An Regalo ni Jehova na Banal na Espiritu
“Gurano pa daw an Ama sa langit na dai magtao nin banal na espiritu sa mga naghahagad sa saiya!”—LUCAS 11:13.
1, 2. (a) Ano an ipinanuga ni Jesus manongod sa banal na espiritu, asin taano iyan ta tunay nanggad na nakararanga? (b) Ano an banal na espiritu?
KAN TIGHOLOG kan taon 32 C.E. mantang naghuhulit si Jesus kan maogmang bareta sa Judea, nagtaram sia sa saiyang mga disipulo manongod sa pagkamatinao ni Jehova. Naggamit sia nin nagkapirang mapuwersang ilustrasyon dangan nagtao kan pambihirang panuga na nagsasabi: “Kun kamo, minsan maraot, tataong magtao nin marahay na mga regalo sa saindong mga aki, gurano pa daw an Ama sa langit na dai magtao nin banal na espiritu sa mga naghahagad sa saiya!”—Lucas 11:13.
2 Nakararanga nanggad an mga tataramon na iyan! Mantang nagtatagal kita kan karibarawan kan huring mga aldaw kan kinaban na ini, inaatubang an pakikiiwal ni Satanas asin kan saiyang mga demonyo, asin nakikilaban sa satong sadiring makasalan na mga tendensia, tunay na nakaoogma sa puso na maaraman na pakokosogon kita nin Dios paagi sa saiyang espiritu. Iyo nanggad, imposible an maimbod na pagtagal na dai an tabang na iyan. Naeksperyensiahan na daw nindo an kapangyarihan kan espiritung ini, na iyo an sadiring puwersa aktiba nin Dios? Nasasabotan daw nindo kun gurano kadakula an ikatatabang kaiyan saindo? Ginagamit daw nindo iyan nin lubos?
An Kapangyarihan kan Banal na Espiritu
3, 4. Iilustrar an kapangyarihan kan banal na espiritu.
3 Konsideraron nguna an kapangyarihan kan banal na espiritu. Mag-isip na pabalik sa taon na 1954. Iyan an taon na pinaputok an bomba hidroheno sa Isla nin Bikini sa Timog Pasipiko. Pakatapos tolos na pumotok an bomba, an magayon na islang iyan natahoban nin dakulaon na bola nin kalayo asin nadanyaran nin grabe kan pagputok na an puwersa katimbang kan pagpaputok nin 15 milyones na tonelada nin TNT. Saen hale an gabos na mapanlaglag na puwersang iyan? Iyan resulta kan pagliwat na magin enerhiya an sadit sanang kabtang nin uranium asin hidroheno na minakompuwesto sa pinakasentro kan bomba. Alagad, kumusta kun gibohon kan mga sientista an kabaliktaran kan ginibo ninda sa Bikini? Halimbawa tiponon ninda an gabos na mainit na enerhiyang iyan asin gibohon iyan na nagkapirang libra nin uranium asin hidroheno. Iyan magigin pambihira nanggad na nahaman! Alagad, si Jehova naggibo nin kaagid kaiyan alagad sa mas dakulang sokol kan “sa kapinonan linalang [nia] an kalangitan asin daga.”—Genesis 1:1.
4 Si Jehova igwa nin dakulang deposito nin dinamikong enerhiya. (Isaias 40:26) Sa paglalang, siertong ginamit nia an iba sa enerhiyang ini kan pormahon nia an gabos na materya na minakompuwesto sa uniberso. Ano an ginamit nia sa gibohon na paglalang na ini? An banal na espiritu. Mababasa niato: “Huli sa tataramon ni Jehova nagkaharaman an kalangitan, asin an gabos nindang hukbo paagi sa espiritu kan saiyang ngoso.” (Salmo 33:6) Asin an rekord kan Genesis manongod sa paglalang nagsasabi: “An puwersa aktiba [banal na espiritu] nin Dios naghihiro sa ibabaw kan katubigan.” (Genesis 1:2) Kanigoan nanggad kamakapangyarihan an banal na espiritu!
