Hinahanap—Dakol Pang Pag-adal sa Biblia
1 Si Jehova Dios binebendisyonan an saiyang daganon na organisasyon nin padagos na pag-oswag. Kan nakaaging taon nin paglilingkod, 375,923 an nabautismohan sa bilog na kinaban—promedyong labi sa 1,000 bagong disipulo kada aldaw, o mga 43 kada oras! Sa manlaenlaen na parte kan kinaban, an gibohon na pan-Kahadean nag-ooswag asin naeeksperyensiahan an ekselenteng mga aumento, sa ibong kan mga dekada nin kasakitan na tibaad inatubang kan satong mga tugang. Makaoogmang basahon an manongod sa pag-oswag na nangyayari sa pagpalakop kan maogmang bareta!
2 Sa sangang opisina kan Pilipinas kan nakaaging taon, naheling ta man an mga aumento sa promedyo kan total na parahayag asin auxiliary payunir, sa mga oras na ginamit sa paghuhulit, asin sa kabilangan nin mga ikinapasakamot na pulyeto, brosyur, asin magasin. May aumento sa kabilangan nin nabautismohan asin pinakahalangkaw na kabilangan nin nag-atender sa Memorial. Kumusta man an pagdalaw liwat asin pag-adal sa Biblia? Nagbaba kita sa total na kabilangan nin mga pagdalaw liwat asin nag-ina nin mga 5 porsiento an mga pag-adal sa Biblia. Alagad ta an mga kabtang na ini kan ministeryo mahalagang marhay sa paggibo nin mga disipulo. Ano an magigibo kan kada saro sa sato tangani na baliktadon an pagbabang ini sa mga pagdalaw liwat asin pag-adal sa Biblia?
3 Pakosogon an Pagmawot na Magkondukta nin Pag-adal: Kita mismo kaipuhan na magkonsentrar kan satong atension sa pagigin makosog asin aktibo sa espirituwal. An tunay na mga parasunod ni Cristo “maigot sa marahay na mga gibo.” (Tito 2:14) Kun rinerepaso ta an satong ministeryo, masasabi daw niato na galaga kitang marhay na kultibaron an interes kan gabos na napasakamotan nin literatura sa langtad? Kita daw entusiastiko manongod sa pag-alok nin mga pag-adal sa Biblia sa harong sa gabos na nagpapaheling nin interes? (Roma 12:11) O kaipuhan ta daw na pataluboon an orog pang pagmawot na dumalaw liwat asin makapoon nin mga pag-adal sa Biblia sa harong?
4 An personal na pagbasa sa Biblia, regular na pag-atender sa pagtiripon, asin pag-adal kan mga publikasyon papagdadanayon kitang buhay sa espirituwal asin may puersa kan espiritu nin Dios. (Efe. 3:16-19) Pakokosogon kaini an satong pagtubod asin kompiansa ki Jehova patin an satong pagkamoot sa satong kapwa. Mamomotibar kitang itokdo an katotoohan sa iba, na paagi kaiyan ginigibong interesante, mapanggana, asin nakaaanimar an satong ministeryo. Iyo, maninigong magmawot kita na magkaigwa nin dakol pang pag-adal sa Biblia!
5 Adalan Nguna an Pamilya: An Kristianong mga magurang na may mga aking kaibahan pa sa harong maninigong magin mapagrisa sa saindang regular na programa nin pampamilyang pag-adal sa Biblia. (Deut. 31:12; Sal. 148:12, 13; Tal. 22:6) Kapakipakinabang na marhay para sa mga magurang na ipakipag-adal sa saindang mga aki an brosyur na Kahagadan dangan an librong Kaaraman tangani na andamon sinda na makualipikar bilang dai pa bautisadong mga parahayag asin magdusay patin magpabautismo. Siempre, puedeng konsideraron an dagdag pang materyal, depende sa pangangaipo asin edad kan aki. An sarong magurang na inaadalan an sarong dai pa bautisadong aki puedeng ibilang an pag-adal, oras, asin mga pagdalaw liwat, siring kan ipinaliwanag sa “Hapot” sa Hunyo 1987 An Satong Ministeryo sa Kahadean.
