Magin Maigot Para sa Marahay!
1 Mantang palaog na kita sa panahon nin Memorial sa 2003, igwa kita nin abundang rason na magin “maigot para sa marahay.” (1 Ped. 3:13) Pangenot sa mga ini an atang na pantubos ni Jesu-Cristo. (Mat. 20:28; Juan 3:16) May labot digdi, si apostol Pedro nagsurat: “Bakong paagi sa mga bagay na matutunawon, paagi sa pirak o bulawan, na kamo ilinigtas sa saindong daing kamanungdanan na gawe-gawe. . . . Kundi idto paagi sa mahal na marhay na dugo, siring kan sa daing kaninan asin daing digtang kordero, an ki Cristo.” (1 Ped. 1:18, 19) Pinipirit kita kan pagpasalamat sa ekstraordinaryong kapahayagan na ini nin pagkamoot na magin sibot sa paggibo nin marahay, na rinerekonoser na “itinao [ni Jesus] an saiyang sadiri para sa sato tanganing ikaligtas nia kita sa gabos na klase nin katampalasanan asin makalinig para sa saiya man sana nin sarong banwaan na magigin saiya sana nanggad, maigot sa marahay na mga gibo.”—Tito 2:14; 2 Cor. 5:14, 15.
2 Kun ginigibo niato an nakapaoogma sa pagheling nin Dios, nagkakamit kita nin marahay na relasyon sa saiya asin napapasa irarom kita kan saiyang mamomoton na pangangataman. Nagsabi pa si Pedro: “Sia na gustong mamoot sa buhay asin makaheling nin marahay na mga aldaw, . . . rumayo sia sa maraot asin gumibo sia nin marahay; hanapon nia an katoninongan asin pagmaigotan na gibohon iyan. Huli ta an mga mata ni Jehova nasa mga matanos, asin an saiyang mga talinga nasa saindang pagngayongayo.” (1 Ped. 3:10-12) Sa peligrosong mga panahon na ini, kanigoan na bendisyon na maaraman na si Jehova nagbabantay sa sato asin andam na humiro para sa sato, “tanganing ingatan [kita] siring sa tawo-tawo kan saiyang mata.”—Deut. 32:10; 2 Cron. 16:9.
3 Apisar na napapaatubang sa mga pagbalo, an enot na mga Kristiano na sinuratan ni Pedro pano nin naglalaad na kaigotan na dai masisigbo, asin ibinalangibog ninda an maogmang bareta sa pinakamahiwas na mapupuede. (1 Ped. 1:6; 4:12) Totoo man iyan sa banwaan nin Dios ngonyan. Minsan ngani kita nabubuhay sa “delikadong mga panahon na masakit pakibagayan,” pinahihiro kita kan pag-apresyar sa karahayan ni Jehova na gibohon an kabotan nin Dios na may kaigotan. (2 Tim. 3:1; Sal. 145:7) Estudyaran niato an nagkapirang marahay na gibo na ikasisibot niato durante kan panahon na ini nin Memorial.
4 Imbitaran an Iba na Umatender sa Memorial: An sarong paagi na ikapaheheling niato an satong pag-apresyar sa ekstraordinaryong balaog na pantubos iyo an pagigin presente sa taonan na paggirumdom kan kagadanan ni Jesus, na seselebraron ngonyan na taon sa Mierkoles, Abril 16, pagkasolnop kan saldang. (Luc. 22:19, 20) Kan nakaaging taon, sa 94,600 na kongregasyon na nagreport sa bilog na kinaban, an total na nag-atender 15,597,746! Iyan mas dakol nin 220,000 kisa sa nag-atender kan sinundan na taon.
5 Pira daw an maatender ngonyan na taon? Iyan madependeng marhay sa satong maigot na paghihingoa na enkaminaron an iba na makipagtipon sa sato. Pumoon paagi sa paggibo nin lista kan gabos na gusto nindong imbitaran. Maninigo na an enot sa lista iyo an mismong pamilya nindo. Kun daing pagtubod an agom nindo, ipahayag an saindong odok sa pusong kamawotan na sia umatender kaiba nindo. An sarong daing pagtubod na agom na lalaki nagsabi na sia nag-atender sa Memorial kan nakaaging taon huli ta naheheling nia kun gurano kahalaga kan saiyang presensia para sa saiyang agom. An masunod sa lista nindo puedeng mga paryente, kataraed, katrabaho, o kaeskuela. Siertohon na imbitaran an mga inaadalan nindo sa Biblia.