Milagrosong mga Gibo
5. Sa anong makapangyarihan na mga paagi naghihiro an banal na espiritu?
5 An banal na espiritu naghihiro pa man giraray sa makapangyarihan na mga paagi. Iyan naggigiya asin nagdidirehir sa langitnon na organisasyon ni Jehova. (Ezequiel 1:20, 21) Siring kan enerhiyang pinaluwas kan bomba hidroheno, puwede iyan gamiton sa mapanlaglag na paagi tanganing gibohon an paghokom sa mga kaiwal ni Jehova, alagad iyan naghiro man sa iba pang paagi na nakapupukaw sato na magngalas.—Isaias 11:15; 30:27, 28; 40:7, 8; 2 Tesalonica 2:8.
6. Paano tinabangan kan banal na espiritu si Moises asin an mga aki ni Israel sa saindang mga kamugtakan sa Ehipto?
6 Halimbawa, kan mga 1513 B.C.E., isinugo ni Jehova si Moises na umatubang ki Faraon kan Ehipto asin hagadon an katalingkasan kan mga aki nin Israel. Sa nakaaging 40 taon, si Moises nagin pastor sa Midian, kaya taano ta dapat na maghinanyog si Faraon sa sarong pastor? Huli ta si Moises napaduman sa ngaran kan solamenteng tunay na Dios, si Jehova. Tanganing patunayan ini, pinangyari ni Jehova na gumibo sia nin mga milagro. Makangangalas nanggad ini kaya ngani maski an mga saserdoteng Ehipcio napuwersang akoon: “Moro ini nin Dios!”a (Exodo 8:19) Nagpadara si Jehova nin sampulong damat sa Ehipto, na an pangultimo nagpuwersa ki Faraon na togotan an banwaan nin Dios na humale sa Ehipto. Kan may katagasan na sinundan sinda ni Faraon kaiba an saiyang hukbo, an mga Israelitas nakaligtas kan milagrosong binuksan an sarong dalan sa Dagat na Pula. Sinundan sinda kan hukbo nin Ehipto asin nagkarulunod sa dagat.—Isaias 63:11-14; Haggeo 2:4, 5.
7. (a) Ano an nagkapirang rason kun taano an banal na espiritu ta naggibo nin mga milagro? (b) Maski ngani dai nang mga milagrong pinangyayari kan banal na espiritu, taano ta nakararanga an rekord kaiyan sa Biblia?
7 Iyo, si Jehova paagi sa saiyang espiritu naggibo nin makapangyarihan na mga milagro sa kapakanan kan mga Israelitas kan panahon ni Moises, asin sa ibang panahon man. Ano an intension kan mga milagrong ini? Iyan nagpaoswag kan mga katuyohan ni Jehova, nagpangyaring mamidbid an saiyang ngaran, asin nagpaheling kan saiyang kapangyarihan. Asin kun minsan, siring ki Moises, iyan nakakokombensir na nagpatotoo na an indibiduwal may suporta ni Jehova. (Exodo 4:1-9; 9:14-16) Alagad, bihira an mga milagrong pinangyari kan banal na espiritu sa bilog na kasaysayan.b Posibleng an kadaklan na indibiduwal na nabuhay kan panahon nin Biblia dai man lamang nakaheling nin saro, asin ngonyan dai na iyan nangyayari. Minsan siring, mantang kita nakikilaban sa mga problema na garo dai mapapangganahan, bako daw nakararanga na maaraman na kun humagad kita ki Jehova sa pagtubod, tatawan nia kita kan iyo man sanang espiritu na nagtabang ki Moises sa atubang ni Faraon asin nagbukas kan dalan para sa mga Israelitas sa Dagat na Pula?—Mateo 17:20.
Ipinasabong na mga Kasuratan
8. Ano an katongdan kan banal na espiritu sa pagtao kan Sampulong Togon?
8 Pakatapos na iligtas sa Ehipto, pinangenotan ni Moises an mga Israelitas sa Bukid nin Sinai, na duman nakipagtipan sainda si Jehova asin itinao sainda an saiyang Pagboot. An sentral na kabtang kan Pagboot na itinao paagi ki Moises iyo an Sampulong Togon, asin an orihinal na mga kopya kaini inukit sa mga tablang gapo. Paano? Paagi kan banal na espiritu. Sinasabi kan Biblia: “Ngonyan kan [si Jehova] matapos na makipag-olay sa saiya sa Bukid nin Sinai itinao nia ki Moises an duwang tabla kan Pagpatotoo, mga tablang gapo na sinuratan kan moro nin Dios.”—Exodo 31:18; 34:1.
