Padagos na Ipahayag an Makangangalas na mga Gibo ni Jehova

1. Ano an nagkapira sa makangangalas na mga gibo ni Jehova na partikularmenteng inaapresyar nindo?

¹ Mayo nin makakabaing sa satong dakulang Dios, si Jehova! Nagsurat si David: “Dakol na bagay an saimo mismong ginibo, O Jehova na sakong Dios, an saimo nganing makangangalas na mga gibo asin an saimong mga paghorophorop sa samo; mayo nin ikakabaing sa saimo.” (Sal. 40:5) Kaiba sa makangangalas na mga gibo ni Jehova an paglalang kan uniberso, an Mesiyanikong Kahadean, an mga gibo nin mamomoton na kabootan sa saiyang banwaan, asin an pambilog na kinaban na kampanya nin paghuhulit. (Sal. 17:​7, 8; 139:14; Dan. 2:​44; Mat. 24:14) An pagkamoot ki Jehova asin an pag-apresyar sa gabos na ginibo nia nakadadagka sa sato na ipahayag sa iba an manongod sa saiya. (Sal. 145:​5-7) Durante sa Marso, Abril, asin Mayo, magkakaigwa kita nin oportunidad na gibohon ini nin mas lubos.

2. Paano kita personalmenteng nakikinabang paagi sa pag-auxiliary payunir?

² Bilang Auxiliary Payunir: Puede daw nindong iareglo an saindong iskedyul na gumamit nin 50 oras sa ministeryo durante nin saro o labi pa sa mga bulan na ini nin espesyal na aktibidad? Seguradong magigin bawi an ano man na mga pagliwat na gigibohon nindo sa saindong rutina. (Efe. 5:16) Nanompongan nin dakol na nakakatabang sa sainda an pag-auxiliary payunir sa pagpaoswag kan kualidad kan saindang ministeryo. Nagigin mas pamugtak an boot ninda sa mga harong asin orog na ginagamit ninda an Biblia. An paggamit nin dakol na panahon sa ministeryo pinagigin mas pasil na mabalikan an interesado na nanonompongan ninda, asin an nagkapira na dai pa nakapamayo kan nakaagi nin pag-adal sa Biblia nakapoon na nin saro mientras na nag-o-auxiliary payunir. Huling kalabot sa pag-auxiliary payunir an paghihingoa na tabangan an iba, iyan sarong magayagayang aktibidad.​​—Gibo 20:35.

3. Paano an nagkapira nahimong mag-auxiliary payunir dawa may depisil na mga sirkonstansia?

³ Dai tolos magkonklusyon na an mga sirkonstansia nindo dai matogot sa saindo na makikabtang. An sarong magurang sa kongregasyon na nag-auxiliary payunir kan nakaaging taon igwa nin duwang aki asin sarong bilog na panahon na trabaho. Paano daw iyan nagibo kan sibot na tugang na ini? Mantang nagtatrabaho sia durante kan semana, nagplano sia nin bilog na mga aldaw sa paglilingkod sa mga katapusan kan semana, na minapoon paagi sa paghuhulit sa tinampo sa alas 7:00 n.a. kun mga Sabado. An nagkapira sa kongregasyon na may kaparehong mga sirkonstansia nagpayunir man, asin sinda nagsinuportaran asin nagparinigonan nin boot. Sa saro pang kongregasyon, an sarong 99 anyos na tugang na babae nagdesisyon na magpayunir kan Mayo pakatapos na imbitaran kan aki niang babae na umiba sa saiya. Tinabangan kan iba sa kongregasyon an may edad nang tugang na babaeng ini sa pagharongharong asin sa mga pag-adal sa Biblia paagi sa pagbusol kan saiyang silyang de rueda. Nakikabtang man sia sa paghuhulit paagi sa telepono, paghuhulit sa tinampo, asin pagsurat. Kombensido sia na ini nagibo, bakong huli sa sadiri niang kosog, kundi solamente sa tabang ni Jehova.​​—Isa. 40:29-​31.

4. Anong mga bagay an puede niatong konsideraron kun naggigibo nin iskedyul sa pag-auxiliary payunir?

⁴ Probaran na gumibo nin sarong iskedyul na angay na marhay sa saindong mga sirkonstansia. An sampol nin mga iskedyul sa isyung ini puedeng makatabang. Kamo daw bilog na panahon na nagtatrabaho o nag-eeskuela? An iskedyul na ginagamit sa pangenot an mga katapusan kan semana an tibaad pinakapraktikal para sa saindo. Kun may mga problema kamo sa salud asin an kosog nindo dai nagtotogot nin bilog na mga aldaw sa ministeryo, tibaad pinakamarahay an sarong iskedyul na naghahagad na gumamit nin dikit na oras kada aldaw. Makipag-olay sa iba manongod sa saindong pagmawot na mag-auxiliary payunir. Tibaad gibohon man ninda iyan na pasohan ninda.

