“Lubos na Magpatotoo sa Maogmang Bareta”
1. Anong maogmang bareta an kaipuhan niatong isabi sa iba?
1 Sa sarong kinaban na bihira an maogmang bareta, igwa kita kan pribilehio “na lubos na magpatotoo sa maogmang bareta manongod sa dai na kutana maninigong kabootan nin Dios.” (Gibo 20:24) Kaiba digdi an pagsabi sa mga tawo na an “huring mga aldaw” madali nang salidahan kan matanos na bagong kinaban ni Jehova, na dian “an enot na mga bagay [magigin] nakalihis na.” (2 Tim. 3:1-5; Kap. 21:4) Sa panahon na iyan dai na magkakaigwa nin helang. (Isa. 33:24) An nagadan na mga namomotan maruluwas sa mga lolobngan na girumdoman asin makakaibanan giraray nin mga kapamilya saka katood. (Juan 5:28, 29) An bilog na daga gigibohon na magin sarong magayon na paraiso. (Isa. 65:21-23) Ini pira sanang halimbawa kan maogmang bareta na kaipuhan niatong isabi sa iba!
2. Taano ta an panahon kan Memorial sarong marahayon na oportunidad na magpatotoo sa maogmang bareta?
2 An mga bulan nin Marso, Abril, asin Mayo magigin marahayon na mga oportunidad na magpahayag kan siring na maogmang bareta. Durante kan mga bulan na ini an kamugtakan kan panahon asin an mas halawig na mga oras na maliwanag sa dakol na parte kan kinaban paborable para sa paggamit nin mas dakol na panahon sa ministeryo. Dugang pa, an pinakamahalagang okasyon kan taon, an Memorial, iseselebrar sa bilog na kinaban pakasolnop kan saldang sa Sabado, Marso 22. Ngonyan na an panahon na pumoon sa pag-andam na dugangan an satong aktibidad.
3. Ano an makakatabang sa sato na dugangan an satong aktibidad bilang mga pamilya?
3 Mag-auxiliary Payunir: Ikakaareglo daw nindo an saindong iskedyul na mag-auxiliary payunir nin saro, duwa, o gabos na tolong bulan? Taano ta dai gumamit nin panahon sa sunod na pampamilyang pag-adal nindo tanganing pag-olayan an bagay na ini? Paagi sa marahay na kooperasyon, an saro o labi pang kapamilya tibaad makapag-auxiliary payunir. (Tal. 15:22) Ipamibi an bagay na ini, asin helingon kun paano binebendisyonan ni Jehova an saindong mga paghihingoa. (Tal. 16:3) Dawa kun mayo nin makakapag-auxiliary payunir sa pamilya, an gabos na kapamilya puedeng gumibo nin espesipikong mga pasohan tanganing dugangan an saindang pakikikabtang sa ministeryo mantang nakikiiba sa mga makakapagpayunir.
4. Paano niato ikakaiskedyul an satong mga gibohon tanganing mag-auxiliary payunir kun kita may bilog na panahon na trabaho?
4 Kun kamo may bilog na panahon na trabaho, an marahay na iskedyul puedeng makatabang na makapag-auxiliary payunir kamo. Tibaad puede nindong gamiton an kabtang kan saindong pahingalo sa udto tanganing maghulit. O puede kamong kumua nin personal na teritoryo harani sa saindong istaran o pinagtatrabahohan asin makikabtang sa ministeryo sa laog nin sarong oras o labi pa bago o pakatapos nin trabaho. Puede kamong magkaigwa nin dugang pang panahon sa saindong iskedyul kun gigibohon nindo sa ibang bulan an bakong mahalagang mga aktibidad asin kun magamit kamo nin bilog na mga aldaw sa ministeryo sa mga katapusan kan semana. An nagkapira nakapagbakasyon sa trabaho nin saro o duwang aldaw tanganing gamiton sa paglilingkod sa langtad.