9, 10. Paano aktibo an banal na espiritu sa pagsurat kan Hebreong Kasuratan, asin paano ini maheheling sa mga ekspresyon na ginamit kan mga disipulo ni Jesus?
9 Dugang pa sa Sampulong Togon, nagtao si Jehova sa Israel paagi sa saiyang espiritu nin ginatos na pagboot asin regulasyon tanganing giyahan an buhay kan maimbod na mga lalaki asin babae, asin orog pa an madatong. Mga siglo pakalihis kan panahon ni Moises, nagpatotoo an mga Levita sa pampublikong pamibi ki Jehova: “Tinios mo [an mga Israelitas] sa dakol na taon asin nagpatotoo tumang sa sainda paagi kan saimong espiritu asin paagi kan saimong mga propeta.” (Nehemias 9:5, 30) Irinekord an dakol na ipinasabong na hula na itinaram kan mga propetang idto. Saro pa, an banal na espiritu an nagpahiro sa maimbod na mga lalaki na isurat an banal na mga kasaysayan asin odok sa boot na mga awit nin pag-omaw.
10 An mga kasuratan na ini an sinambit ni Pablo kan sabihon nia: “An gabos na Kasuratan ipinasabong nin Dios.” (2 Timoteo 3:16; 2 Samuel 23:2; 2 Pedro 1:20, 21) Iyo nanggad, sa pagkotar sa mga kasuratan na ini, an enot na siglong mga disipulo ni Jesus parateng ginagamit an mga ekspresyon na siring kan “an banal na espiritu nagtaram . . . paagi sa ngoso ni David,” “angay an pakasabi kan banal na espiritu paagi ki Isaias,” o sa pagsabi sanang “an banal na espiritu nagsasabi.” (Gibo 1:16; 4:25; 28:25, 26; Hebreo 3:7) Kanigoan nanggad na bendisyon na an iyo man sanang banal na espiritu na nakaimpluwensia sa pagsurat kan Banal na Kasuratan an nag-ingat kaiyan tanganing giyahan asin rangahon kita kaiyan ngonyan!—1 Pedro 1:25.
Pagsarig sa Banal na Espiritu
11. Anong aktibidad kan espiritu an naheling manongod sa pagpatindog kan tabernakulo?
11 Mantang an mga Israelitas nagkakampo sa pamitisan kan Bukid nin Sinai, pinagbotan sinda ni Jehova na magpatindog nin tabernakulo bilang sentro para sa tunay na pagsamba. Paano ninda ini magigibo? “Nagsabi si Moises sa mga aki ni Israel: ‘Uya, inapod sa ngaran ni Jehova si Bezalel na aki ni Uri na aki ni Hur kan tribo ni Juda. Asin pinano nia sia kan espiritu nin Dios sa kadonongan, sa pakasabot asin sa kaaraman patin sa gabos na klase nin pagpanday.’” (Exodo 35:30, 31) An banal na espiritu nagdugang nin puwersa sa arin man na natural na abilidad ni Bezalel, asin nahimo niang mapangganang pangatamanan an pagpatindog kan pambihirang istrukturang iyan.
12. Paano pinakosog kan espiritu an mga indibiduwal sa pambihirang mga paagi pakalihis kan panahon ni Moises?
12 Pag-abot kan panahon, an espiritu ni Jehova naghiro ki Samson, na nagtao saiya nin labaw sa tawong kosog na nagpangyari saiyang iligtas an Israel sa mga Filisteo. (Hokom 14:5-7, 9; 15:14-16; 16:28-30) Pag-abot pa kan panahon, si Salomon tinawan nin espesyal na kadonongan bilang hade kan piniling banwaan nin Dios. (2 Cronica 1:12, 13) Sa pamamahala nia, gumininhawa an Israel orog kasuarin man, asin an maogmang kamugtakan kaiyan nagin arogan para sa mga bendisyon na kakamtan kan banwaan nin Dios sa Milenyal na Pamamahala ni Jesu-Cristo, an Orog na Dakulang Salomon.—1 Hade 4:20, 25, 29-34; Isaias 2:3, 4; 11:1, 2; Mateo 12:42.
