An Panahon nin Memorial—Oportunidad Para sa Mas Dakol na Aktibidad!
1. Ano an mga dahelan niato na pag-isipan na dugangan an satong aktibidad sa Marso, Abril, asin Mayo?
1 Puede daw nindong dugangan an saindong pakikikabtang sa ministeryo sa nagdadangadang na panahon nin Memorial? An kadaklan na lugar makakaeksperyensia nin marahay na panahon sa mga bulan na iyan. An nagkapirang parahayag magkakaigwa nin bakasyon sa trabaho o sa eskuelahan na magagamit ninda sa ministeryo. Poon Abril 2, maogma kitang makikikabtang sa espesyal na kampanya tanganing imbitaran an mga interesado na mag-atender sa Memorial sa Abril 17. Pagkatapos kaiyan, hihingoahon niato na pataluboon an interes kan mga nag-atender asin iimbitaran niato sinda sa espesyal na pahayag na itatao sa semana nin Abril 25. Tunay nanggad, dakol an dahelan na pag-isipan na dugangan an satong aktibidad sa Marso, Abril, asin Mayo.
2. Ano an sarong marahayon na paagi na makagibo nin orog pa sa satong ministeryo?
2 Pag-auxiliary Payunir: An sarong marahayon na paagi na makagibo nin orog pa iyo an pag-auxiliary payunir. Huling kita gabos sibot, ini sa pangkagabsan nangangaipo nin pagplano asin mga pagbabago sa iskedyul niato. (Tal. 21:5) Tibaad puede nindong ioktaba nguna an nagkapirang bakong mahalagang aktibidad sa saindong normal na rutina. (Fil. 1:9-11) Taano ta dai nindo sabihon sa ibang kakongregasyon nindo an saindong pagmawot na magpayunir tanganing maaraman nindo kun puede ninda kamong ibanan bilang auxiliary payunir?
3. Paano ikakaareglo nin mga pamilya na dugangan an saindang aktibidad?
3 Sa sunod nindong Pampamilyang Pagsamba, marahay na pag-olayan an saindong mga pasohan bilang pamilya. (Tal. 15:22) Paagi sa kooperasyon, tibaad an nagkapirang miembro kan pamilya makakapag-auxiliary payunir nin sarong bulan o labi pa. Paano kun madeterminaran nindo na bako nanggad ini posible? Puede pa man giraray iareglo kan pamilya na dugangan an saindang aktibidad paagi sa pakikikabtang sa ministeryo sa nagkapirang banggi o pagdagdag nin oras sa ministeryo sa mga katapusan kan semana.
4. Anong mga bendisyon an ibubunga kun dudugangan niato an satong aktibidad sa ministeryo sa panahon nin Memorial?
4 Naheheling ni Jehova an gabos niatong ginigibo na paglingkodan sia asin pinapahalagahan nia an satong mga sakripisyo. (Heb. 6:10) An pagtao ki Jehova asin sa iba nagbubunga nin kagayagayahan. (1 Cron. 29:9; Gibo 20:35) Puede daw nindong dugangan an saindong aktibidad sa panahon nin Memorial asin anihon an ibinubunga kaiyan na orog na kagayagayahan saka mga bendisyon?