5. Paano kamo puedeng tumabang sa mga may edad na o maluya an hawak tanganing sinda makapag-auxiliary payunir?
5 Kun kamo may edad na o maluya an hawak o limitado an kosog, tibaad makapag-auxiliary payunir kamo paagi sa paggamit nin kadikit na panahon kada aldaw sa ministeryo. Hagadon ki Jehova na logod tawan kamo nin “puersa na labi sa ordinaryo.” (2 Cor. 4:7) Sarong tugang na babae an nakapag-auxiliary payunir sa edad na 106! Sa tabang kan saiyang Kristianong mga paryente asin mga kakongregasyon, sia naghulit sa harong-harong, nagdalaw liwat, nagkondukta nin mga pag-adal sa Biblia, asin nakikabtang sa iba pang aspekto kan ministeryo. Nagtabang sia sa pagpoon nin mga pag-adal sa Biblia sa sampulong tawo. “Mantang iniisip ko an marahayon na pribilehio ko na maglingkod bilang auxiliary payunir,” an sabi nia, “an sakong puso pano-pano nin pagkamoot asin pag-apresyar ki Jehova, sa saiyang Aki, asin sa Saiyang mamomoton na organisasyon. Talagang gusto kong sabihon, ‘mabalos, Jehova!’”
6. Paano posible para sa bautisadong mga hoben na nag-eeskuela pa na mag-auxiliary payunir?
6 Kun ika sarong bautisadong hoben na nag-eeskuela pa, tibaad puede ka man na magpalista bilang auxiliary payunir. Arog kan mga nagtatrabaho nin bilog na panahon, tibaad gagamiton mo sa pangenot an mga katapusan kan semana para sa saimong iskedyul sa ministeryo. Tibaad puede ka man na magluwas sa laog nin sarong oras o labi pa pakatapos nin klase sa nagkapirang aldaw. Igwa daw nin bakasyon sa eskuelahan na magagamit mo sa pakikikabtang sa ministeryo? Kun gusto mong mag-auxiliary payunir, ipakipag-olay iyan sa saimong mga magurang.
7. Ano an puedeng gibohon kan kamagurangan tanganing dugangan an entusiasmo para sa ministeryo sa panahon kan Memorial?
7 Pakosogon an Entusiasmo: Dakula an magigibo kan kamagurangan tanganing pakosogon an entusiasmo kan kongregasyon paagi sa saindang halimbawa. (1 Ped. 5:2, 3) Puede sindang magdesisyon na mag-iskedyul nin dugang pang mga pagtiripon bago maglingkod sa langtad para sa mga makikikabtang sa ministeryo sa amay na aga, pakatapos nin klase, o pakatapos nin trabaho. Maninigong siertohon kan paraataman sa paglilingkod na may kualipikadong mga parahayag na inasignar na mangenot asin na igwa nin igong teritoryo saka mga magasin patin literatura na makukua para sa mga bulan na ini nin espesyal na aktibidad.
8. Ano an manonodan niato sa eksperyensia nin sarong kongregasyon?
8 Sa sarong kongregasyon, nagpoon an kamagurangan na dagkahon an pag-auxiliary payunir nagkapirang bulan antes pa. Ipinapaisi ninda sa kongregasyon kada semana kun pirang parahayag an naaprobaran na mag-auxiliary payunir. Inasegurar kaini an mga nagmamawot na dugangan an saindang pakikikabtang sa ministeryo na dakol sindang makakaibanan sa paglilingkod. Nag-areglo nin dugang pang mga pagtiripon bago maglingkod sa langtad para sa amay na aga asin sa banggi. An resulta iyo na 53 na parahayag an nag-auxiliary payunir kan Abril, haros kabanga kan kongregasyon!
9. Taano ta an panahon kan Memorial marahayon na panahon, para sa mga kualipikado, na pumoon na magin parahayag kan maogmang bareta?