13. Paano an rekord kan pagpakosog kan espiritu ki Bezalel, Samson, asin Salomon nakapakokosog sa sato ngonyan?
13 Dakulaon nanggad na bendisyon an pinangyari ni Jehova na akoon niato an iyo man sanang espiritu! Kun hinohona niatong dai mahihimong otobon an sarong asignasyon o an pakikabtang sa gibohon na paghuhulit, puwede niatong hagadon ki Jehova na tawan kita kan iyo man sanang espiritu na itinao nia ki Bezalel. Kun may helang kita o nagtitios nin paglamag, an iyo man sanang espiritu na nagtao ki Samson nin pambihirang kosog an magpaparigon sa sato—maski ngani siyempre pa bakong sa milagrosong paagi. Asin kun napaaatubang kita sa masakit na mga problema o kaipuhan na gumibo nin mahalagang mga desisyon, puwede niatong hagadon ki Jehova, na nagtao ki Salomon nin labi sa ordinaryong kadonongan, na tabangan kitang humirong may kadonongan. Sa siring, arog ki Pablo masasabi niato: “Igwa ako kan kosog para sa gabos na bagay huli sa saiya na nagtatao nin kapangyarihan sa sako.” (Filipos 4:13) Asin an panuga ni Santiago maaplikar sa sato: “Kun an siisay man saindo kulang nin kadonongan, padagos siang maghagad sa Dios, huli ta sia abundang nagtatao sa gabos na dai nin pagbasol; asin iyan itatao saiya.”—Santiago 1:5.
14. Sairisay, kan suanoy na mga panahon asin ngonyan an tinabangan kan banal na espiritu?
14 An espiritu ni Jehova yaon man ki Moises sa saiyang gibohon na paghokom sa nasyon. Kan nombrahan an iba na tabangan si Moises, sinabi ni Jehova: “Kaipuhan na kuanon ko an iba sa espiritu na nasa saimo asin ibugtak iyan sa sainda, asin tutuwangan ka ninda sa pagpasan kan banwaan tanganing dai mo iyan pagdarahon, na ika sana.” (Bilang 11:17) Kaya, an mga lalaking idto dai naghiro oyon sa saindang sadiring kosog. Tinabangan sinda kan banal na espiritu. Mababasa ta na sa suminunod pang mga pangyayari, an espiritu ni Jehova nasa iba pang indibiduwal. (Hokom 3:10, 11; 11:29) Kan linahidan ni Samuel si David bilang hade sa ngapit kan Israel, sinasabi kan rekord: “Kinua ni Samuel an songoy kan lana asin linahidan nia sia sa tahaw kan saiyang mga tugang. Asin an espiritu ni Jehova nagpoon na humiro ki David poon kan aldaw na idto.” (1 Samuel 16:13) Idtong may magabat na mga paninimbagan ngonyan—sa pamilya, kongregasyon, o sa organisasyon—puwedeng maranga na maaraman na an espiritu nin Dios nagtatabang pa man giraray sa saiyang mga lingkod sa pangangataman ninda sa saindang mga obligasyon.
15. Sa anong paagi pinakosog kan banal na espiritu an organisasyon ni Jehova (a) kan panahon ni Haggeo asin Zacarias? asin (b) ngonyan?
