An Torrengbantayan Asin Awake!—Napapanahon na mga Magasin nin Katotoohan
“Tinubos mo ako, O Jehova na Dios nin katotoohan.”—SALMO 31:5.
1, 2. (a) Ano an namatean nin sarong tugang na babae dapit sa nabasa nia sa The Watchtower? (b) Ano an mga hapot manongod sa satong mga magasin?
“SALAMAT na marhay saindo,” an surat nin sarong Kristianang tugang, “sa magayonon na impormasyon sa artikulo sa The Watchtower na ‘You Can Find Comfort in Times of Distress.’a An kadaklan sa mga puntong pinalataw nindo eksaktong iyo an mga pagmate na dapat kong atubangon; garo baga an artikulo direktang isinurat sa sako. Kan enot kong binasa iyan, may mga luha ako sa sakong mga mata. Nakaoogma nanggad na marealisar na igwang saro na nakasasabot kan sakong namamatean! Nagpapasalamat akong marhay na magin saro sa mga Saksi ni Jehova. Saen pa daw kita makakukua nin mga panuga nin buhay na daing katapusan sa Paraiso sa harani nang ngapit asin, ngonyan, kaginhawahan sa satuyang mga kalag! Salamat saindo. Sarong milyon na salamat saindo.”
2 Nakamate na daw kamo nin siring? Nangyari na daw na garo baga igwang sarong bagay sa An Torrengbantayan o sa kapadis na magasin kaiyan na Awake! na espesyalmenteng isinurat para sa saindo? Anong bagay dapit sa satong mga magasin an nakaaakit sa puso nin mga tawo? Paano ta matatabangan an iba na makinabang sa nagliligtas-buhay na mensaheng laog kaiyan?—1 Timoteo 4:16.
Mga Magasin na Nagsusuportar sa Katotoohan
3. Huli sa anong marahay na dahelan na an Torrengbantayan asin Awake! nakatudok sa puso nin dakol na parabasa?
3 Si Jehova an “Dios nin katotoohan.” (Salmo 31:5) An saiyang Tataramon, an Biblia, libro nin katotoohan. (Juan 17:17) An mga tawong sadiosan an puso naghihimate sa katotoohan. (Ikomparar an Juan 4:23, 24.) An sarong dahelan na an Torrengbantayan asin Awake! nakatudok sa puso nin minilyon na parabasa iyo na iyan mga magasin nin integridad asin katotoohan. An totoo, huli sa isyu nin kaimbodan sa katotoohan nin Biblia na an Torrengbantayan pinonan na ipublikar.
4, 5. (a) Ano an mga kamugtakan na naggiya sa pagpublikar ni C. T. Russell kan Watch Tower? (b) Paano an magasin na Torrengbantayan ginamit kan “maimbod asin madonong na oripon”?
4 Kan 1876, si Charles T. Russell nagin kaasosyar ni Nelson H. Barbour, na taga-Rochester, Nueva York. Si Russell tuminao nin mga pondo tanganing maponan liwat an pag-imprenta kan relihiyosong magasin ni Barbour na Herald of the Morning, na si Barbour an pangenot na editor asin si Russell an katabang na editor. Pero pakalihis nin mga saro may kabangang taon, sa Agosto 1878 na luwas kan Herald, si Barbour suminurat nin sarong artikulo na nagpainda sa nakatutubos na halaga kan kagadanan ni Cristo. Si Russell, na mas hoben nin haros 30 taon ki Barbour, nagsimbag paagi sa sarong artikulo sa suminunod mismong luwas na nagsuportar sa pantubos, na saiyang sinambit bilang “saro sa pinakaimportanteng mga katokdoan kan Tataramon nin Dios.” (Mateo 20:28) Pakatapos nin paorootrong mga paghihingoa na makipagrasonan ki Barbour basado sa Kasuratan, si Russell sa katapustapusi nagdesisyon na putolon an gabos na koneksion sa Herald. Magpoon sa Hunyo 1879 luwas kan magasin na iyan, an ngaran ni Russell dai na naheling bilang katabang na editor. Pakalihis nin sarong bulan, an 27 anyos na si Russell nagpoon na magpublikar kan Zion’s Watch Tower and Herald of Christ’s Presence (ngonyan midbid bilang An Torrengbantayan Nagpapahayag kan Kahadean ni Jehova), na poon kaidto sinuportaran an katotoohan sa Kasuratan, arog baga kan pantubos.
