Sa iba, tinogotan kan kamagurangan an sektarianismo, inmoralidad, asin pagigin gabinhod na raoton an aripompon. An kongregasyon nin Sardis, apuwera sa nagkapirang maimbod na kalag, gadan sa espirituwal. (Kapahayagan 3:1, 4) Paano inatubang ni Jesus an mga problemang ini? Sa tabang kan banal na espiritu. Kan sinasadol an pitong kongregasyon, tinapos ni Jesus an mensahe sa lambang kamugtakan paagi kan ekspresyon na: “An igwa nin talinga magdangog sa sinasabi kan espiritu sa mga kongregasyon.”—Kapahayagan 2:7, 11, 17, 29; 3:6, 13, 22.
14 Ngonyan man, sinisiyasat ni Jesus an mga kongregasyon. Asin kun maaraman nia an mga problema, inaatubang nia man iyan giraray paagi sa banal na espiritu. An espiritu nakatatabang sato na direktang akoon asin mapangganahan an mga problema paagi sa satong pagbasa kan Biblia. An tabang puwede man na akoon paagi sa mga literatura sa Biblia na ipinublikar kan linahidan nin espiritung maimbod asin madonong na oripon. O puwede man na akoon iyan hale sa nombrado kan espiritung kamagurangan sa kongregasyon. Ano man an kamugtakan, baga man an hatol para sa mga indibiduwal o sa kongregasyon sa kabilogan, kinukuyog ta daw an mga tataramon ni Jesus na: “An igwa nin talinga magdangog sa sinasabi kan espiritu sa mga kongregasyon”?
An Espiritu Asin an Gibohon na Paghuhulit
15. Paano naghiro an espiritu ki Jesus kun manongod sa gibohon na paghuhulit?
15 Sa sarong okasyon kan naghulit si Jesus sa sinagoga sa Nazaret, ipinaheling nia an saro pang aktibidad kan espiritu. An rekord nagsasabi sato: “Binukasan nia an balumbon asin nakua an lugar na duman nasusurat: ‘An espiritu ni Jehova yaon sako, huli ta linahidan nia ako na magpahayag kan maogmang bareta sa mga dukha, isinugo nia ako na maghulit nin pagkabutas sa mga bihag asin nin pagpamuklat sa mga buta, na magbutas sa mga inapi.’ Dangan nagsabi sia sa sainda: ‘Ngonyan an kasuratan na ini na saindo pa sanang nadadangog naotob na.’” (Lucas 4:17, 18, 21; Isaias 61:1, 2) Iyo, linahidan si Jesus kan banal na espiritu tanganing ihulit an maogmang bareta.
16. Kan enot na siglo, paanong kalabot nanggad an banal na espiritu sa paghuhulit kan maogmang bareta?
16 Dai nahaloy bago sia magadan, ihinula ni Jesus an dakulang kampanya sa paghuhulit na gigibohon kan saiyang mga parasunod. Sinabi nia: “Sa gabos na nasyon an maogmang bareta kaipuhan na ikahulit nguna.” (Marcos 13:10) An mga tataramon na ini nagkaigwa nin enot na kaotoban kan enot na siglo, asin risa nanggad an kabtang kan banal na espiritu. An banal na espiritu an naggiya ki Felipe na hulitan an kapon na Etiope. Giniyahan kan banal na espiritu si Pedro pasiring ki Cornelio, asin an banal na espiritu an naggiya na si Pablo asin si Bernabe isugo bilang mga apostol hale sa Antioquia. Dangan, kan boot ni Pablo na maghulit sa Asia asin sa Bitinia, pinogolan sia kan banal na espiritu sa nagkapirang paagi. Boot nin Dios na an gibohon na pagpatotoo makaabot sa Europa.—Gibo 8:29; 10:19; 13:2; 16:6, 7.
17. Ngonyan, paano kalabot an banal na espiritu sa gibohon na paghuhulit?
17 Ngonyan, an banal na espiritu sa giraray kalabot nanggad sa gibohon na paghuhulit. Sa orog pang kaotoban kan Isaias 61:1, 2, linahidan kan espiritu ni Jehova an mga tugang ni Jesus na maghulit. Sa ultimong kaotoban kan Marcos 13:10, an mga linahidan na ini, sa tabang kan dakulang kadaklan, literal na naghulit kan maogmang bareta sa “gabos na nasyon.” (Kapahayagan 7:9) Asin tinabangan sinda gabos kan espiritu sa bagay na ini. Siring kan enot na siglo, iyan nagbukas nin bagong mga teritoryo asin giniyahan an pankagabsan na pag-oswag kan gibohon. Iyan nagpakosog sa mga indibiduwal, tinabangan sindang mapangganahan an pagigin masosopgon asin nagpaoswag kan saindang abilidad sa pagtotokdo. Saro pa, sinabi ni Jesus sa saiyang mga disipulo: “Dadarahon kamo sa atubang nin mga gobernador asin hade huli sako, sa pagpatotoo sainda asin sa mga nasyon. Minsan siring, kun kamo itao na ninda, dai kamo mahadit kun paano o kun ano an saindong itataram . . . , huli ta an nagtataram bako sanang kamo, kundi an espiritu kan saindong Ama na nagtataram paagi sa saindo.”—Mateo 10:18-20.
