Magbugtak nin Personal na mga Pasohan Para sa Bagong Taon nin Paglilingkod
1 Maogma daw kamo sa saindong espirituwal na mga ginibo? Marahay na magpadagos na mag-oswag sa espirituwal na paagi, alagad naghahagad ini nin pagmamaigot. Nakatatabang an pagbugtak nin mga pasohan para sa sato asin sa satong pamilya. An pasohan iyo an katapusan na dian nakasentro an pagmamaigot. Tanganing mapaoyonan si Jehova, maninigong an satong mga pasohan kaoyon kan saiyang kabotan. Kun siring, magkaigwa kita kan kaisipan ni Jehova asin magbugtak nin teokratikong mga pasohan, siring kan ginibo ni Jesus. (Juan 17:4) Makanonompong kita sa siring nin dakulang kagayagayahan asin satispaksion sa satong buhay nin paglilingkod ki Jehova.—Juan 15:10, 11.
2 Anong mga pasohan an saindong nagibo sa pagpapaoswag kan mga interes kan Kahadean durante kan nakaaging taon nin paglilingkod? An katunayan na kadakol kan nakaabot sa mga pasohan na ibinugtak ninda sa saindang sadiri maheheling sa bilang kan mga nabautismohan. Siring man, rinibo an nagpalista bilang mga auxiliary asin regular payunir. Dakol an nag-areglo tanganing maglingkod kun saen mas dakula an pangangaipo. An ibang mga tugang nakaabot sa personal na pasohan kan imbitaran sinda sa espesyal payunir o sa Bethel o sa konstruksion na gibohon.
MGA PASOHAN NA PUWEDE NINDONG KONSIDERARON
3 Igwa daw nin nababagay na mga pasohan na puwedeng maabot nindo? Tanganing an mga bagohan magkaigwa nin marahay na pag-oswag sa espirituwal, an pagigin regular sa pag-atender sa mga pagtiripon asin pagpalista sa Teokratikong Paadalan sa Pagmiministro marahay na mga pasohan. Kun dai pa kamo nagkokomento nin regular sa mga pagtiripon, taano ta dai gibohon iyan na sarong pasohan? An iba makikinabang huli sa saindong pag-adal asin pagsiyasat, asin an saindong sadiring pakasabot sa katotoohan mapakokosog.—Heb. 10:24, 25.
4 Kuwalipikado na daw kamo na magpoon na makikabtang sa pagmiministeryo sa langtad? Ginigibo daw nindo iyan nin regular? Binabasa daw nindo an bagong mga publikasyon sa pagluwas kaiyan, tanganing makasabay sa marahay na pagtotokdo hale sa maimbod na oripon? Kun naabot na nindo an mga pasohan na ini, dangan bako daw na an pagdusay asin an bautismo an angay na mga pasohan para konsideraron nindo?
5 Nagkokondukta na daw kamo nin pag-adal sa Biblia? Namibi na daw kamo para sa tabang tanganing makapoon nin saro? Maigot daw kamong minadalaw liwat, na nag-aalok nin pag-adal sa interesadong mga tawong saindong nanompongan? Kun an sarong inaadalan nindo kuwalipikado na sa paglilingkod sa langtad, pinatotood daw nindo sia sa ministeryo?
6 Nagbugtak na daw kamo nin mga pasohan sa oras para sa lambang bulan? O naprobaran na daw nindo an paglilingkod bilang auxiliary payunir? Tibaad nasa kamugtakan ngani kamo na magpoon bilang sarong regular payunir, na ihinihiras an maogmang bareta sa iba nin 90 oras lambang bulan. Sa tamang panahon, tibaad magkaigwa kamo nin espesyal na pagpatood na itinatao sa Paadalan sa Paglilingkod Bilang Payunir. An mga tugang na lalaki maninigong magmawot para sa pribilehiyo nin paglilingkod bilang mga ministeryal na lingkod asin magurang.—1 Tim. 3:1.
7 An personal na mga pasohan na satong ibinugtak para sa satong mga sadiri maninigong magharani sa sato ki Jehova asin magtogot sa sato tanganing makihiras nin orog na lubos sa paggibo kan saiyang kabotan. Sinabi ni Pablo na saiyang ‘linilingawan an mga bagay na nasa hudian asin pinipirit na aboton an mga bagay na nasa enotan.’ Pinakokosog nia kita na magkaigwa nin positibong mental na disposisyon manongod sa teokratikong mga pasohan tanganing “sagkod sa inabot na kan satong pag-oswag,” kita “padagos na maglakaw na husay sa iyo man sanang paagi.”—Fil. 3:13, 16.