5 Sa nakaaging 114 taon, an Torrengbantayan, arog nin ekspertong abogado, namidbid bilang paradepensa kan katotoohan asin doktrina sa Biblia. Huli kaiyan, nakamtan kaiyan an pagtitiwala nin minilyon na mapag-apresyar na parabasa. Sagkod ngonyan mapuwersang sinusuportaran kaiyan an pantubos. (Halimbawa, helingon an luwas kan Marso 1, 1991 saka Ingles na Pebrero 15, 1991.) Asin iyan nagpapadagos bilang pangenot na instrumento kan “maimbod asin madonong na oripon” asin kan Namamahalang Grupo kaiyan sa pagpaisi kan natindog nang Kahadean ni Jehova asin sa pagtao nin espirituwal na kakanon “sa igong panahon.”—Mateo 24:14, 45.
6, 7. Ano an isinabing katuyohan kan The Golden Age, asin ano an nagpapaheling na an mapag-isip na mga tawo naghimate sa mensahe kaiyan?
6 Kumusta man an magasin na Awake!? Poon sa kapinonan kaiyan, an Awake! sinuportaran man an katotoohan. Inapod kan enot na The Golden Age, an magasin na ini dinisenyo na panwaras sa publiko. Mapadapit sa katuyohan kaiyan, an enot na luwas, na an petsa Oktubre 1, 1919, nagsabi: “An katuyohan kaini ipaliwanag paagi sa liwanag kan kadonongan nin Dios an tunay na kahulogan kan darakulang pangyayari sa presenteng aldaw asin patunayan sa mapag-isip na mga tawo paagi sa ebidensia na dai mapagduduhan asin nakakokombensir na an panahon nin orog na pagbendisyon sa katawohan harani na ngonyan.” An mapag-isip na mga tawo naghimate sa mensahe kan The Golden Age. Sa laog nin dakol na taon, an sirkulasyon kaiyan orog pa kahiwas kisa kan An Torrengbantayan.b
7 Minsan siring, an pan-akit kan An Torrengbantayan asin Awake! bako sanang an bagay na ipinupublikar kaiyan an mga katotoohan sa doktrina asin ipinaliliwanag an makahulang kahulogan kan mga kamugtakan sa kinaban. Nangorogna kan nakaaging saro o duwang dekada, an satong mga magasin nakaakit sa puso nin mga tawo huli man sa saro pang dahelan.
Napapanahon na mga Artikulo na Nakaaapektar sa Buhay nin mga Tawo
8. Anong pakikibagay sa pagsurat an ginibo ni Judas, na sinasadol an saiyang mga parabasa na tumangon an anong mga impluwensia sa laog nin kongregasyon?
8 Mga 30 taon pagkagadan asin pagkabuhay liwat ni Jesu-Cristo, an parasurat sa Biblia na si Judas napaatubang sa sarong mapan-angat na situwasyon. An inmoral, animalistikong mga tawo nakalaog sa tahaw kan mga Kristiano. Susuratan kutana ni Judas an mga kapwa Kristiano manongod sa sarong tema nin doktrina—an kaligtasan na parareho tinutubod kan linahidan na mga Kristiano. Imbes, giniyahan kan banal na espiritu, nanompongan niang kaipuhan na sadolon an saiyang mga parabasa na tumangon an nakararaot na mga impluwensia sa laog nin kongregasyon. (Judas 3, 4, 19-23) Si Judas nakibagay sa situwasyon asin nagtao nin napapanahon na hatol na nakapanigo sa mga pangangaipo kan saiyang Kristianong mga tugang.