15 Mga sangribong taon pakatapos kan panahon ni Moises, an mga maimbod sa tahaw kan mga aki ni Israel nagbalik sa Jerusalem hale sa Babilonya na may obligasyon na ipatindog liwat an templo. (Esdras 1:1-4; Jeremias 25:12; 29:14) Alagad, naglataw an masakit na mga olang, asin nadisganar sinda sa laog nin dakol na taon. Sa katapustapusi, isinugo ni Jehova an mga propetang si Haggeo asin Zacarias tanganing pakosogon an mga Judio na dai manarig sa saindang sadiring kosog. Alagad paano mahahaman an gibohon? “‘Bakong paagi sa puwersa militar, ni sa kapangyarihan, kundi paagi sa sakong espiritu,’ nagsabi si Jehova nin mga hukbo.” (Zacarias 4:6) Asin sa tabang kan espiritu nin Dios, napatindog an templo. Siring man an banwaan nin Dios ngonyan kadakol nin nahaman. An paghuhulit kan maogmang bareta nakalakop sa bilog na kinaban. Minilyon na indibiduwal an tinotokdoan sa katotoohan asin katanosan. Inorganisar an mga kombension. Ipinatindog an mga Kingdom Hall asin mga sangang opisina. An kadaklan kaini ginibo sa atubang nin mapait na pagtumang. Alagad an mga Saksi ni Jehova dai nadidisganar, sa pakaaram na an lambang bagay na nagibo ninda, bakong paagi sa puwersa militar, ni sa puwersa nin tawo, kundi paagi sa espiritu nin Dios.
An Espiritu nin Dios kan Enot na Siglo
16. Ano an eksperyensia kan bago an Kristianong mga lingkod ni Jehova sa aktibidad kan espiritu nin Dios?
16 Siring kan naheling na niato, an bago an Kristianong mga lingkod nin Dios nakaaram nanggad kan kapangyarihan kan espiritu nin Dios. Nanarig sinda dian tanganing tabangan sinda na otobon an magabat na mga obligasyon asin gibohon an kabotan nin Dios. Aram man ninda na an Pagboot asin an iba pang banal na kasuratan ipinasabong, isinurat sa irarom kan impluwensia kan espiritu ni Jehova, asin sa siring iyan an ‘Tataramon nin Dios.’ (Salmo 119:105) Alagad, kumusta sa panahon Kristiano?
17, 18. Ano an nagkapirang milagrosong kapahayagan kan espiritu kan panahon Kristiano, asin sa anong katuyohan?
17 An enot na siglo kan satong Komon na Kapanahonan nakaheling man kan pambihirang mga aktibidad kan espiritu nin Dios. Yaon an ipinasabong nin espiritu na paghula. (1 Corinto 14:1, 3) Bilang kaotoban kan panuga ni Jesus na an banal na espiritu an magpapagirumdom sa saiyang mga disipulo kan gabos na bagay na sinabi nia asin magtotokdo sainda kan orog pang kabtang kan katotoohan, nagkapirang libro an isinurat sa irarom kan impluwensia kan banal na espiritu. (Juan 14:26; 15:26, 27; 16:12, 13) Asin yaon man an mga milagro, siring kan ipaliliwanag pang lubos sa satong masunod na artikulo. Iyo nanggad, an enot na siglo pinangyari kan sarong pambihirang milagro. Kan mga taon 2 B.C.E., sarong espesyal na omboy an namundag, asin bilang tanda, an saiyang hoben na ina kaipuhan na sarong birhen. Paano iyan mangyayari? Paagi sa banal na espiritu. An rekord nagsasabi: “An pagkamundag ni Jesu-Cristo siring kaini. Kan si Maria na saiyang ina ipinanugang magpaagom ki Jose, nanompongan siang nangingidam paagi sa banal na espiritu bago sinda pinagsaro.”—Mateo 1:18; Lucas 1:35, 36.
18 Kan nagdakula si Jesus, nagpaluwas sia nin mga demonyo, nagpaomay sa mga may helang, nagbuhay pa ngani nin gadan paagi sa kapangyarihan kan banal na espiritu. An iba niang parasunod naggibo man nin mga milagro asin makapangyarihan na mga gibo. An espesyal na mga abilidad na ini mga regalo kan espiritu. Ano an katuyohan kaiyan? Siring kan nagibo kan naenot na mga milagro, pinaoswag kaiyan an mga katuyohan nin Dios asin naghayag kan saiyang kapangyarihan. Saro pa, iyan nagpaheling kan pagigin tunay kan paghihingako ni Jesus na sia isinugo hale sa Dios; asin pakatapos, iyan nagpatunay na an enot na siglong kongregasyon Kristiano an piniling banwaan nin Dios.—Mateo 11:2-6; Juan 16:8; Gibo 2:22; 1 Corinto 12:4-11; Hebreo 2:4; 1 Pedro 2:9.