6 Paoswagon an Personal na Pag-organisar: Kun iisipon an kabilangan nin ikinapasakamot na mga magasin, brosyur, asin libro, mayong duwa-duwa na kadakol na banhi an iwinawarak. An mga banhing ini nin katotoohan na itinanom igwa nin dakulaon na potensial sa pagprodusir nin bagong mga disipulo. Alagad tunay daw na makokontento an sarong paraoma o hardinero kun padagos siang nagtatanom asin, pakatapos kan gabos niang paghihingoa, nungkang nagkaigwa nin panahon na mag-ani? Dai nanggad. Kaagid kaiyan, kaipuhan an ministeryong pagkultibar.
7 Regular daw kamong nag-iiskedyul nin panahon sa mga pagdalaw liwat? Songkoon tolos-tolos an gabos na nanompongan na interesado. Dumalaw liwat na an katuyohan makapoon nin pag-adal sa Biblia. Kamo daw may malinig asin areglado, pinakahuri an impormasyon, asin organisadong marhay na rekord kan saindong mga pagdalaw liwat? Kaiba kan ngaran asin adres kan kagharong, siertohon na irekord an petsa kan enot na pagsongko, ano man na ikinapasakamot, sarong halipot na deskripsion kan pinag-olayan, asin sarong punto na puedeng mapag-olayan sa masunod na pagsongko. Magtada nin espasyo sa saindong rekord para sa dugang pang impormasyon na idadagdag pakatapos kan kada pagdalaw liwat.
8 Analisaron kun Paano Madalaw Liwat: Ano an nagkapirang punto na dapat girumdomon kun nagdadalaw liwat sa interesadong tawo? (1) Magin mainit, makikatood, entusiastiko, asin impormal. (2) Ipakipag-olay an mga tema o hapot na interesante para sa saiya. (3) Papagdanayon na simple, interesante, asin Makakasuratan an pag-orolay. (4) Sa kada pagdalaw, hingoahon na tokdoan an kagharong nin sarong bagay na mimidbidon niang may personal na halaga para sa saiya. (5) Pakosogon an pag-antisipar sa tema na pag-oolayan sa masunod na pagdalaw. (6) Dai maghaloy na marhay. (7) Dai maghapot nin mga hapot na nakapasosopog sa kagharong o nakabibigla sa saiya. (8) Gumamit nin pakamansay tangani na dai makondenar an salang mga punto de vista o salang mga ugale kan kagharong kun dai pa nakukultibar an pagpahalaga sa espirituwal.—Helingon an suplemento kan Marso 1997 An Satong Ministeryo sa Kahadean para sa dugang pang tabang kun paano magigin mapanggana sa mga pagdalaw liwat asin pagpoon nin mga pag-adal sa Biblia.
9 Siyasaton an Gabos na Posibilidad: Sa sarong kongregasyon, puedeng kuanon an mga ngaran asin numero kan apartment kan gabos na nag-iistar sa sarong guardiadong marhay na pasilidad. Personal na sinuratan an kada residente, asin nagsaliot nin duwang tract. Sa katapusan kan surat, iinalok an pag-adal sa Biblia sa harong asin iiniba an sarong lokal na numero nin telepono tangani na makasimbag an nakaresibi. Sa laog nin pirang aldaw, nag-apod an sarong hoben na lalaki na naghahagad nin pag-adal. Dinalaw sia liwat kan suminunod na aldaw, asin naestablisar an pag-adal sa librong Kaaraman. Kan banggi man sanang idto nag-atender sia sa Pag-adal sa Libro kan Kongregasyon, asin sia padagos na nag-aatender sa gabos na pagtiripon. Haros insigida, pinonan nia an regular na pagbasa kan Biblia aroaldaw. Padagos siang nag-oswag pasiring sa bautismo.
10 Iinareglo nin mga parahayag sa sarong grupo na iribang gumibo nin pirang pagdalaw liwat. Kan gibohon nin sarong tugang na babae an saro sa saiyang mga pagsongko, mayo sa harong an tawo na hinahanap nia, alagad ibang hoben na babae an nagsimbag sa pinto, na nagsasabi: “Haloy ko na kamong pinagpaparahalat.” An kagharong nag-ako kan librong Kaaraman gikan sa sarong kamidbid dai pa sana nahahaloy. Kan panahon na sumongko an mga tugang na babae sa saiyang pinto, duwang beses na niang nabasa an libro asin naghangang marhay sa laog kaiyan na impormasyon. Nagsabi sia na dai sia nasorpresa na maheling na nagsosongko an mga Saksi sa saiya kan aldaw na idto huli ta nagparapamibi na sia na logod umabot sinda asin adalan sia sa Biblia. Naponan an pag-adal, nagpoon siang umatender sa mga pagtiripon kan kongregasyon, asin marikas siang nag-oswag.