9. Ano an kalabot sa pagtao nin napapanahon na mga artikulo para sa satong mga magasin?
9 Kaagid kaiyan, an pag-andam nin napapanahon na mga artikulo para sa satong mga magasin sarong mapan-angat na responsibilidad. Nagliliwat an mga panahon, asin siring man an mga tawo—an saindang mga pangangaipo asin an saindang mga pinagkakainteresan bako nang arog kan nakaaging saro o duwang dekada. An sarong nagbibiyaheng paraataman nagkomento dai pa sana nahaloy: “Kan ako magin Saksi kaidtong mga taon nin 1950, an samong pakipag-adal sa Biblia sa mga tawo sa pundamental manongod sa mga doktrina—pagtokdo sainda kan katotoohan dapit sa Trinidad, kalayo sa impierno, kalag, asin iba pa. Pero ngonyan, garo baga dakolon an problema asin kadepisilan sa buhay nin mga tawo na dapat niato sindang tokdoan kun paano mabuhay.” Taano ta siring kaiyan?
10. Taano ta dai kita maninigong magngalas na nagkaigwa nin padagos na pagraot sa mga gibo-gibo nin katawohan poon kan 1914?
10 Manongod sa “huring mga aldaw,” ihinula kan Biblia: “An mga maraot asin madaya orog na magraraot, na nandadaya asin nadadaya.” (2 Timoteo 3:1, 13) Kun siring, dai kita dapat magngalas na nagkakaigwa nin padagos na pagraot sa mga gibo-gibo nin katawohan poon kan an panahon nin katapusan magpoon kan 1914. Si Satanas, na an natatadang panahon mas halipot na kisa kaidto, itinotorohok an saiyang kaanggotan sa sosyedad nin katawohan nin orog kisa kasuarin pa man. (Kapahayagan 12:9, 12) Bilang resulta, an moral asin pamantayan sa pamilya laen nang marhay kisa kan nakaaging 30 o 40 taon. An mga tawo sa kagabsan bako nang relihiyoso na arog kan nakalihis na mga dekada. Lakop na marhay an krimen kaya an mga tawo nag-iingat sa paagi na dai man lamang nadangog kan nakaaging 20 o 30 taon.—Mateo 24:12.
11. (a) Anong mga klase nin tema an nasa isip nin mga tawo, asin paano an grupong maimbod asin madonong na oripon nagsimbag sa mga pangangaipo? (b) Tumao nin halimbawa nin sarong artikulo sa An Torrengbantayan o sa Awake! na nakaapektar sa saindong buhay.
11 Kaya bakong makangangalas na an emosyonal, sosyal, asin pampamilyang mga isyu nasa isip nin dakol na tawo. An grupong maimbod asin madonong na oripon mapusong nagsimbag sa An Torrengbantayan asin Awake! paagi sa pagpublikar nin napapanahon na mga artikulo na nag-atubang sa tunay na mga pangangaipo nin mga tawo asin na tunay na nakaapektar sa saindang buhay. Horophoropa an nagkapirang halimbawa.
12. (a) Taano an mga artikulo manongod sa mga pamilyang nagsosolo an magurang ta inandam para sa The Watchtower kan 1980? (b) Paano an sarong tugang na babae nagpahayag kan saiyang apresasyon sa mga artikulo dapit sa mga pamilyang nagsosolo an magurang?