6 Pakagiboha kan lista nindo, mag-iskedyul nin panahon na personal na imbitaran an balang saro. Gamiton an imprentadong mga imbitasyon sa Memorial. Tangani na matabangan an mga tawo na magirumdoman kun noarin asin kun saen gigibohon an selebrasyon, makinilyahon o imolde sa ibaba kan imbitasyon an oras asin lugar kan Memorial. Mantang naghaharani an Abril 16, pagirumdomon an mga nasa lista nindo, magsalang nin personal o paagi sa telepono. Tabangan niato an pinakadakol na mapupuede na magin presente sa sagradong marhay na okasyon na ini.
7 Tabangan an mga Nag-atender sa Memorial: An banggi kan Memorial pirmeng nakaoogmang okasyon. May oportunidad kita na maogmang akoon an mga indibiduwal na sa parate dai nag-aatender sa satong mga pagtiripon. Gumibo nin mga areglo na umabot nin amay asin dai tolos magpuli, sagkod na itinotogot nin lokal na mga sirkunstansia. Mangenot sa pakimidbidan sa mga bagohan na nag-atender. Magin mainit asin mapag-istimar.—Roma 12:13.
8 Matatabangan daw an nagkapira na nag-atender sa Memorial na orog pang umoswag sa espirituwal paagi sa pag-adal sa Biblia? Hingoahon na kuanon an ngaran asin adres nin siisay man na bisita na dai pa sinosongko sa presente tanganing sinda padagos nindong matabangan. Paagi sa mamomoton na tabang, an nagkapira kaini tibaad umoswag sagkod sa punto na makualipikar bilang dai pa bautisadong mga parahayag bago an Memorial sa masunod na taon. Sa pagdalaw liwat sa mga nag-atender sa Memorial, imbitaran sinda sa espesyal na pahayag na itatao sa Abril 27.
9 Puede daw Kamong Mag-auxiliary Payunir Ngonyan na Tig-init? Kada taon pinahihiro kita kan satong kaigotan para ki Jehova na lubos na maghingoa sa ministeryo durante kan mga bulan nin espesyal na teokratikong aktibidad. Sa Pilipinas kan nakaaging taon, 9,515 an nag-auxiliary payunir kan Marso, 15,458 kan Abril, asin 12,652 kan Mayo. Durante kan tolong bulan na ini, naggamit sinda nin total na 1,528,501 oras sa ministeryo asin pinamayohan ninda an promedyong 13,836 na pag-adal sa Biblia. An pinagsararong paghihingoa nin enterong kongregasyon na ihulit an maogmang bareta na may kaigotan durante kan panahon nin Memorial puedeng magbunga nin marahay na mga resulta.
10 Irineport nin sarong kongregasyon nin 107 parahayag asin 9 na regular payunir na nagin “pambihirang bulan” para sa sainda an nakaaging Abril, na may 53 na naglingkod bilang auxiliary payunir, kaiba an gabos na kamagurangan asin ministeryal na lingkod. Paano pinatalubo kan kamagurangan an entusiasmo sa pag-auxiliary payunir kan bulan na idto? Nagpoon sinda nin amay, na ineenkaminar an pinakadakol na mapupuede na magpalista. An mga pagtiripon bago lumuwas sa paglilingkod sa langtad ginibo sa manlaenlaen na oras durante kan aldaw tangani na matawan nin lugar an gabos na nasa kongregasyon. Tinawan nin espesyal na pagdodoon an paghuhulit paagi sa telepono, nangorogna para sa mga maluya an hawak.
11 An sarong 86 anyos na tugang na babae, na dai makalakaw huli sa problema sa salud, nagpalista bilang auxiliary payunir. Minapoon sa aga, sia duwang oras na naghuhulit paagi sa telepono mientras na nakatukaw sa may lamesa sa kusina, nagpapahingalo nin pirang oras, dangan minabalik asin nagpapadagos sa paghulit. An saro na nakaolay nia nagadanan kan saiyang agom na lalaki asin duwang tinedyer na aking lalaki durante kan nakaaging duwang taon asin dai masabotan kan babaeng ini kun taano ta itinotogot nin Dios na mangyari an siring na maraot na mga bagay. Ikinatao an marahay na patotoo, asin naponan an pag-adal sa Biblia. An paghuhulit paagi sa telepono kun banggi asin sa ibang oras sarong epektibong paagi na makaolay an mga tawo na nag-iistar sa mga edipisyo o lugar na masakit maabot. Pinangyayari man kaiyan na makaolay nin mga parahayag an mga tawo na mayo sa harong durante kan aldaw.