9 Tabangan an Iba na Maghulit: Kun an mga bagohan asin hoben kualipikado nang magin parahayag, puede sindang imbitaran na maglingkod sa langtad kaiba nin eksperyensiadong mga parahayag. An siring na oportunidad puedeng mangyari sa panahon kan Memorial na dakol sa kongregasyon an dudugangan an saindang aktibidad. Igwa daw kamo nin progresibong inaadalan sa Biblia na inoyon na an saiyang buhay sa matanos na mga pamantayan ni Jehova? Igwa daw kamo nin toltol na mga aki na may marahay na pag-oswag alagad bako pang mga parahayag? Kun sinda nagsabi na gusto na nindang magin dai pa bautisadong parahayag asin naniniwala kamo na kualipikado na sinda, kun siring sabihon iyan sa saro sa kamagurangan. Iaareglo kan nangengenot na paraataman na duwang magurang sa kongregasyon an makikipag-olay kan bagay na iyan sa saindo asin sa saindong aki o inaadalan sa Biblia.
10. Ano an magigibo kan kamagurangan tanganing tabangan an mga inaktibo?
10 An maabot na mga bulan magigin marahayon man na panahon para sa mga nagin inaktibo na ponan liwat an saindang aktibidad kaiba kan kongregasyon. An mga paraataman sa Pag-adal sa Libro kan Kongregasyon asin an iba pang kamagurangan maninigong odok na maghingoa na dalawon sinda saka maogmang personal na agdahon na ibanan sinda sa ministeryo. Kun sinda nagin nang inaktibo sa laog nin halawig na panahon, maninigong kaolayon nguna sinda nin duwang magurang sa kongregasyon tanganing determinaran kun kualipikado sinda.—km 11/00 p. 7.
11. Ano an kadarudakulaing kapahayagan kan “dai na kutana maninigong kabootan nin Dios”?
11 Mag-andam Para sa Memorial: An pantubos iyo an kadarudakulaing kapahayagan kan “dai na kutana maninigong kabootan nin Dios.” (Gibo 20:24) Minilyon na mapag-apresyar na tawo sa bilog na kinaban an matiripon sa Sabado, Marso 22, pakasolnop kan saldang, tanganing iselebrar an Memorial kan kagadanan ni Cristo. Gusto niatong imbitaran asin tabangan an gabos na sadiosan an puso na umatender sa mahalagang okasyon na ini na nagpapatotoo sa dai na kutana maninigong kabootan ni Jehova sa katawohan.
12. Siisay an maninigo niatong imbitaran sa Memorial?
12 Gumibo nin lista kan mga gusto nindong imbitaran. Daing duda na kaiba sa saindong lista an mga paryente, kataed, kamidbid sa trabaho o eskuelahan, mga inaadalan sa Biblia kaidto asin ngonyan, saka an gabos na iba pang dinadalaw nindo nin regular. Kun an nagkapira sa mga iimbitaran nindo may mga hapot manongod sa Memorial, tibaad makatabang na gamiton nindo an artikulo sa apendise mapadapit sa Pamanggihan kan Kagurangnan, na nasa pahina 206-8 kan librong Itinotokdo kan Biblia. Tibaad makapoon pa ngani kamo nin pag-adal sa Biblia, huling matao ini sa saindo nin oportunidad na iintrodusir an publikasyon na ginagamit niato sa pagkondukta nin mga pag-adal sa Biblia.
13. Paano binendisyonan ni Jehova an mga paghihingoa nin duwang parahayag na nagdesisyon na imbitaran an iba sa Memorial?
13 An sarong tugang na babae naggibo nin lista nin 48 pamilya na iimbitaran. Pagnaimbitaran na nia sinda, kinukuritan nia an mga ngaran ninda asin isinusurat an petsa na inimbitaran nia sinda. Ogmahon nanggad sia na 26 katawo na inimbitaran nia an nag-atender sa Memorial! Inimbitaran nin sarong tugang na lalaki na may sadiring tindahan an sarong empleyado na dating padi. An lalaki nag-atender asin pagkatapos nagkagsing, “Mas dakol an nanodan ko manongod sa Biblia sa laog nin sarong oras kisa sa nanodan ko sa 30 taon ko bilang Katoliko.” Dai nahaloy pakatapos kan Memorial, nag-ako sia nin pag-adal sa librong Itinotokdo kan Biblia.