12 Mga isyu dapit sa pamilya. Kan ipaheling nin pankinaban na mga bareta an marikas na pagdakol nin mga pamilya na nagsosolo an magurang, an dai pang kaagid na mga artikulo dapit sa temang “One-Parent Families—Coping With the Problems” inandam para sa Setyembre 15, 1980 luwas kan The Watchtower. An mga artikulo may duwang katuyohan: (1) tabangan an nagsosolong mga magurang na mapangganahan an pambihirang mga problema na inaatubang ninda asin (2) tabangan an iba na mas mapasabot tanganing makapagpaheling sinda nin “pakikipagkapwa” asin tunay nanggad na ‘makapangataman’ sa mga pamilyang nagsosolo an magurang. (1 Pedro 3:8; Santiago 1:27) Dakol na parabasa an nagsurat tanganing ipahayag an apresasyon sa mga artikulo: “Talagang pinaluha kaiyan an sakong mga mata kan maheling ko an tutob,” an surat nin sarong ina, “asin kan buksan ko an magasin asin basahon an impormasyon, an sakuyang puso nagsulwak sa pasasalamat ki Jehova sa pagtao nin siring na impormasyon sa kinakaipuhan na panahon.”
13. Anong lubos na paliwanag dapit sa depresyon an ipinublikar sa Awake! kan 1981, asin ano an nasabi nin sarong parabasa dapit kaiyan?
13 Mga isyu manongod sa emosyon. An tema mapadapit sa depresyon ipinaliwanag na sa An Torrengbantayan asin Awake! poon pa kan mga taon nin 1960. (1 Tesalonica 5:14) Pero an bago asin positibong pagmansay sa tema itinao sa pantutob na seryeng “You Can Fight Depression!” sa Setyembre 8, 1981 Awake! An mga surat nin apresasyon hale sa laen-laen na parte nin kinaban dai nahaloy nag-arabot sa Watch Tower Society. “Paano ko ikapahahayag sa papel an mga namamatean kan sakuyang puso?” an surat nin sarong tugang na babae. “Ako 24 anyos na, asin sa laog kan nakaaging sampulong taon, nagkaigwa ako nin dakol na panahon nin depresyon. Pero ngonyan nakakamate akong mas harani ki Jehova asin nagpapasalamat na hinimate nia an mga pangangaipo nin mga tawong may depresyon paagi sa mamomoton na mga artikulong ini, asin boot kong sabihon iyan sa saindo.”
14, 15. (a) Paano an tema mapadapit sa pag-abuso sa aki ipinaliwanag sa satong mga magasin? (b) Arin na mga artikulo sa magasin an nakatudok sa boot nin sarong hinete sa Australia?
14 Mga isyu sosyal. Ihinula kan Biblia na sa “huring mga aldaw” an mga tawo magigin “mamomoton sa sainda man sana, . . . dai nin pagkamoot, . . . mayong pagpopogol sa sadiri, maringis, mayong pagkamoot sa karahayan.” (2 Timoteo 3:1-3) Kun siring, dai kita maninigong mapangalas na an pag-abuso sa aki lakop na ginigibo ngonyan. An temang ini prangkang ipinaliwanag sa artikulong “Help for the Victims of Incest” sa The Watchtower na Oktubre 1, 1983. Pakalihis nin walong taon, maingat na inandam an pantutob na seryeng “Healing the Wounds of Child Abuse” sa Oktubre 8, 1991 Awake! tanganing tumao nin pagsabot asin paglaom sa mga biktima asin paliwanagan man an iba tangani na sinda makatao nin ikararahay na tabang. An seryeng ini nin mga artikulo nagbunga kan pinakadakol na surat hale sa mga parabasa sa kasaysayan kan satong mga magasin. An sarong parabasa suminurat: “An may pinakadakulang epekto sa sakong pagrahay iyo an nakararangang mga kaisipan asin Makakasuratan na mga reperensia sa mga artikulong ini. An pakaaram na dai nababawasan an pagheling sa sako ni Jehova nakapakokosog na pakaginhawa. An maaraman na dai ako nagsosolo nakararanga man.”