18, 19. Sa anong paagi an espiritu nakikiiba sa nobya sa pag-imbitar sa mga mahoyo an puso na “kumua kan tubig nin buhay na daing bayad”?
18 Sa libro nin Kapahayagan, idinoon giraray kan Biblia an pakikikabtang kan banal na espiritu sa gibohon na paghuhulit. Dian ibinareta ni Juan: “An espiritu asin an nobya padagos na nagsasabi: ‘Madia!’ Asin an siisay man na makadangog magsabi: ‘Madia!’ Asin an siisay man na napapaha dumolok; an siisay man na boot kumua kan tubig nin buhay na daing bayad.” (Kapahayagan 22:17) An nobya, na nagrerepresentar sa natatada kan 144,000 na anion pa sa daga, nag-iimbitar sa gabos na kumua kan tubig nin buhay na daing bayad. Alagad risahon, an banal na espiritu nagsasabi man “Madia!” Sa anong paagi?
19 Sa bagay na an mensaheng ihinuhulit kan grupong nobya—na tinatabangan kan dakulang kadaklan nin ibang karnero—hale sa Biblia, na isinurat sa irarom kan direktang impluwensia kan banal na espiritu. Asin an iyo man sanang espiritu an nagbukas kan puso asin isip kan grupong nobya tanganing masabotan an ipinasabong na Tataramon asin ipaliwanag iyan sa iba. An mga binautismohan bilang bagong mga disipulo ni Jesu-Cristo naoogmang kumua kan tubig nin buhay na daing bayad. Asin labi-labi an kaogmahan ninda na makikooperar sa espiritu asin sa nobya sa pagsasabing “Madia!” sa iba pa. Ngonyan, labing apat na milyon an nakikikabtang sa espiritu sa gibohon na ini.
Pamumuhay Oyon sa Satong Bautismo
20, 21. Paano kita makapamumuhay oyon sa satong bautismo sa ngaran kan banal na espiritu, asin paano niato maninigong mansayon an bautismong ini?
20 An bautismo sa ngaran kan banal na espiritu sarong pampublikong kapahayagan na minimidbid ta an banal na espiritu asin inaako an kabtang kaiyan sa mga katuyohan ni Jehova. Iyan nagpaparisa na makikikooperar kita sa espiritu, na dai naggigibo nin ano man na makaoolang sa paghiro kaiyan sa tahaw kan banwaan ni Jehova. Kaya, minimidbid asin nakikikooperar kita sa maimbod asin madonong na oripon. Nakikikooperar kita sa areglo nin kamagurangan sa kongregasyon. (Hebreo 13:7, 17; 1 Pedro 5:1-4) Namumuhay kita paagi sa espirituwal, bakong sa makalaman na kadonongan asin tinotogotan an espiritu na moldehon an satong personalidad, na ginigibo iyan na magin orog na siring ki Cristo. (Roma 13:14) Asin bilog na puso kitang nakikiiba sa espiritu asin sa nobya sa pagsasabing “Madia!” sa minilyon pa na tibaad maghimate.
21 Kanigoan kaseryosong bagay nanggad na mabautismohan ‘sa ngaran kan banal na espiritu’! Alagad, dakulaon nanggad na bendisyon an magigin resulta! Logod an bilang kan mababautismohan nin siring padagos na umoswag. Asin kita gabos logod padagos na mamuhay sa kahulogan kan bautismong iyan, mantang kita naglilingkod ki Jehova asin padagos na “magin malaad sa espiritu.”—Roma 12:11.
Ano an Nagigirumdoman Nindo Manongod sa Banal na Espiritu?
◻ Sa anong mga paagi aktibo an banal na espiritu kan Pentecostes 33 C.E.?
◻ Paano kita makapoprodusir kan mga bunga kan espiritu?
◻ Sa anong paagi ninombrahan kan banal na espiritu an mga magurang?
◻ Paano inaatubang ni Jesus an mga problema sa kongregasyon paagi sa banal na espiritu?
◻ Paanong kalabot nanggad an espiritu sa gibohon na paghuhulit?