12 Tinapos kan kamagurangan an report ninda sa pagsabi: “Naogma kaming marhay asin inaapresyar mi an mga pribilehio asin bendisyon na pinagin posible ni Jehova para sa lambang saro sa samo.” Paagi sa tamang pagplano, puede man na magkamit nin siring na mga bendisyon an kongregasyon nindo.
13 Pagmaigotan an 100 Porsientong Pakikikabtang sa Ministeryo: Pinahihiro kita kan pagkamoot niato sa Dios asin sa kapwa na tuboson an panahon kada bulan tangani na ipaabot sa iba an maogmang bareta. (Mat. 22:37-39) Maninigo na hingoahon kan mga paraataman sa Pag-adal sa Libro kan Kongregasyon asin kan mga katabang ninda na tabangan an mga nasa grupo ninda na makikabtang sa ministeryo kada bulan. An sarong marahay na paagi na magibo ini iyo an pag-areglo antes pa na ibanan sa ministeryo an espesipikong mga indibiduwal na nasa grupo. Imbes na maghalat na gibohon ini sa katapusan kan bulan, pumoon nin amay. Tatawan kamo kaini nin mas dakol na oportunidad na magtao nin mamomoton na tabang.
14 Igwa daw nin maluya an hawak na mga parahayag sa saindong grupo nin pag-adal sa libro na nadedepisilan na marhay na makikabtang sa ministeryo? Kun may nagkapira na nasa mga klinika sa pag-ataman sa mga gurang asin may helang o dai na nakakaluwas sa harong, natural sana na limitado an mga oportunidad ninda na makapagpatotoo. Alagad paagi sa pag-aprobetsar sa limitadong mga oportunidad ninda na pasirangon an saindang liwanag, tibaad mapahiro ninda an mga nakaheheling kan saindang marahay na mga gibo na magkaigwa nin tunay na interes sa katotoohan. (Mat. 5:16) Maninigong seguradohon nin mga paraataman sa pag-adal sa libro na aram nin mga siring na puede sindang magreport nin paglilingkod sa langtad na tigkinse minutos an aumento. An pakareport kan oras na ginagamit ninda sa paghuhulit nagpaparigon sa boot kan fiel na mga parahayag na ini, asin nagtatao iyan sa sainda nin magayagayang pagkakontento. Nakatatabang man iyan na seguradohon na tama an pambilog na kinaban na report sa mga aktibidad kan banwaan nin Dios.
15 Mga Hoben na Sibot sa Paggibo kan Marahay! Kanigoan kanakarerepresko na maheling an Kristianong mga hoben na ginagamit an saindang kosog sa paglilingkod ki Jehova! (Tal. 20:29) Kun ika aki pa, paano mo daw ikapaheheling an saimong kaigotan para ki Jehova durante kan espesyal na mga bulan na ini nin aktibidad?
16 Kun bako ka pang sarong dai pa bautisadong parahayag sa kongregasyon, puede daw na hingoahon mong maabot an pribilehiong iyan? Ihapot sa sadiri an minasunod na mga hapot: ‘Igwa daw ako nin pundamental na kaaraman sa katotoohan sa Biblia? Gusto ko daw na makikabtang sa paglilingkod sa Kahadean? Arogan daw ako sa sakong gawe-gawe? Personal ko daw na ikinapahahayag an sakong pagtubod paagi sa pagtaram sa iba manongod sa maogmang bareta? Namomotibar daw ako gikan sa sakong puso na gibohon iyan?’ Kun masisimbag mo nin iyo an mga hapot na iyan, kun siring kaolayon mo an saimong mga magurang manongod sa pagmawot mo na magin parahayag. Puedeng kaolayon kan mga magurang mo an saro sa kamagurangan na nasa komite sa paglilingkod.
