Kamo daw Naggigibo nin mga Pagdalaw Liwat?
1 Kanigoan kamakaoogmang report sa dinamikong aktibidad an yaon sa 1989 Yearbook! Minilyon an nakadangog kan maogmang bareta asin minilyon na babasahon an ikinawaras. Ipinaririsa kan report na kaipuhan na balikan an nasabwagan kan banhi nin katotoohan. (1 Cor. 3:6, 7) Kaipuhan an dugang pang pag-ataman. Huli sa lubos na pakikikabtang sa gibohon na ini, an banwaan ni Jehova guminibo nin total na 288,017,474 pagdalaw liwat kan nakaaging taon.
NOARIN?
2 Kun kamo nakakanompong nin interesado, kamo daw minadalaw liwat bago lumipot an interes? An pagdalaw pakalihis nin pirang aldaw parateng nagbubunga nin marahay na mga resulta. Magkaigwa nin kompletong rekord kan gabos na nawarasan asin interes na nanompongan. Repasohon nin dayaday an mga rekord na ini tanganing maseguro na an gabos nindong pagdalaw liwat nagigibo nin listo. An saindong kaimbodan asin pagkadesidido bebendisyonan ni Jehova.
3 Taano ta dai gumamit nin mas dakol na oras sa pagdalaw liwat asin pagpopoon nin mga pag-adal sa Biblia ngonyan na Abril? Igwa daw nin mga dayaday na nagkukua nin mga magasin asin magugustong mag-adal? An sarong tugang nakapasakamot nin duwang magasin sa sarong lalaki alagad dai nagbalik, sa paghona na sia bako man talagang interesado. An lalaki nagsurat sa kongregasyon, na naghahagad nin espirituwal na tabang. An dakol na payunir nagreport na may ibinungang marahay na mga pag-adal an pagbalik sa mga nawarasan nin magasin. Igwa daw nin mga nag-atender sa Memorial o ibang pagtiripon na gustong mag-adal?
PAGPOPOON NIN PAG-ADAL
4 An librong Live Forever epektibong instrumento sa satong ministeryo. Kun kamo makawaras, magsalang sa enot na pagsongko o sa pagdalaw liwat, ihapot: “Naisip-isip na daw nindo an manongod sa pagkabuhay sagkod lamang? [Pasimbagon.] Siyempre, an dakol dai magugustong tioson sagkod lamang an kasakitan, kadahasan, asin gutom na nagpapasakit sa dakol ngonyan.” Sa pagbukas sa pahina 11-13, puwede nindong ihapot: “Alagad halimbawa puwede kamong mabuhay sagkod lamang sa mga kamugtakan na arog kaini. Bako daw na maogmahon iyan? [Pasimbagon.] An pagkabuhay sagkod lamang may hinahagad sa sato. Helinga tabi an sinasabi kan parapo 19. [Basahon.] Togotan nindo akong idemonstrar kun paano an librong ini makatatabang saindo na makakua nin siring na kaaraman.”
5 An mga parahayag sinasadol na magwalat nin mga pulyeto sa mga dai nagkua kan regular na alok o kun mayo nin tawo sa harong. An mga ini magagamit sa mga pagdalaw liwat sa pagdemonstrar kan satong paagi nin pag-adal. An kada pulyeto nagpapaliwanag nin duwa o tolong punto. Saro-saroon na basahon an parapo kaiba kan kagharong. Kun may hapot, pumondo asin imbitaran an kagharong na magkomento. Hanapon asin iaplikar an mga tekstong sitado.
6 Ipinaheling nin kabatidan na pinakamarahay na mag-iskedyul nin seguradong mga oras sa pagdalaw liwat asin paggibo nin mga pag-adal. Ini makatatabang sato na mabalikan tolos an mga interesado. Seguro puwedeng magtagama nin oras sa banggi, sa Sabado o Domingo, o pagkatapos nin pagharongharong. Aramon kun ano an pinakamarahay sa saindo asin regular na makikabtang sa gibohon na ini tanganing gumibo nin mga disipulo.—Mat. 28:19, 20.