5. Anong mga pasohan an puedeng ibugtak nin mga hoben para sa Marso, Abril, asin Mayo?

⁵ Mga Paagi na Makapakikikabtang an mga Hoben: Naoogma si Jehova kun an mga hoben nagpapahayag kan saiyang makangangalas na mga gibo. (Sal. 71:17; Mat. 21:16) Kun kamo hoben asin bautisado na, tibaad puede kamong mag-auxiliary payunir durante nin saro o labi pang mga bulan kan saindong bakasyon sa eskuelahan. Kun dai kamo makapaglilingkod bilang auxiliary payunir, puede daw kamong gumibo nin espesipikong mga pasohan na dagdagan an pakikikabtang nindo asin paoswagon an kualidad kan ministeryo nindo durante kan mga bulan na ini? Kun nakikikabtang na kamo sa ministeryo kaiba kan mga magurang nindo alagad bako pang dai pa bautisadong parahayag, ngonyan na an paborableng panahon na pagmaigotan na makualipikar. Dai nindo kaipuhan na honaon na dapat kamong magin eksperto sa pagsimbag sa mga hapot sa Biblia o na kaipuhan na dakol kamong aram siring kan bautisadong mga nasa edad na. Nasasabotan daw nindo an pundamental na mga katokdoan sa Biblia? Sinususog daw nindo an moral na mga pamantayan kan Biblia? Gusto daw nindong mamidbid bilang saro sa Mga Saksi ni Jehova? Kun siring kaolayon an mga magurang nindo manongod kaini. Puede nindang iareglo na dolokon an kamagurangan kaiba nindo tangani na maaraman kun naaabot na nindo an mga kahagadan.​​—Helingon an librong Our Ministry, pahina 98-9.

6. Paano niato matatabangan an mga inaadalan sa Biblia na magin mga parahayag kan maogmang bareta?

⁶ Pagtabang sa Iba na Maghulit: An progresibong mga inaadalan sa Biblia puedeng makualipikar na umiba sa sato bilang mga parahayag durante kan nagdadangadang na mga bulan nin espesyal na aktibidad. Kun kamo may inaadalan sa Biblia na marahay an pag-oswag, hagadon an tabang kan saindong paraataman sa pag-adal sa libro o kan paraataman sa paglilingkod. An saro sa sainda puedeng umiba sa saindo sa pag-adal tangani na ebalwaron an pag-oswag kan inaadalan. Kun makualipikar an inaadalan asin nagmamawot sia na magin sarong parahayag, puedeng iareglo kan nangengenot na paraataman an duwang magurang na kaolayon kamo asin an inaadalan. (Helingon An Torrengbantayan na Disyembre 1, 1988, pahina 15.) Oras na maaprobaran an inaadalan, ponan tolos-tolos an pagsasanay sa saiya sa ministeryo.

7. Paano puedeng tabangan an iregular asin inaktibong mga parahayag?

⁷ Bobooton kan mga paraataman sa pag-adal sa libro na magtao nin espesyal na atension sa siisay man na inaktibo o iregular sa saindang grupo. Personal na imbitaran sinda na umiba sa saindo sa ministeryo. Kun sinda haloy nang panahon na inaktibo, mas marahay na kaolayon nguna sinda nin duwang magurang tangani na helingon kun kualipikado sinda. (Helingon an “Hapot” sa An Satong Ministeryo sa Kahadean na Nobyembre 2000.) An kaigotan kan kongregasyon durante kan mga bulan na ini nin espesyal na aktibidad puedeng makapukaw sa sainda na gibohon giraray an ministeryo na magin regular na kabtang kan saindang buhay.

8, 9. Ano an puedeng gibohon nin kamagurangan tangani na pataluboon an entusiasmo para sa espesyal na aktibidad?