19. Paano napakokosog an satong pagtubod paagi sa rekord kan Biblia manongod sa mga milagro ni Jesus asin kan saiyang mga apostol?
19 Alagad, sinabi ni apostol Pablo na an siring na milagrosong mga kapahayagan kan espiritu nanonongod sa pagigin aki kan kongregasyon asin maagi sana, kaya ngonyan dai na kita nakaheheling nin siring na mga milagro na pinangyayari kan banal na espiritu. (1 Corinto 13:8-11) Saro pa, an mga milagrong ginibo ni Jesus asin kan saiyang mga apostol orog pa kisa sa makasaysayan na interes. Iyan nagpapakosog sa satong pagtubod sa panuga nin Dios na an helang asin kagadanan dai na mangyayari sa irarom kan pamamahala ni Jesus sa bagong kinaban.—Isaias 25:6-8; 33:24; 65:20-24.
Pakinabang Huli sa Banal na Espiritu nin Dios
20, 21. Paano niato mismo makakamtan an probisyon kan banal na espiritu?
20 Kanigoan nanggad kamakapangyarihan na puwersa an espiritung ini! Alagad paano iyan makakamtan kan mga Kristiano mismo ngonyan? Enot, sinabi ni Jesus na maninigo niatong hagadon iyan, kaya taano ta dai gibohon iyan? Mamibi ki Jehova na tawan kamo kan makangangalas na regalong ini bako sanang sa mga panahon nin tension kundi sa gabos na okasyon. Dugang pa, basahon an Biblia tanganing an banal na espiritu makapagtaram sa saindo. (Ikomparar an Hebreo 3:7.) Horophoropon an binabasa nindo asin iaplikar iyan tanganing an banal na espiritu makaimpluwensia sa saindong buhay. (Salmo 1:1-3) Saro pa, makiiba—bilang indibiduwal, sa mga kongregasyon, asin sa mga asamblea—sa iba na nananarig sa espiritu nin Dios. Mayamanon nanggad na pinaririgon kan banal na espiritu an mga nag-oomaw sa saindang Dios “sa nagkakasararong mga kadaklan”!—Salmo 68:26.
21 Bako daw si Jehova an matinaong Dios? Sinabi niang hagadon ta sana an banal na espiritu asin itatao nia iyan sa sato. Kamangmangan nanggad na manarig sa satong sadiring kadonongan asin kosog mantang an siring na makapangyarihan na tabang puwede niatong makamtan! Alagad, may iba pang bagay na may koneksion sa espiritu nin Dios na nakaaapektar sato bilang mga Kristiano, asin kokonsideraron an mga ini sa masunod na artikulo.
[Mga Nota sa Ibaba]
a An ekspresyon na “moro nin Dios” parateng nanonongod sa banal na espiritu.—Ikomparar an Lucas 11:20 asin Mateo 12:28.
b An mayoriya kan mga milagrong irinekord sa Biblia nangyari durante kan panahon ni Moises asin Josue, Elias asin Eliseo, asin ni Jesus asin kan saiyang mga apostol.
Masisimbag daw Nindo an Minasunod na mga Hapot?
◻ Paano linalang ni Jehova an gabos na materya sa uniberso?
◻ Ano an nagkapirang paagi na dian naghiro an banal na espiritu kan bago an Kristianong mga panahon?
◻ Paano nakararanga sa sato ngonyan na maaraman an ginibo kan banal na espiritu kan suanoy na mga panahon?
◻ Paano niato mismo makakamtan an probisyon kan banal na espiritu?
[Ritrato sa pahina 16]
An espiritu na nagtao ki Samson nin orog sa tawong kosog makatatao sa sato nin puwersa sa gabos na bagay