15 An sarong hinete sa Melbourne, Australia, inapodan sa telepono an opisina kan Watch Tower Society sa Sydney, na ipinahahayag an saiyang pagkabalde sa mga nangyayari sa karera sa kabayo. Sinabi nia na nabasa pa sana nia an Marso 8, 1993 na Awake! dapit sa “Rape—A Woman’s Nightmare” asin dai sia makapaniwala na igwa palan nin siring kamahalagang magasin. May mga ihinapot sia sa laog nin mga 30 minutos asin naogmang madangog an itinaong mga simbag.
16. Sa anong mga paagi ikapaheheling nindo an saindong pag-apresyar sa mga magasin niato?
16 Kumusta man kamo? Naapektaran na daw an saindong buhay nin sarong espisipikong artikulo na ipinublikar sa An Torrengbantayan o Awake!? Kun iyo, daing duwa-duwa na yaon sa saindo an hararom na pakamate nin pasasalamat sa satong mga magasin. Paano nindo ikapaheheling an saindong pag-apresyar? Siertong paagi sa pagbasa nindo mismo kan kada luwas. Makapakikikabtang man kamo sa pinakamahiwas na pagwaras kan mahalagang marhay na mga magasin na ini. Paano ini magigibo?
Ihiras Iyan sa Iba!
17. Ano an puwedeng gibohon nin mga kongregasyon tanganing mapadakol an pagwaras nin mga magasin?
17 Enot, may sarong bagay na puwedeng gibohon nin kada kongregasyon. An Oktubre 1952 na luwas kan Informant (ngonyan An Satong Ministeryo sa Kahadean) nagsabi: “An pinakaepektibong paagi nin pagwaras kan mga magasin sa mga harong asin mga tindahan. Kaya irinirekomendar kan Sosyedad na an mga paaging ini nin pagwaras nin magasin magin regular na kabtang nin aktibidad sa Aldaw nin Pagmamagasin.” An suhestion na iyan balido pa sagkod ngonyan. An mga kongregasyon puwedeng mag-iskedyul nin regular na Aldaw nin Pagmamagasin, sarong aldaw na itinagama pangenot na sa paghuhulit paagi sa magasin. Para sa kadaklan na kongregasyon, an itinalaan na mga Sabado daing duwa-duwa na magigin marahay na oras. Iyo, an kada kongregasyon dapat na magtagama nin espesyal na mga aldaw o banggi para sa paghuhulit paagi sa magasin—sa mga harong, sa mga tindahan, sa tinampo, asin sa mga ruta sa magasin. Dugang pa, ano an magigibo nindo, bilang parahayag kan Kahadean, sa pagtabang na mapadakol an pagwaras nin magasin?
18, 19. (a) Paano an pagigin mapaggirumdom sa Torrengbantayan asin Awake! makatatabang saindo na makapasakamot nin mga magasin? (b) Ano an bentaha nin halipot, nasa puntong pag-atubang kun nag-aalok nin mga magasin? (c) Ano an nagpapaheling kan halaga nin paglaog kan mga magasin sa harong nin mga tawo?
18 An pagigin mapaggirumdom sa “Torrengbantayan” asin “Awake!” enot na paagi. Basahon nin patienot an mga magasin. Mantang binabasa nindo an kada artikulo, hapoton an sadiri, ‘Siisay daw an magkakainteres sa artikulong ini?’ Mag-isip nin pirang tataramon na masasabi nindo tanganing mapukaw an interes sa artikulo. Apuwera sa pagsuportar sa regular na Aldaw nin Pagmamagasin, taano ta dai magdara nin mga kopya tanganing maaprobetsaran nindo an lambang oportunidad na ikahiras iyan sa iba—kun nagbibiyahe o namamakal asin kun nakikipag-olay sa mga katrabaho, kataraed, kaeskuwela, o maestra?