⁸ Mag-andam na Ngonyan Para sa Dinugangan na Aktibidad: Kamagurangan, pumoon na ngonyan na pataluboon an entusiasmo sa kongregasyon para sa pag-auxiliary payunir. Dakol kamong magigibo paagi sa saindong positibong mga komento asin marahay na halimbawa. (1 Ped. 5:3) Ano an nakaaging pinakahalangkaw na kabilangan nin auxiliary payunir kan kongregasyon? Puede daw iyan na malabihan ngonyan na taon? An mga paraataman sa pag-adal sa libro asin an mga katabang ninda maninigong humanap nin mga paagi na maenkaminar an gabos sa grupo na dugangan an aktibidad ninda. An mga paraataman sa paglilingkod puedeng mag-iskedyul nin dagdag na mga pagtiripon bago maglingkod sa langtad. Ipatalastas sa kongregasyon nin patienot kun ano an iinareglo. Seguradohon na mag-asignar nin may kakayahan na mga parahayag na mangengenot asin na ponan asin taposon na nasa oras an mga pagtiripon bago maglingkod. (Helingon an “Hapot” sa An Satong Ministeryo sa Kahadean na Setyembre 2001.) Maninigo man na iareglo kan paraataman sa paglilingkod na magkaigwa nin supisyenteng teritoryo, mga magasin, asin literatura.

⁹ Kan nakaaging taon an kamagurangan nin sarong kongregasyon nagpoon nin entusiastiko asin amay pang marhay sa pag-enkaminar na mag-auxiliary payunir, na an nagkapira sa sainda nagsumitir nin mga aplikasyon. Nag-areglo sinda nin dagdag na mga pagtiripon bago maglingkod sa langtad​—an saro sa alas 5:30 n.a. para sa paghuhulit sa tinampo, an saro pa sa alas 3:00 n.h. para sa mga maretira sa eskuelahan, asin an ikatolo sa alas 6:​00 n.b. para sa mga hale sa trabaho. Dugang pa, nag-areglo nin tolong pagtiripon bago maglingkod sa langtad kun mga Sabado. Naghimate an kongregasyon kaya 66 an nagpalista bilang auxiliary payunir kan Abril!

10. Paano makapag-aandam an mga pamilya na dugangan an aktibidad ninda?

¹⁰ Taano ta dai magtagama nin panahon durante kan saindong masunod na pampamilyang pag-adal para sa paggibo nin realistikong mga pasohan para sa madatong na mga bulan? Paagi sa marahay na kooperasyon asin pagplano, an nagkapira o gabos sa pamilya tibaad mahimong mag-auxiliary payunir. Kun iyan bakong posible, magbugtak nin mga pasohan na dugangan an aktibidad nindo paagi sa pagpalawig kan dati nindong mga peryodo nin paglilingkod o paagi sa paghuhulit sa dagdag pang mga okasyon. Ipamibi iyan bilang pamilya. Makakokompiar kamo na bebendisyonan ni Jehova an mga paghihingoa nindo.​​—1 Juan 3:22.

11. (a) Anong makangangalas na mga bagay an nagibo kan atang ni Cristo? (b) Ano an oras asin lugar kan lokal na selebrasyon kan Memorial?

¹¹ An Pinakamakangangalas na Gibo nin Dios: An pinakadakulang kapahayagan nin pagkamoot ni Jehova iyo an balaog kan saiyang Aki bilang pantubos para sa sato. (1 Juan 4:​9, 10) An atang na pantubos an legal na basehan para sa pagkalda sa katawohan gikan sa kasalan asin kagadanan. (Roma 3:​23, 24) An pinabolos na dugo ni Jesus ginibong balido an bagong tipan, na pinagin posible para sa bakong sangkap na mga tawo na akoon bilang mga aki nin Dios na may paglaom na mamahala sa langitnon na Kahadean. (Jer. 31:31-​34; Mar. 14:24) An pinakaimportante, an pamumuhay ni Jesus na may sangkap na pagkuyog nagsantipikar sa ngaran ni Jehova. (Deut. 32:4; Tal. 27:11) Sa Domingo, Abril 4, pagkasolnop kan saldang, iseselebrar an Memorial kan kagadanan ni Cristo sa bilog na kinaban.

12. Paano makikinabang an mga interesado sa pag-atender sa selebrasyon kan Pamanggihan nin Kagurangnan?

¹² An selebrasyon kan Pamanggihan nin Kagurangnan ibinabantog an kadakulaan kan makangangalas na mga gibo ni Jehova. An diskurso nagpapatalubo kan pag-apresyar sa ginibo ni Jehova na pagtao kan pantubos. Maoobserbaran kan maatender na mga interesado an iba pang makangangalas na mga gibo nin Dios. Maheheling ninda an pagkasararo asin mainit na pagkamoot na itinokdo ni Jehova na ipaheling kan saiyang banwaan. (Efe. 4:​16, 22-​24; Sant. 3:​17, 18) An pag-atender sa importanteng okasyon na ini puedeng magkaigwa nin tunay na epekto sa kaisipan nin saro, kaya boot niato na magin presente an pinakadakol na mapupuede.​​—2 Cor. 5:​14, 15.

