Magbugtak nin Espirituwal na mga Pasohan
1 Kanigoan na pribilehio na omawon si Jehova sa bilog na panahon na daing sagkod! Tangani na matabangan kitang maotob an pasohan na iyan, puede kitang magbugtak nin mas bagong espirituwal na mga pasohan asin magmaigot na aboton iyan. Pinangyayari kita kaini na gamiton an satong kosog sa madonong na paagi. (1 Cor. 9:26) Anong mga pasohan an magigin realistiko para sa saindo?
2 Pag-adal sa Biblia: Nag-aandam daw kamo para sa lambang pagtiripon kan kongregasyon? Kun iyo, nagtatao daw kamo nin panahon para sa pagsiyasat asin paghorophorop kun kamo nag-aadal? Halimbawa, kun nag-aandam para sa semanal na Pag-adal sa Torrengbantayan asin Pag-adal sa Libro kan Kongregasyon, kinukuritan sana daw nindo an mga simbag o hineheling nindo an sitadong mga teksto asin pinepensar man an mga pangangatanosan sa itinaong eksplikasyon? Puede daw nindong gibohon na pasohan nindo na siyasaton an nagkapirang punto kada semana hale sa iinasignar na babasahon sa Biblia para sa Teokratikong Paadalan sa Pagmiministro? An siring na espirituwal na pagsiyasat nagkakaipo nin panahon asin paghihingoa, alagad iyan nagbubunga nin abundang balos.—Tal. 2:4, 5.
3 Mga Pagtiripon sa Kongregasyon: An saro pang pasohan iyo an pag-atender nin regular sa gabos na limang pagtiripon kan kongregasyon. An pag-abot nin mas amay tangani na makiasosyar sa mga kapagtubod asin makapakikabtang sa pambukas na awit patin pamibi nakatatabang na mapakosog an espiritu kan kongregasyon. Puede man niatong pagmaigotan na magkomento sa kada pagtiripon asin hingoahon na paoswagon an satong mga komento. Puede gayod nindong ipaheling kun paano an sarong teksto sa parapo konektado sa pinag-oolayan o sabihon kun paano an pinag-aadalan aplikado sa aroaldaw na buhay.—Heb. 10:24, 25.
4 Paglilingkod sa Langtad: Orog na nag-ooswag an satong ministeryo kun nagbubugtak kita nin mga pasohan. Igwa daw kamo nin personal na pasohan na oras na pinaplano nindong gamiton sa paglilingkod kada bulan? An nagkapira nanompongan na nakakatabang iyan. O puede daw kamong umoswag sa nagkapirang aspekto kan saindong ministeryo, arog baga kan paggamit kan Biblia sa pagharongharong, paggibo nin mas makahulogan na mga pagdalaw liwat, pagmamaigot na makapoon nin pag-adal sa Biblia, o pagtokdo nin mas epektibo sa mga inaadalan?
5 Mga magurang, ineenkaminar daw nindo an saindong mga aki na magbugtak nin mga pasohan sa paglilingkod ki Jehova? Tabangan sindang masabotan na an paglilingkod bilang payunir, misyonero, o miembro kan pamilyang Bethel ekselenteng paagi na ikapaheling an rarom kan saindang pag-apresyar ki Jehova.—Ecl. 12:1.
6 Mantang sinisiyasat niato an satong mga aktibidad, nagbubugtak nin espirituwal na mga pasohan, dangan naghihingoang aboton iyan, makanonompong kita nin orog na kagayagayahan sa satong paglilingkod asin magigin gikanan nin pamparigon sa boot para sa iba.—Roma 1:12.