19 An paggibo kaiyan na simple ikaduwang suhestion. An Disyembre 1, 1956 na Watchtower nagsabi: “An halipot, nasa puntong pag-atubang pinakamarahay kun nag-aalok nin mga magasin. An pasohan makapasakamot nin dakol na kopya. Iyan na mismo an magibo kan ‘pakipag-olay.’” An ibang parahayag nanompongan na epektibo an pagpili nin sarong ideya sa artikulo, itaram iyan sa pirang tataramon, asin iatubang an mga magasin. Kun nasa laog na kan harong, an mga magasin puwedeng “makipag-olay” sa iba apuwera sa tawong nag-ako kaiyan sa saindo. Sa Ireland an sarong hoben na estudyante sa unibersidad nabasa an Setyembre 1, 1991 luwas kan The Watchtower (sa Bicol, luwas na Setyembre 1, 1991 asin Oktubre 1, 1991), na inako kan saiyang ama sa sarong Saksi. An mga artikulo dapit sa komunikasyon asin iba pang tema nakapukaw sa saiyang interes. Pakabasa nia tolos kan magasin, inapodan nia sa telepono an mga Saksi, na inaapodan an numerong nalilista sa direktoryo. Dai nahaloy naponan an pag-adal sa Biblia, asin an daragita nabautismohan sa “Banal na Pagtotokdo” na Pandistritong Kombension kan Hulyo 1993. Sierto nanggad, ilaog niato sa mga harong an mga magasin, kun saen iyan “makakapakipag-olay” sa mga tawo! An sarong nagbibiyaheng paraataman nagtao nin saro pang simpleng suhestion: “Iluwas sa saindong bag an mga magasin.” Tunay nanggad, kun an saindong sinasabi dai nakapupukaw sa interes kan kagharong, tibaad an nakaaakit na mga ilustrasyon sa tutob kaiyan an mapasakamot kan mga magasin para sa saindo.
20, 21. (a) Paano kamo puwedeng magin madaling makibagay kun nakikikabtang sa pagmamagasin? (b) Ano an puwedeng gibohon nindo tanganing makapasakamot nin mas dakol na magasin kada bulan?
20 An ikatolong suhestion magin madaling makibagay. (Ikomparar an 1 Corinto 9:19-23.) Mag-andam nin pirang haralipot na pag-atubang. Isaisip an sarong artikulo na makaaakit sa mga lalaki, an saro pa sa mga babae. Para sa mga hobenes, puwede nindong itampok an sarong artikulo sa “Young People Ask . . .” Magin man madaling makibagay dapit sa kun noarin kamo makikikabtang sa pagmamagasin. Apuwera sa Aldaw nin Pagmamagasin, tibaad manompongan nindo na an paghuhulit sa banggi nagtatao nin ekselenteng oportunidad na makaalok nin mga magasin sa harong-harong.
21 An ikaapat na suhestion magbugtak nin personal na pasohan. An suplemento na “An mga Magasin Nagtotokdo kan Dalan Pasiring sa Buhay,” na nagluwas sa An Satong Ministeryo sa Kahadean kan Mayo 1984, nagsabi: “Bilang suhestion, an mga parahayag puwedeng magkaigwa nin pasohan na, halimbawa, 10 magasin kada bulan, depende sa saindang kamugtakan; an mga payunir puwedeng pag-aaboton an 90. Siyempre, an ibang parahayag tibaad mas dakol na magasin an ikinakawaras kada bulan kaya mas halangkaw an ibubugtak nindang personal na pasohan. Pero, huli sa maluyang salud, klase nin teritoryo, o iba pang marahay na dahelan, tibaad mas hababa an pasohan nin iba. Pero mahalaga man ki Jehova an saindang paglilingkod. (Mat. 13:23; Luc. 21:3, 4) An mahalaga magkaigwa nin personal na pasohan.”
22. Sa anong paagi ikapaheheling niato na nagpapasalamat kita ki Jehova huli sa satong napapanahon na mga magasin nin katotoohan?