17 Kun ika parahayag na kan maogmang bareta, maaaprobetsaran mo daw an mga panahon na daing klase tanganing dagdagan an saimong pakikikabtang sa ministeryo? Paagi sa marahay na iskedyul asin tabang nin mga magurang asin nin iba pa, dakol na bautisadong hoben an nakapag-auxiliary payunir durante kan bakasyon sa tig-init. Kun iyan bakong posible, kun siring magin determinado na dugangan an saimong pakikikabtang sa ministeryo sa langtad. Magbugtak nin pasohan para sa saimong sadiri. Dugang pa sa pasohan na oras, magbugtak nin saro pang pasohan na konektado sa kualidad kan saimong ministeryo. Puede mo gayod na hingoahon na magbasa nin sarong teksto sa kada pinto, paoswagon an kualidad kan saimong mga pagdalaw liwat, ponan an sarong pag-adal sa Biblia, o idagdag sa saimong ministeryo an paghuhulit paagi sa telepono o iba pang kabtang kan paglilingkod. Kumusta man an pasohan na ikaiba mo sa Memorial ngonyan na taon an sarong kataed, kaeskuela, o paryente? An lubos na pakikikabtang sa teokratikong mga aktibidad magigin nakakokontento asin seguradong maparigon sa boot kan iba sa kongregasyon.—1 Tes. 5:11.
18 Tabangan an mga Bagohan na Umoswag: Durante kan nakaaging taon nin paglilingkod, pinamayohan an promedyong 97,456 na pag-adal sa Biblia kada bulan sa Pilipinas. Pag-abot nin panahon, dakol sa mga inaadalan na ini an maoswag sagkod sa punto nin pagdusay asin bautismo. Minsan siring, bago ninda maabot an pasohan na iyan, kaipuhan na tabangan niato sinda na makualipikar bilang mga parahayag kan maogmang bareta. Importanteng tangga ini sa pagtokdo sa mga bagohan na magin mga parasunod ni Jesu-Cristo. (Mat. 9:9; Luc. 6:40) May inaadalan daw kamo sa Biblia na andam nang gibohon iyan?
19 Kun dai kamo nakasesegurado sa pag-oswag kan inaadalan nindo, hagadon an tabang kan saindong paraataman sa pag-adal sa libro o kan paraataman sa paglilingkod. Puede gayod nindo siang imbitaran na umiba sa pag-adal. An mga tugang na lalaking ini may mahalagang kabatidan na puedeng gamiton sa pag-ebalwar sa espirituwal na pag-oswag kan inaadalan. Tibaad may mga suhestion sinda na makatatabang sa inaadalan na padagos na umoswag sa espirituwal.
20 Kun an inaadalan nindo nagpapahayag nin interes na magin dai pa bautisadong parahayag asin sa pagmate nindo kualipikado na sia, kaolayon an nangengenot na paraataman. Iaareglo nia na kaolayon kamo asin an inaadalan nindo nin duwang magurang sa kongregasyon tangani na estudyaran kun baga kualipikado na sia, na ginagamit an impormasyon na nasa pahina 98-9 kan librong Our Ministry. (Helingon an The Watchtower, Nobyembre 15, 1988, pahina 17.) Kun an inaadalan aprobado nang magin parahayag, maninigo nindong ponan tolos-tolos an pagsasanay sa saiya. Oras na tumao na sia nin report sa paglilingkod sa langtad, ipapaisi sa kongregasyon na an inaadalan saro nang dai pa bautisadong parahayag. Linalaoman niato na rinibong bagohan na parahayag, hoben sagkod gurang, an makaaabot sa makahulogan na pangyayaring ini durante kan espesyal na mga bulan nin aktibidad.
21 An Pagplano Nakatatabang na Magibo an Pinakadakulang Karahayan: An pagplano antes pa makakokontribwir sa kapangganahan kan satong teokratikong mga aktibidad durante kan panahon na ini nin Memorial. (Tal. 21:5) Dakol na bagay an kaipuhan na tawan nin atension kan kamagurangan.
22 Tangani na matabangan an kongregasyon na magibo an pinakadakol sa ministeryo sa langtad, maninigo na an kamagurangan gumibo nin praktikal na mga areglo na magkaigwa nin mga pagtiripon bago lumuwas sa paglilingkod sa langtad sa bilog na semana asin sa katapusan kan semana. An paraataman sa paglilingkod an maninigong mangenot sa paggibo kan mga areglong ini. Puede daw na iareglo an dagdag pang mga pagtiripon bago lumuwas sa amay na aga, kun pabanggi na, o sa amay na banggi? Maninigong ipaisi sa kongregasyon an mga areglong ini. Tibaad makatabang kun ipapaskil an iskedyul sa information board.
