Magbugtak nin mga Pasohan Tanganing Makatabang na Mapagdanay na Makosog an Pagtubod
1 An makosog na pagtubod ki Jehova kaipuhan tanganing makapaogma kita sa Dios. (Heb. 11:6) Alagad siring sa ipinaliwanag ni Pablo, “an pagtubod bakong sadiri nin gabos na tawo.” Mantang aram niato na kun mayo nin pagtubod imposibleng makapaogma sa Dios asin na nakataya an mga buhay, may marahay na mga dahelan na kita magpadanay nin makosog na pagtubod sa pag-atubang niato sa “pagtatapos kan palakaw nin mga bagay.”—2 Tes. 3:2; Mat. 24:3, 36.
2 Ano an makatatabang sato na mapagdanay na makosog an satong pagtubod sa 1989 taon nin paglilingkod? Makatatabang an teokratikong mga pasohan. Kun may ibinubugtak na rasonableng mga pasohan mapadapit sa ministeryo sa langtad asin sa ibang kabtang nin buhay, dakol an magigibo para sa satong kapakinabangan asin sa ikamumuraway kan satong langitnon na Ama.
SA MINISTERYO ASIN SA PERSONAL NA PAG-ADAL
3 Tibaad magkalaenlaen na gayo an nagigibo kan lambang saro sa sato sa ministeryo. Pero, an odok na paglilingkod, minsan limitado sana, ikinaoogma ni Jehova. (Luc. 21:1-4) Alagad, tibaad may mga paagi na an lambang saro makagamit nin mas dakol na oras sa ministeryo sa bagong taon nin paglilingkod. Halimbawa, makagigibo daw kamo nin iskedyul na matogot saindo na mag-auxiliary payunir sa laog nin sarong bulan o labi pa sa laog kan taon? O tibaad puwede nindong pagmaigotan na magregular payunir?
4 An saro pang mahalagang pasohan makinabang nin orog sa personal na pag-adal. Tanganing magibo ini, puwede nindong iiskedyul na ubuson na basahon an Biblia sa laog nin itinalaan na panahon. Puwede kamong magtalaan nin espisipikong oras kada semana para sa personal na pag-adal dangan otobon an saindong iskedyul. Gamiton sa paglilingkod an nanonodan nindo, ipakipag-olay iyan sa iba, o iaplikar iyan sa personal sa ibang paagi.
MGA HOBENES ASIN MGA MAGURANG
5 An pasohan na maninigong horophoropon nin mga hobenes iyo an pagtao nin epektibong patotoo sa mga maestro asin kaklase. Manongod sa brochure na School, an sarong hoben na Saksi nagsabi: “Huli kaiyan nagin mas pasil para sa samo na makipag-olay sa mga maestro asin kaklase manongod sa satong pagtubod.” Prinobaran na daw nindo an paaging ini?
6 Kamong mga hobenes, gibohon na pasohan na dai togotan na madanyaran kamo nin maraot na pag-iriba, droga, asin inmoralidad sa maabot na mga bulan! Gamiton an brochure na School tanganing matabangan kamo na makapasar sa mga pagbalo sa integridad na tibaad atubangon nindo sa eskuwelahan.
7 An pakaabot sa mga pasohan nindo asin kan saindong pamilya magkakaipo nin pagsasakripisyo. Alagad mantang an kinaban “maagi sana,” bobooton nindo na gibohon an gabos na paghihingoa na kamtan an pag-oyon nin Dios. (1 Juan 2:17) Kaya mantang tinatanaw nindo an 1989 taon nin paglilingkod, magin determinado na papagdanayon na makosog an pagtubod nindo asin kan saindong pamilya. Magbugtak nin pasohan para sa saindo man sana, asin maimbod na pagmaigotan na maabot iyan.