Ano an Gigibohon Niato Durante kan Taon na Ini nin Paglilingkod?
1 Mantang minalaog kita sa 1994 na taon nin paglilingkod, angay na panahon na ngonyan na kita gabos bilang banwaan ni Jehova malinaw na establisaron sa satong isip kun ano an boot niatong gibohon bilang mga indibiduwal asin bilang sarong organisasyon durante kan bagong taon na ini nin paglilingkod.
2 Padagos na Tumalubo sa Espirituwal: Kun bago pa sana kitang makiasosyar sa katotoohan, maninigo kitang magmawot na magin makosog sa pagtubod. (Heb. 6:1-3) Kun makosog na kita sa espirituwal, bako sana na maninigo niatong tabangan an mga bagohan asin an iba kundi kaipuhan man kitang magtao nin atension sa satong sadiring espirituwalidad, na nungkang nakakamate na yaon na sato gabos an kinakaipuhan na kaaraman sa Biblia asin eksperyensia sa Kristianong pamumuhay. Pinag-oolayan daw niato an pan-aroaldaw na teksto, sinusundan an programa kan pagbasa sa Biblia na itinao sa Theocratic Ministry School Schedule asin nag-aandam para sa Pag-adal sa Libro kan Kongregasyon saka sa Pag-adal sa Torrengbantayan? Iyan maninigong magin pinakakadikit na pasohan para sa sato gabos. Kaipuhan kitang padagos na tumalubo sa espirituwal kun boot niatong makaligtas sa kalaglagan kan maraot na palakaw na ini nin mga bagay asin mabuhay pasiring sa bagong kinaban nin Dios.—Ikomparar an Filipos 3:12-16.
3 Magdanay na Malinig sa Espirituwal: Tanganing magin lubos na inooyonan ni Jehova, kaipuhan kitang magin malinig sa “lambang ramog nin laman asin espiritu.” (2 Cor. 7:1) Oras na malinig na kita, taano ta bobooton pa niato liwat na ‘maglabog sa lamaw’ kan maraot na gurang na kinaban na ini? (Ikomparar an 2 Pedro 2:22.) Kaipuhan kitang magin determinado na magdanay na makosog asin malinig sa espirituwal. Kun siring dai kita magigin ignorante sa maraot na mga pakana ni Satanas asin masasaroan, na magkasala asin irayo sa pag-oyon ni Jehova.—2 Cor. 2:11.
4 Maghimate sa Madonong na Sadol: An Talinhaga 15:22 nagdodoon: “Sa kadakolan nin mga parahatol may nahahaman.” Alagad girumdomon na an tawong nagtaram kan mga tataramon na iyan, si Salomon, dai nahaloy tinogotan an ‘saiyang mga agom na babae na ikiling an saiyang puso na sumunod sa ibang mga dios’ huli ta dai sia naghinanyog sa sadol nin Dios dapit sa dai pag-agom sa mga babae na tagaibang banwaan. (1 Hade 11:1-4) Kaya sagkod na dai kita personal na maghimate sa madonong na sadol, paano kita makakalaom na magin epektibo sa paglilingkod ki Jehova o magtao nin halimbawa na angay arogon? (1 Tim. 4:15) An sadol kan Biblia matabang sato na ingatan an satong puso. (Tal. 4:23) An pagkamoot sa namomotan ni Jehova, an pagkaongis sa ikinaoongis nia, na perming hinahanap an saiyang paggiya asin an paggibo kan ikinaoogma nia siertong proteksion.—Tal. 8:13; Juan 8:29; Heb. 1:9.
5 An satong pagsamba ki Jehova bako sanang sarong klase nin diosnon na debosyon arog kan naghihingakong mga Kristiano sa kinaban, kundi mapuso, aktibo, asin buhay sono sa katotoohan na nakukua sa Tataramon nin Dios.—Juan 4:23, 24.
6 An satong determinasyon na gibohon an kabotan nin Dios puwedeng angaton sa aroaldaw. Maninigo kitang pakosogon kan kaaraman na si Jehova an magpapakosog sato. (1 Ped. 5:9, 10) Kun siring lubos niatong magigibo an satong ministeryo durante kan 1994 na taon nin paglilingkod.—2 Tim. 4:5.