13, 14. Sairisay an maninigo niatong imbitaran sa Memorial, asin taano?

¹³ Pag-imbitar sa Iba na Umatender: Ponan tolos-tolos an pag-andam paagi sa paglista kan mga iimbitaran. Maninigong kaiba sa lista nindo an daing pagtubod na mga kapamilya, kataed, kamidbid sa trabaho o eskuelahan, inaadalan sa Biblia kan nakaagi asin sa presente, asin gabos na dinadalaw liwat nindo. Maninigo na iiba kan mga paraataman sa pag-adal sa libro sa lista ninda an siisay man na inaktibong parahayag.

¹⁴ Gamiton an inimprentang mga imbitasyon sa Memorial, asin makinilyahon o isurat dian nin maayos an oras asin lugar kan Memorial. O tibaad gusto nindong gamiton an imbitasyon na yaon sa likod na tutob kan Torrengbantayan na Marso 15, 2004, o an Awake! na Marso 22, 2004. Mantang nagdadangadang an Abril 4, pagirumdomon an mga nasa lista nindo, magsalang nin personal o paagi sa telepono.

15. Paano niato ikapaheheling an pagkamapag-istimar sa banggi kan Memorial?

¹⁵ Sa Memorial: Pagmaigotan na umabot nin amay sa banggi kan Memorial. Magpaheling nin pagkamapag-istimar paagi sa mainit na pagtaratara sa mga bagohan. (Roma 12:13) Nangorognang may paninimbagan kamo sa mga bisita na inimbitaran nindo. Maogma sindang akoon, asin iintrodusir sinda sa iba sa kongregasyon. Tibaad puede nindo sindang tabangan na makakua nin tukawan harani sa saindo. Asin kun an siisay man mayo nin Biblia o songbook, iareglo na makitaed sia saindo o sa iba. Pakatapos kan selebrasyon, magin andam na simbagon an ano man na tibaad ihapot ninda. Kun an nagkapira nag-atender sa kaenot-enote, hapoton kun baga gusto nindang makanood nin orog pa manongod sa Tataramon asin katuyohan nin Dios. Mag-alok nin pag-adal sa Biblia sa sainda.

16. Ano an magigibo tangani na tabangan an mga nag-atender na umoswag sa espirituwal?

¹⁶ Padagos na Tabangan an mga Nag-atender: Sa mga semana kasunod kan Memorial, tibaad nangangaipo nin dugang pang tabang an mga nag-atender. Kaiba digdi an mga regular na kaidto na nag-aatender sa mga pagtiripon alagad ngonyan limitado na sana an pakikiasosyar ninda sa kongregasyon. Magigin listo an kamagurangan na siertohon na an mga siring dai malaktawan, na hinihingoang aramon kun taano ta nagpondo sinda sa pag-oswag sa espirituwal. Itadom sa sainda an pagkaapurado kan mga panahon. (1 Ped. 4:7) Tabangan an gabos na maheling an kapakinabangan nin pagkuyog sa sadol sa Kasuratan na makipagtipon nin regular sa banwaan nin Dios.​​—Heb. 10:​24, 25.

17. Taano ta maninigo niatong padagos na ipahayag an makangangalas na mga gibo ni Jehova?

¹⁷ An mga gibo ni Jehova makangangalas na marhay tangani na masabotan niato nin lubos dawa kun kita mabuhay sagkod lamang. (Job 42:​2, 3; Ecl. 3:11) Kun siring, nungka kitang mawawaran nin mga dahelan para omawon niato sia. Sa panahon na ini kan Memorial ikapaheheling niato an pag-apresyar niato sa makangangalas na mga gibo ni Jehova paagi sa espesyal na paghihingoa na pahiwason an satong ministeryo.

[Tsart sa pahina 4]

Puede daw Kamong Mag-auxiliary Payunir na Ginagamit an Saro sa mga Iskedyul na Ini?

Marso D L* Ma* Mi* H B S Total sa Sambulan

Kada Aldaw 2 1 1 1 1 1 5 51

Duwang Aldaw 0 5 0 5 0 0 0 50

Abril D L Ma Mi H* B* S Total sa Sambulan

Kada Aldaw 2 1 1 1 1 1 5 50

Duwang Aldaw 0 0 0 0 5 5 0 50

Mayo D* L* Ma Mi H B S* Total sa Sambulan

Kada Aldaw 2 1 1 1 1 1 4 51

Duwang Aldaw 0 5 0 0 0 0 5 50

Mga Katapusan 3 0 0 0 0 0 7 50

* Lima sa bulan na ini