Pag-aatubang kan Maogmang Bareta—Dara an mga Magasin
1 An Eclesiastes 12:12 nagsasabi, “An paggibo nin mga libro mayo nin katapusan.” An mga tataramon na iyan totoo ngonyan mantang bilyon-bilyon nin inimprintang materyal an nagkokompetensia para sa atension kan mga parabasa. Nag-aatubang ini nin angat sa mga parahayag kan maogmang bareta kan Kahadean. Paano niato puwedeng makombensir an mga tawo na an An Torrengbantayan asin Magmata! an pinakamahalagang mga magasin na ipinublikar ngonyan?
MAHALAGANG MGA MAGASIN
2 Marahay na siyasaton an sato mismong kaisipan sa mga magasin. Minamansay daw nindo an mga magasin na mahalaga, na galagang hinahalat an lambang bagong isyu? Nag-iiskedyul daw kamo nin panahon tanganing basahon an gabos na artikulo? Kun personal niatong inaapresyar an mga magasin, an satong entusiasmo asin odok sa boot na marigon na pagtubod makatatabang sato na mapangganang ialok an mga ini sa iba.
3 An mga tawo sa satong teritoryo nangangaipo kan mahalagang impormasyon na nasa laog kan An Torrengbantayan asin Magmata! siring man sa sato. Sa Setyembre 15, 1989, na Watchtower, an temang “What Must We Do to Be Saved?” nagtao nin praktikal na panpakosog manongod sa satong paggawe asin paagi nin buhay. An mga artikulo kan Awake! sa dai pa nahahaloy nagpaliwanag manongod sa salang pangangataman kan tawo sa kapalibotan kan daga asin sa mga panuga nin Dios para sa pagbabalik kan Paraiso sa daga. Abundang espirituwal na pagkakan nanggad an itinatao kan mga magasin na ini tanganing pukawon an pakamate kan mga tawo manongod kan saindang espirituwal na mga pangangaipo!
ARAMON AN SAINDONG MGA MAGASIN
4 An pinakamarahay na paagi tanganing makombensir an mga tawo na makikinabang sinda sa pagbasa kan mga magasin iyo an pagpaheling sainda nin espisipikong punto na may koneksion sainda. Nangangaipo ini na kita magin pamilyar na gayo sa mga magasin asin iandam ini nin patienot. Mantang binabasa nindo mismo an mga ini, magin alisto sa mga puntong puwede nindong gamiton sa ministeryo. Taano ta dai tandaan an mga puntong ini sa saindong personal na mga kopya asin dangan repasohon an saindong mga nota kun nag-aandam kamo para sa paglilingkod sa langtad dara an isyung iyan?
5 Sa saindong personal na pagbasa, hapoton an saindong sadiri: Igwa daw nin mga artikulo na partikularmenteng maakit sa mga doktor, abogado, o mga maestro? Puwedeng makatabang na gayo an pagkakaigwa nin mga listahan kan mga indibiduwal na mawot nindong alokan kan mga magasin na ini.
6 Pakatapos magtaram manongod sa paggibo nin kadakol na libro, an Eclesiastes 12:12 nagsasabi na “an dakulang kaimbodan sa sainda nakapapagal sa laman.” An pagbasa nin kinabanon na mga literatura puwedeng magin nakapapagal huli ta dai ini nagtatao nin espirituwal na kaginhawahan. Sa kabaliktaran, makakapasalamat na gayo kita sa pagwaras kan Torrengbantayan asin Magmata!, na nagtataong onra ki Jehova asin nagbabalangibog kan saiyang Kahadean!—Tal. 3:9.