Pag-aatubang kan Maogmang Bareta—Dara an mga Magasin sa Parateng Kinokobrehan na Teritoryo
1 Sa Gibo 8:25 mababasa niato na si Pedro asin si Juan nagpatotoo nin lubos sa Samaria dangan nagpahayag kan “maogmang bareta sa dakol na baryo.” Ngonyan, kita man maninigong magpatotoo nin lubos sa satong teritoryo.
2 Dakol na kongregasyon an parateng kinokobrehan an saindang teritoryo. Pero dai kita maninigong magin negatibo manongod kaini. Sa kada luwas kan An Torrengbantayan asin Magmata!, perming may bagong mga tema na puwede tang ihiras sa mga tawo.
MAKIPAG-OLAY SA MGA TAWO
3 Parate tang ginagamit an haralipot na gayong mga pag-aatubang kan magasin tanganing lakop na ikawaras an mga magasin. Alagad, kun naghuhulit sa parateng kinokobrehan na mga teritoryo, magigin marahay na magkaigwa nin orog na panahon sa pakikipag-olay sa mga kagharong. Maski an saradit na aki puwedeng isaysay an nakainteres sainda sa artikulo. Paano niato ini magigibo? Mahalagang magin pamilyar sa mga artikulo sa magasin. Kun binabasa an mga magasin, aramon kun ano an makaaakit sa mga tawo sa saindong teritoryo. Dangan, bago lumuwas sa paglilingkod, pilion an mga temang itatampok nindo. Gamiton an saro sa magagayon na mga tema sa magasin bilang pinakasentrong punto sa saindong introduksion. Aramon an punto-de-vista kan kagharong sa makikatood na pakikipag-olay.
4 An pagkakaigwa nin panahon sa pakikipag-olay sa mga tawo makatatabang sato na maaraman kun talagang interesado an tawo. Sa paaging ini ikawawalat ta an mga magasin sa mga matao nin panahon na basahon iyan.
ISAISIP AN SATONG KATUYOHAN
5 An satong katuyohan sa pagharongharong bako sanang tanganing maaraman kun pirang magasin o libro an ikawawaras ta. An satong pagmawot iyo an pagtabang sa iba na makaabot sa tamang kaaraman kan katotoohan. Si Pedro asin si Juan nagpahayag kan tataramon ni Jehova sa mga Samaritano nin lubos, asin kita man nagmamawot na gumamit nin kinakaipuhan na panahon tanganing siertohon na an mga tawo sa satong teritoryo natatawan nin oportunidad na maghimate sa katotoohan. Isurat an ngaran kan mga nagpaheling nin tunay na interes asin magbugtak nin pundasyon para sa pag-adal sa Biblia kun posible.
6 Sa epektibong paggamit kan mga magasin bilang basihan kan satong mga pakikipag-olay, magigibo ta an katuyohan na ini. Maninigo kitang mamibi para sa sato asin sa iba na tawan logod kita nin “kakayahan na magtaram . . . sa pagpahayag kan banal na hilom kan maogmang bareta . . . na may kapusoan.”—Efe. 6:18-20.