Kun Paano Maaabot an Saindong Espirituwal na mga Pasohan
1. Ano an espirituwal na mga pasohan nin dakol na hoben na Kristiano?
1 Bilang hoben na Kristiano, daing duwa-duwa na an mga pasohan nindo sa buhay naiimpluwensiahan kan saindong pagkamoot ki Jehova asin kan mga tataramon ni Jesus para sa gabos na Kristiano na “hanapon nguna an kahadean.” (Mat. 6:33) Tibaad an pasohan nindo iyo na pahiwason an saindong ministeryo paagi sa paglilingkod bilang payunir o maglingkod kun saen mas dakula an pangangaipo para sa mga parabalangibog kan Kahadean. An nagkapira tibaad iniisip na magboluntaryo sa pagtogdok nin Kingdom Hall, sa paglilingkod sa Bethel, o sa pagmimisyonero. Kanigoan kanakakakontento asin kaomaw-omaw an mga pasohan na ini!
2. Ano an makakatabang sa saindo na maabot an saindong espirituwal na mga pasohan?
2 An sarong makakatabang na paagi tangani na maabot an saindong espirituwal na mga pasohan iyo an pagsurat kaiyan. An Torrengbantayan na Hulyo 15, 2004 nagsabi: “An malibog na ideya nagigin klaro asin depinido kun nagpipili [kamo] nin mga tataramon tanganing ipahayag iyan. . . . Kun siring tibaad gusto [nindo] na isurat an [saindong] mga pasohan asin an estratehiya [nindo] sa pag-abot kaiyan.” Dugang pa, an sekondaryong mga pasohan makakatabang sa saindo na ebalwaron an saindong pag-oswag asin papagdanayon an saindong konsentrasyon mantang pinag-aaabot nindo an panhaloyan na pasohan.
3. Magsambit nin nagkapirang panmadalian na pasohan na makakatabang sa saro na makualipikar para sa bautismo.
3 Panmadalian na mga Pasohan: Kun kamo bako pang bautisado, estudyaran kun ano an kaipuhan nindong gibohon tanganing maabot an pasohan na iyan. Tibaad kaipuhan nindo nin mas marahay na pakasabot sa pundamental na mga katokdoan kan Biblia. Kun iyo, gibohon nindong pasohan na maingat na pag-adalan an librong Itinotokdo kan Biblia, na binabasa an gabos na sitadong teksto. (1 Tim. 4:15) Magbugtak man nin pasohan na basahon an bilog na Biblia poon Genesis sagkod Kapahayagan, arog kan hinahagad sa mga Bethelite asin estudyante sa Gilead. Pakatapos kaiyan, papagdanayon an regular na programa nin aroaldaw na pagbasa kan Biblia. (Sal. 1:2, 3) Imahinara kun gurano kadakula an ikakatabang kaiyan sa saindo sa pagtalubo sa espirituwal! Buksan asin taposon paagi sa odok sa pusong pamibi an kada pagbasa asin pag-adal sa Biblia, asin pirmeng hingoahon na iaplikar an nanonodan nindo.—Sant. 1:25.
4. Anong panmadalian na mga pasohan an puedeng ibugtak nin sarong Kristiano na may panhaloyan na pasohan na maglingkod sa Bethel o magmisyonero?
4 Kun kamo bautisado na, ano pang dugang na mga pasohan an puede nindong pag-aaboton? Kaipuhan daw nindong paoswagon an mga kakayahan nindo sa paghuhulit? Halimbawa, puede daw nindong gibohon na pasohan nindo na magin mas tuod sa paggamit kan Tataramon nin Dios sa ministeryo sa langtad? (2 Tim. 2:15) Paano nindo puedeng pahiwason an saindong ministeryo? Magbugtak nin espesipikong panmadalian na mga pasohan na segun sa saindong edad asin mga kamugtakan patin na makakatabang sa saindo na maabot an saindong panhaloyan na mga pasohan.
5. Paano nakatabang sa sarong tugang na lalaki an pagbugtak nin panmadalian na mga pasohan tangani na maabot an saiyang pasohan na maglingkod sa Bethel?
5 Sarong Mapangganang Estorya: Kan dumalaw an 19 anyos na si Tony sa sangang opisina kan Mga Saksi ni Jehova, napukaw an pagmawot nia na maglingkod sa Bethel. Minsan siring, nagin masumbikal an saiyang estilo nin pamumuhay kaidto, asin dai pa ngani sia nakapagdusay sa Dios. Nagdesisyon si Tony na ioyon an saiyang buhay sa mga dalan ni Jehova asin ginibo niang pasohan na makualipikar para sa bautismo. Pakatapos na maabot an pasohan na iyan, pinag-aabot nia an pasohan na mag-auxiliary dangan magregular payunir, na isinusurat sa saiyang kalendaryo an mga petsa na gusto niang pumoon. Imahinara an saiyang kagayagayahan kan pakatapos na magpayunir sa laog nin halipot na panahon, inimbitaran sia na maglingkod sa Bethel!
6. Ano an makakatabang sa saindo na maabot an saindong espirituwal na mga pasohan?
6 Puede man nindong maabot an saindong espirituwal na mga pasohan mantang hinihingoa nindong hanapon nguna an intereses kan Kahadean. Danay na ipamibi ki Jehova an “saimong mga gibo” asin magmaigot nanggad na gibohon iyan.—Tal. 16:3; 21:5.