22 Nagpapasalamat na gayo kita na si Jehova, an “Dios nin katotoohan,” ginamit an grupong maimbod asin madonong na oripon asin an Namamahalang Grupo kaiyan sa pagtao sato kan napapanahon na mga magasin na ini! (Salmo 31:5) Sagkod na booton ni Jehova, an mga magasin na ini magpapadagos na atubangon an tunay na mga pangangaipo nin mga tawo. Padagos kaiyan na susuportaran an halangkaw na mga pamantayan ni Jehova sa moralidad. Dai iyan maontok sa pagpalakop kan tamang doktrina. Asin magpapadagos iyan sa pagdara kan atension sa kaotoban kan hula na nagtatanda sa satong mga aldaw bilang an panahon na namamahala na an Kahadean nin Dios asin ginigibo an kabotan nin Dios digdi sa daga nin orog kisa kasuarin pa man kan nagdadakol na bilang nin tunay na mga parasamba ki Jehova. (Mateo 6:10; Kapahayagan 11:15) Kanigoan nanggad kahalaga kan satong kayamanan na An Torrengbantayan asin Awake! Aprobetsaran niato an lambang oportunidad na ikahiras sa mga mahoyo an puso an importanteng mga magasin na ini na nakaaapektar sa buhay nin mga tawo asin nagdedepensa sa mga katotoohan kan Kahadean.
[Mga Nota sa Ibaba]
a Hulyo 15, 1992, pahina 19-22.
b Sa laog nin dakol na taon an Torrengbantayan minansay bilang magasin na sa partikular para sa linahidan na mga Kristiano. Pero poon kan 1935, orog pang idinoon an pagdagka sa “dakulang kadaklan,” na an paglaom buhay na daing katapusan digdi sa daga, na kumua asin basahon an Torrengbantayan. (Kapahayagan 7:9) Pakalihis nin pirang taon, kan 1940, an Torrengbantayan regular na iinalok sa mga tawong nasa mga tinampo. Poon kaidto an sirkulasyon marikas na nagdakol.
Ano an Saindong Simbag?
◻ Ano an nagpapaheling na an Torrengbantayan asin Awake! mga magasin nin katotoohan?
◻ Paano an Torrengbantayan asin Awake! nakaapektar sa buhay nin mga tawo?
◻ Ano an puwedeng gibohon nin mga kongregasyon tanganing mapadakol an pagwaras nin mga magasin?
◻ Anong mga suhestion an makatatabang saindo na makapasakamot nin mas dakol na magasin?
[Kahon sa pahina 22]
Nagkapirang Artikulo na Nakaapektar sa Buhay nin mga Tawo
Sa laog nin mga taon dakol na parabasa an suminurat sa pagpahayag nin apresasyon sa espisipikong mga artikulo na ipinublikar sa An Torrengbantayan asin Awake! An nalilista sa ibaba pira sana sa dakol na mga temang nakaapektar sa satong mga parabasa. Ini daw o an iba pang artikulo nakaliwat kan saindong buhay?
An Torrengbantayan
“Akoon an Tabang nin Dios Tanganing Mapangganahan an Hilom na mga Kasalan” (Disyembre 1, 1985 [sa Ingles, Abril 15, 1985])
“Paggibo nin Diosnon na Debosyon sa Gurang Nang mga Magurang” (Hunyo 1, 1987 [sa Ingles, Hunyo 1, 1987])
“Edukasyon na May Katuyohan” (Nobyembre 1, 1992 [sa Ingles, Nobyembre 1, 1992])
Awake!
“You Can Fight Depression!” (Setyembre 8, 1981)
“When Someone You Love Dies . . .” (Abril 22, 1985)
“Protect Your Children!” (Oktubre 8, 1993)
[Ritrato sa pahina 23]
Sa Canada—paghuhulit sa harong-harong na dara an mga magasin
[Ritrato sa pahina 24]
Sa Myanmar—pag-aatubang kan mga magasin na nagtotokdo kan dalan pasiring sa buhay