Mga Hoben—Ano an Saindong Espirituwal na mga Pasohan?

¹ Aram ni Jehova kun gurano kaimportante an makatuyohan na gibohon asin nakakamtan na mga pasohan sa pagkaigwa nin kaogmahan. (Helingon an Genesis 1:​28; 2:​15, 19.) Ngonyan, tinawan ni Jehova nin asignasyon an saiyang banwaan na maghulit asin magtokdo. May ultimo man kitang pasohan na makamtan an buhay na daing katapusan sa Paraiso. Mientras tanto, kaipuhan niatong magbugtak nin progresibong espirituwal na mga pasohan tanganing makalikay kitang mapasala an direksion kan satong kosog asin kakayanan.​—1 Cor. 9:26.

² Realistikong mga Pasohan Para sa mga Hoben: An mga hoben dapat na magkaigwa nin teokratikong mga pasohan na kayang aboton sono sa saindang indibiduwal na mga kakayahan. (1 Tim. 4:15) An nagkapirang aki pang marhay naabot an pasohan na tuomon an mga libro kan Biblia dawa bago pa sinda nakanood bumasa. Paagi sa pampamilyang pag-adal, nakanonood an mga aki na mag-andam para sa mga pagtiripon tangani na maabot ninda an mga pasohan na magkomento nin makahulogan asin magpalista sa Teokratikong Paadalan sa Pagmiministro. Mantang nag-iiba an mga aki sa saindang mga magurang sa paglilingkod sa langtad, nakanonood sindang makikabtang sa pagpatotoo asin nag-ooswag pasiring sa pasohan na magin dai pa bautisadong mga parahayag. Maninigong papagdanayon nin mga magurang sa atubangan kan saindang hoben na mga aki an pasohan na pagdusay asin bautismo.

³ Kun ika sarong tin-edyer, ano an kaiba sa saimong espirituwal na mga pasohan? “Girumdoma, ngonyan, an saimong Kaharohalangkaweng Kaglalang” paagi sa pagkonsentrar sa talagang mahalagang mga pasohan sa buhay. (Ecl. 12:1; Sal. 71:17) Taano ta dai mag-auxiliary payunir durante kan bakasyon sa eskuelahan o sa ibang mga panahon? Napag-isip-isip mo na daw an dapit sa paglaog sa pambilog na panahon na ministeryo bilang regular payunir? Kumusta man an pag-adal nin sarong bagong lenguahe tanganing sa ngapit puede kang makatabang sa mga indibiduwal o kongregasyon na naggagamit kan lenguaheng iyan? An dakol na naglilingkod ngonyan sa Bethel o bilang nagbibiaheng mga paraataman o misyonero ibinugtak an espesyal na pambilog na panahon na paglilingkod bilang saindang pasohan kan sinda nag-eeskuela pa. Taano ta dai mo man iyan gibohon?

⁴ Mientras na hoben pa, pagmaigotan na arogon an halimbawa ni Jesus. Maski sa hoben pang edad na 12, suelto siang nagtaram manongod sa espirituwal na mga bagay. (Luc. 2:​42-​49, 52) An pagbugtak nin kapakipakinabang na mga pasohan para sa saindong sadiri na personal na mag-adal, basahon an Biblia aroaldaw, asin makiasosyar nin regular sa maygurang na mga Kristiano sa mga pagtiripon asin sa paglilingkod matabang sa saindo na magkaigwa kan abilidad na tokdoan an iba dapit sa Kahadean nin Dios siring kan ginibo ni Jesus.