Binabasa daw Nindo an mga Magasin?
1 An sarong mag-agom na misyonero sa Aprika siring kaini an pagkasabi manongod sa satong mga magasin: “An Torrengbantayan nakatatabang sa samo na magdanay na alisto sa espirituwal sa samong teritoryo. Nakakukua kami nin pagparigon sa boot asin pagpakosog sa kada luwas.” Igwa daw kamo nin kaparehong hararom na pagpahalaga sa satong mga babasahon? Asin gustong-gusto man daw nindong basahon iyan?
2 Dakol na panahon an kaipuhan sa pag-andam kan mga artikulo sa magasin na puedeng basahon sa laog sana nin pirang minuto. Sa pakaaram kaini, paaagihan sana daw nindo kan saindong mata an mga artikulo, hehelingon an mga retrato, o paminsanminsan babasahon an artikulo na nakakua kan saindong atension? Madonong kita kun orog pa dian an ginigibo niato. Maninigo kitang magtao nin panahon na basahon asin analisaron an gabos na artikulo sa kada luwas kan satong mga magasin. An Torrengbantayan an pangenot na babasahon niato para sa napapanahon na espirituwal na kakanon. An Awake! igwa nin interesante asin nakapagtotokdong mga artikulo manongod sa laen-laen na tema. An satong nanonodan paagi sa pagbasa kan mga magasin na ini bako sanang nagpapakosog sa sato sa espirituwal kundi iinaandam man kita para sa mas epektibong pakikikabtang sa ministeryo. Huli sa sato mismong pagigin fiel na parabasa, kita magigin entusiastiko sa pag-alok kan mga magasin sa iba.
3 Kun Paano Paooswagon an Ugale sa Pagbasa: Puede daw kamong gumibo nin orog pa tanganing makapadagos sa saindong pagbasa kan mga magasin? Uya an duwang suhestion na epektibo para sa dakol. (1) Gumibo nin regular na iskedyul sa pagbasa. Paagi sana sa pagtagama nin 10 o 15 minutos kada aldaw sa pagbasa, mangalas kamo kun gurano kadakol kan mababasa nindo sa laog nin sarong semana. (2) Magkaigwa nin sistema na matandaan an binasa. Puede gayod nindong markahan nin tsek an kapinonan kan kada artikulo na binabasa nindo. Kun mayo kaini, puede nindong malipasan na basahon an nagkapirang artikulo o an bilog na magasin pa ngani. Importanteng gumibo nin kaugalean sa pagbasa na epektibo para sa saindo asin sunodon iyan.—Ikomparar an Filipos 3:16.
4 “An fiel asin madonong na oripon” madonong na naghiro tanganing tawan nin atension an nagbabagong mga panahon paagi sa pagpublikar nin mga artikulo na nagpapaliwanag kan tunay na mga pangangaipo nin mga tawo. (Mat. 24:45) Totoo na napahiro kan mga magasin an satong buhay. An rikas kan satong espirituwal na pag-oswag, sa dakulang kabtang, dinedeterminaran kan kualidad kan satong teokratikong ugale sa pagbasa. May nakatagamang mayaman na espirituwal na bendisyon para sa mga nagtatao nin panahon na basahon an gabos na magasin.