Omawon an Panganay ni Jehova!
1 Kan Domingo, Nisan 9, 33 C.E., an sarong dakulang kadaklan na may kapot na mga sanga nin palma sa saindang mga kamot inomaw an panganay na Aki ni Jehova, bilang “an Saro na minadatong bilang Hade sa ngaran ni Jehova!” (Luc. 19:38; Heb. 1:6) Kan Lunes asin Martes, Nisan 10 asin 11, sibot na gayo si Jesus sa saiyang pagmiministeryo sa publiko, na ginigibo an ultimong mga aldaw na idto na pinakamasibot sa saiyang buhay sa daga.
2 Ngonyan, an mas dakula pang kadaklan na may piguratibong mga sanga nin palma nagkukururahaw: “Utang niato an kaligtasan sa satong Dios, na nagtutukaw sa trono, asin sa Kordero.” (Kap. 7:9, 10) Sa Marso 26, magtitiripon kita sa pagselebrar kan Memorial kan kagadanan ni Cristo. Mantang nagdadangadang an petsang iyan, puwede daw niatong dagdagan an satong mga paghihingoa sa ministeryo asin sa siring makadugang sa panglobong kurahaw na ini nin pag-omaw?
3 Dugangan an Aktibidad sa Langtad: Dakol na parahayag an naglaog na bilang auxiliary payunir durante kan Marso. Boot daw nindong umiba sainda? Kun iyo, itao an saindong aplikasyon na daing pag-atraso.
4 Baga man kamo makapaglilingkod bilang auxiliary payunir o dai, bobooton nindo na magkaigwa nin lubos na pakikikabtang sa ministeryo durante kan Marso. Puwedeng ikaareglo kan kongregasyon an pangrupong pagpapatotoo aroaldaw durante kan bulan.
5 An gabos na kongregasyon maninigong mag-areglo nin espesyal na pagtiripon para sa paglilingkod sa langtad sa Sabado, Marso 26. Minsan ngani dakol an gigibohon sa pag-andam para sa Memorial, irinirekomendar na an gabos na may kakayahan umiba sa ministeryo sa langtad sa Sabadong aga. Bilang dagdag sa pagharongharong, siertohon na an mga inimbitaran nindo sa Memorial igwa nin malulunadan asin na aram ninda an oras asin lugar kan pagtiripon.
6 Imbitaran Asin Pakosogon an Iba: Pinagbotan ni Jesus an saiyang mga parasunod: “Padagos nindong gibohon ini sa paggirumdom sa sako.” (1 Cor. 11:24) Mantang kinukuyog kan linahidan na mga parasunod ni Jesus an pagboot na iyan, an lambang lingkod ni Jehova iniimbitaran na umatender asin magmasid sa pagselebrar kan Memorial. Kabilang nin iba pa, maninigo nindong imbitaran an mga estudyante sa Biblia, paryentes, daing pagtubod na agom, asin katrabaho. Gumibo nin lista tanganing mayong malingawan.
7 Magkakaigwa nin dugang pang oportunidad para sa pagpakosog sa interesadong mga tawo sa Memorial mismo. Siertohon na umabot nin amay tanganing mataratara nindo an mga bagohan na maatender sa kaenot-enote. Kun umatender an nakapira sa saindong mga estudyante sa Biblia, tibaad praktikal na an saro pang parahayag taedan an nagkapira sainda durante kan pagtiripon. Imbitaran an mga bagohan na bumalik sa Domingo, Marso 27, para sa regular na Pampublikong Pagtiripon kan kongregasyon.
8 Sa konklusyon kan pagselebrar kan Memorial, mantang iriba niatong inaawit an kanta 105, “Hail Jehovah’s Firstborn!,” makasalingoy logod kita na may pagkakontento sa sarong maigot na bulan nin teokratikong aktibidad sa ikaoomaw ni Jehova!