11 An sarong tugang na babae, na haros 25 taon nang bautisado, tinawan kasuarin pa sana nin librong Kaaraman an saiyang ina. An saiyang ina, na miembro nin sarong iglesia, nagpoon na basahon an libro. Kan matapos nia an duwang kapitulo, inapod nia an saiyang aking babae asin, sa pagngalas kan aking babae, nagsabi: “Gusto kong magin saro sa Mga Saksi ni Jehova!” Nagpoon na mag-adal an ina asin sia bautisado na ngonyan.
12 Probaran an mga Suhestion na Ini: Nagamit na daw nindo an direktang pagdolok sa pagpoon nin mga pag-adal? Puede kamong magsabi sana: “Kun boot nindong magkaigwa nin daing bayad na pag-adal sa Biblia sa harong, puede kong ipaheling sa saindo sa laog sana nin pirang minuto kun paano iyan ginigibo. Kun magustohan nindo iyan, puede kamong magpadagos.” Kun siring kaiyan an pagkakasabi, dakol na tawo an dai nag-aalangan na akoon an iinaalok asin masdan an pagdemonstrar nin pag-adal sa Biblia.
13 Sa pagpoon pa sana kan pag-adal, ipaheling sa estudyante kun paano mag-aandam nin patienot paagi sa pagbasa sa sitadong mga teksto asin pagkurit kan pangenot na mga tataramon bilang simbag sa nakasurat na mga hapot. Magkonsentrar sana sa pangenot na mga punto. Minsan ngani kita tibaad kaipuhan na makibagay sa enot na pirang sesyon, importante na regular na gibohon an pag-adal sa Biblia. Isaisip kun paano nindo iiintrodusir an pamibi bilang mahalagang marhay na kabtang kan pag-adal asin kun paano nindo sono sa Kasuratan aandamon an estudyante para sa pagtumang. Tunay nanggad, gibohon na buhay an pag-adal.
14 Siempre, bakong gabos na estudyante sa Biblia parareho an rikas nin pag-oswag. An nagkapira bakong kapareho kan iba an inklinasyon sa espirituwal ni kapareho an rikas kan pagsabot sa itinotokdo. An iba sibot-sibot na marhay sa buhay asin tibaad dai ikadusay an panahon na kaipuhan tangani na matapos an bilog na kapitulo kada semana. Sa siring, sa nagkapirang situwasyon tibaad labi sa sarong sesyon nin pag-adal an kaipuhan tangani na matapos an nagkapirang kapitulo asin nagkapirang dagdag na bulan tangani na matapos an libro. Sa nagkapirang kamugtakan puede niatong ipakipag-adal nguna an brosyur na Kahagadan dangan magpadagos sa librong Kaaraman; sa iba, pakatapos kan librong Kaaraman, puedeng manompongan niatong angay na ipakipag-adal an brosyur na Kahagadan. Ini, na nadudugangan kan saindang pag-atender sa mga pagtiripon kan kongregasyon, matabang sa kada estudyante na magkaigwa nin masarig na pundasyon sa katotoohan.
15 Orog sa gabos, mamibi na logod magkaigwa nin pag-adal sa Biblia! (1 Juan 3:22) An saro sa pinakakapakipakinabang na mga eksperyensia para sa sarong Kristiano iyo na gamiton ni Jehova na tabangan an saro na magin disipulo ni Jesu-Cristo. (Gibo 20:35; 1 Cor. 3:6-9; 1 Tes. 2:8) Ngonyan na an panahon na ipaheling an dakulang kaigotan sa gibohon na pag-adal sa Biblia, na lubos na nagkokompiar sa mayaman na bendisyon ni Jehova sa satong mga paghihingoa na makapoon nin dakol pang pag-adal!
[Blurb sa pahina 3]
Kamo daw namimibi na logod makapoon nin bagong pag-adal sa Biblia?