14. Anong pambilog na kinaban na kampanya an mapoon sa Marso 1?
14 Kampanya: Poon sa Sabado, Marso 1, sagkod Marso 22, ididistribwir sa bilog na kinaban an sarong espesyal na imbitasyon sa Memorial. Gugustohon nin gabos na lubos na makikabtang sa mahalagang kampanyang ini. Mas marahay na personal na tawan nin imbitasyon an kagharong kisa iwalat sana iyan sa pinto. Minsan siring, kun dakula an teritoryo nindo, puedeng magdesisyon an kamagurangan na mapagmansay na iwalat an mga imbitasyon sa mga harong na mayong tawo. Sa mga katapusan kan semana iaalok man niato an bagong mga magasin.
15. Paano niato puedeng ipresentar an imbitasyon sa Memorial?
15 Huling limitado an satong panahon na magdistribwir kan mga imbitasyon, pinakamarahay na magin halipot sana an pagpresentar kaiyan. Magin makikatood asin entusiastiko. Puede nindong sabihon an arog kaini: “Gusto ming siertohon na maimbitaran kamo, an saindong mga kapamilya, asin an saindong mga katood sa sarong mahalagang okasyon na gigibohon sa Marso 22. Ini an saindong imbitasyon. Nakaimprenta sa imbitasyon an mga detalye.” Tibaad may mga hapot an kagharong. O tibaad akoon nia an imbitasyon asin sabihon pa ngani na maatender sia. Isurat an manongod sa interes na ipinaheling, asin iareglo na magdalaw liwat.
16. Anong eksperyensia an nagpapaheling kan kahalagahan kan kampanya na imbitaran sa Memorial an mga tawo sa teritoryo?
16 Kan nakaaging taon nanompongan nin sarong soldados sa saiyang pinto an imbitasyon sa Memorial. Nagdesisyon siang umatender alagad kaipuhan niang humagad nin permiso sa saiyang sarhento. Kan ipaheling nia sa sarhento an imbitasyon, an sarhento dai naggirong dangan nagsabi na mga Saksi an saiyang mga magurang asin dati siang nag-aatender sa mga pagtiripon kaiba ninda. Bako sanang tinogotan kan sarhento na umatender an soldados kundi inibanan man nia ini sa Memorial!
17. Paano niato ipinapaheling na dai niato nalipasan an katuyohan kan dai na kutana maninigong kabootan nin Dios?
17 Magpaheling nin Pag-apresyar: Mantang nagdadangadang an panahon kan Memorial sa 2008, logod na an lambang saro sa sato maghorophorop manongod sa dai na kutana maninigong kabootan ni Jehova para sa sato. Si apostol Pablo nagsurat: “Nakikimaherak man kami sa saindo na dai nindo akoon an dai na kutana maninigong kabootan nin Dios asin lipasan an katuyohan kaiyan.” (2 Cor. 6:1) Paano niato ikakapaheling na dai niato nalipasan an katuyohan kan dai na kutana maninigong kabootan nin Dios? Nagsurat si Pablo: “Kundi sa lambang paagi irinerekomendar niamo an samong sadiri bilang mga ministro nin Dios.” (2 Cor. 6:4) Kun siring, ipinapaheling niato an pag-apresyar sa regalo ni Jehova paagi sa satong marahay na gawe-gawe asin maigot na paghuhulit kan maogmang bareta. Sa panahon na ini kan Memorial magkakaigwa kita nin marahayon na oportunidad na dugangan an satong aktibidad, na lubos na nagpapatotoo sa maogmang bareta.
[Kahon sa pahina 3]
Siisay an Puedeng Kaiba sa mga Makakapag-Auxiliary Payunir?
◼ Mga pamilya
◼ Mga nagtatrabaho nin bilog na panahon
◼ Mga gurang na asin maluya an hawak
◼ Mga nag-eeskuela
[Kahon sa pahina 4]
Kun Nagdidistribwir nin mga Imbitasyon sa Memorial:
◼ Halipot sana an sabihon; magtaram na may entusiasmo
◼ Isurat an manongod sa interes asin magdalaw liwat
◼ Mag-alok nin mga magasin sa mga katapusan kan semana