23 Maninigong seguradohon kan kamagurangan na nagibo na an mga areglo para sa Memorial haloy pa bago an Abril 16. Kaiba digdi an pakikoordinar manongod sa paggamit kan Kingdom Hall sa iba pang mga kongregasyon na tibaad matiripon dian, paglinig kan Kingdom Hall, pagpili kan mga attendant asin serbidor, asin pagkua kan mga emblema. Maninigong ipaisi sa kongregasyon an oras asin lugar kan Memorial asin an ano man na pagliliwat sa iskedyul nin mga pagtiripon para sa semanang iyan. An mahigos na pag-asikaso sa mga bagay na ini matogot na an selebrasyon “mangyari sa disente asin aregladong paagi.”—1 Cor. 14:40.
24 Tibaad booton kan mga payo nin pamilya na gamiton an sarong kabtang kan saindang pampamilyang pag-adal sa pag-oolay kun paano makapakikikabtang an pamilya sa dinugangan na aktibidad durante kan panahon nin Memorial. Makakapag-auxiliary payunir daw an bilog nindong pamilya? O masusuportaran daw kan pamilya an saro o labi pang miembro na magibo iyan? Kun iyan bakong posible, magbugtak nin espesipikong mga pasohan bilang pamilya na gumamit nin mas dakol na oras sa ministeryo. Igwa daw nin aki pang miembro nin pamilya na, paagi sa dikit na pagparigon sa boot asin tabang, puedeng makualipikar bilang dai pa bautisadong parahayag? Pira daw an maiimbitaran kan pamilya nindo sa Memorial ngonyan na taon? An marahay na pagplano magtatao nin dakol na bendisyon asin kagayagayahan sa pamilya nindo.
25 Lubos na Aprobetsaran an Natatada Pang Panahon: Sa pagsurat sa mga Kristiano kan enot na siglo, ipinagirumdom sa sainda ni apostol Pedro an pagkaapurado kan mga panahon huli ta harani na an katapusan kan Judiong sistema nin mga bagay. (1 Ped. 4:7) Ngonyan an gabos na ebidensia nagpaparisa na harani na an katapusan kan presenteng panglobong sistema nin mga bagay. Aroaldaw, maninigong ipabanaag kan satong ugale sa buhay an kombiksion na iyan. Bilang maigot na mga lingkod ni Jehova, maninigo na kita nakakonsentrar sa apuradong gibohon na pagpahayag kan maogmang bareta.—Tito 2:13, 14.
26 Ngonyan na an panahon na ipaheling an kaigotan asin aksion! Horophoropon an ginibo ni Jehova para sa saindo, sa saindong pamilya, asin sa kongregasyon. Minsan ngani nungka kitang makakabayad sa saiya sa kadakol na paagi na tinabangan nia kita, ikatatao niato ki Jehova an bilog na kalag na pagsamba. (Sal. 116:12-14) An satong maigot na mga paghihingoa babalosan nin mga bendisyon hale sa kaitaasan. (Tal. 10:22) Logod na kita gabos magin “maigot para sa marahay” durante kan espesyal na panahon na ini nin dinugangan na aktibidad, “tanganing sa gabos na bagay an Dios mapamuraway paagi ki Jesu-Cristo.”—1 Ped. 3:13; 4:11.
[Kahon sa pahina 3]
Nag-atender sa Memorial sa Bilog na Kinaban
1999 14,088,751
2000 14,872,086
2001 15,374,986
2002 15,597,746
[Kahon sa pahina 4]
Siisay an Iimbitaran Mo sa Memorial?
□ An mismong pamilya mo asin mga paryente
□ Mga kataed asin kamidbid
□ Mga katrabaho asin kaeskuela
□ Mga dinadalaw liwat asin inaadalan sa Biblia
[Kahon sa pahina 5]
Tabangan an mga Maatender sa Memorial
□ Ipaabot an maogmang pag-ako
□ Gumibo nin mga pagdalaw liwat
□ Alokan sinda nin pag-adal sa Biblia
□ Imbitaran sinda sa espesyal na pahayag
[Kahon sa pahina 6]
Ano an mga Pasohan Mo sa Panahon nin Memorial?
□ Mapaatender sa Memorial an saro na inimbitaran mo
□ Makualipikar bilang parahayag kan maogmang bareta
□ Magamit an sarong pihong kabilangan nin oras sa ministeryo
□ Umoswag sa sarong kabtang kan ministeryo
□ Maglingkod bilang auxiliary payunir