Pag-ani nin Proporsionado sa Satong Personal na Paghihingoa

¹ Ipinaheling ni Jehova Dios an saiyang pagkamoot sa tawo sa dakol na paagi. Itinampok ni Jesus an daing kaagid na pagkamoot nin Dios, na idinodoon sa sarong tiripon na kadaklan na an Dios “pinasisirang an saiyang aldaw sa maraot asin sa marahay asin pinapaoranan nia an matanos asin bakong matanos.” (Mat. 5:​43-48) Sa saro pang okasyon, isinabi ni Jesus an pinakapambihirang kapahayagan nin pagkamoot kan saiyang Ama​—an pag-atang kan saiyang bugtong na Aki, na itinao nin Dios para sa satong kaligtasan. (Juan 3:16) Sinadol ni Jesus an saiyang mga parahinanyog na may pag-apresyar na bumalos sa pagkamoot ni Jehova. Hinihingoa daw niatong gibohon iyan?

² Tangani na kita makapagpahayag nin lubos na pag-apresyar asin magkamit nin nagdadanay na mga pakinabang sa pagkamoot ni Jehova, kaipuhan na sia mamidbid niato. (Juan 17:3) Kaipuhan niato an hatol asin paggiya sa kun paano kita makapaglilingkod saiya nin tama. Ipinaheling ni Jehova an saiyang mamomoton na pagmakolog paagi sa pagtao sato kan saiyang ipinasabong na Tataramon, an Biblia, asin sa pagpatindog kan saiyang makangangalas na organisasyon, na paagi kaiyan kita nag-aako nin hatol asin pagtotokdo. (Mat. 24:​45-47; 2 Tim. 3:​16, 17) Bilang nagdusay na banwaan ni Jehova, kita tinokdoan sa saiyang paagi. Alagad ipinaheheling daw niato paagi kan satong personal na paghihingoa na kita nag-aapresyar sa pagkamoot ni Jehova? Kinukuyog daw niato an saiyang hatol tangani na ikaogma nia asin sa siring makinabang kita? (Isa. 48:17; Sant. 1:22) Si apostol Pablo nagsurat sa 1 Corinto 3:8: “Ngonyan an nagtatanom asin an nagbabaribi saro sana, alagad an lambang saro maako kan saiyang balos sono sa saiyang pagpapagal.”

³ Iyo, kaipuhan kitang maghingoa na gibohon an boot nin Dios na gibohon niato. Bakong gabos minaoswag sa espirituwal sa pararehong rikas. Kadakol kan bagay na puwedeng makaapektar sa satong pag-oswag, asin bakong madonong an gumibo nin nakapaluluya sa boot na mga pagkokomparar. Minsan siring, napakahalaga an indibiduwal na paghihingoa na ginigibo niato. Ano an magigibo niato tanganing orog na maparani sa organisasyon? Igwa daw nin mga lugar na dian kita makaooswag sa pag-ako kan satong personal na mga paninimbagan bilang Kristiano? Anong paghihingoa an kaipuhan tanganing orog na makasuportar sa mga aktibidad kan kongregasyon? Igwa daw nin mga punto na kaipuhan niatong iaplikar kun dapit sa mga itinotokdo sato kan organisasyon?​—1 Tim. 4:16.

AROGON AN MGA MAIMBOD

⁴ An maogmang bareta kan Kahadean dakol nang taon na ihinuhulit nin maimbod na mga tugang na lalaki asin babae. An mga maimbod na ini, kapareho ni Pablo, maninigong arogon. (1 Cor. 11:1) Sinda nagbalos sa pagkamoot nin Dios asin nag-ani nin dakol na pakinabang huli sa saindang pagpapagal asin sa saindang personal na mga paghihingoa na masunod an hatol kan Biblia. Sinda minabilog sa marigon na pinakaubod na aktibong mga trabahador sa kongregasyon, na dai nagdudulag sa saindang personal na paninimbagan. Naheheling niato an bunga kan saindang indibiduwal na mga pagpapagal.​—Roma 1:13; 2 Cor. 3:​1-3.

⁵ Ngonyan, manampulong ribo nin mga bagohan an burunyog na minalaog sa organisasyon kada taon. (Isa. 60:8) Sinda man odok an boot manongod sa pagpapagal tanganing magin maygurang na espirituwal na mga tawo, asin an kaigotan ninda sa paghuhulit maninigong omawon. Nakikinabang sinda sa pakaheling kun paano binibendisyonan ni Jehova an mga nagpapagal sa paglilingkod sa saiya. An halimbawa nin maygurang na mga tugang na lalaki asin babae nakatatabang sa mga bagohan na maapresyar na ini bakong panahon na maghinugak o pumondo sa satong paglilingkod sa Dios. Baga man bagohan o eksperyensiadong parahayag, kita daw nagpapadagos na tumalubo sa espirituwal, na inaako an satong personal na Kristianong mga paninimbagan asin inaaprobetsaran an gabos na teokratikong probisyon?

PAG-APLIKAR KAN SATONG NANONODAN

⁶ Haloy pa bago isurat ni Santiago na kita maninigong magin mga “paragibo kan gibohon,” sinabihan ni Moises an mga Judio: “Kaipuhan na iaplikar nindo an mga tataramon kong ini.” (Sant. 1:25; Deut. 11:18) Kaya bakong igo an kaaraman sana. An mga Judio kaipuhan na iaplikar an mga tataramon kan Pagboot bilang pagkuyog ki Jehova. An pundamental na prinsipyong ini dai naliliwat. Si Jesus, an Aki nin Dios, tunay na aram an halaga nin pagkuyog. (Juan 8:28) Sinabi nia sa Mateo 7:24: “An gabos na nagdadangog sa mga tataramon kong ini asin naggigibo kaiyan ikababaing sa madonong.”

⁷ Iinaaplikar daw niato an satong nanonodan sa mga pansirkitong asamblea? Inaapresyar daw niato kun taano ta napakahalaga sa panahon na ini na magpuka asin papagdanayon niato an toltol na isip? Alisto daw kita sa tusong mga pagsalakay asin siod na ibinugtak kan Diablo? Inaapresyar daw niato an hatol asin mga patanid na paorootrong itinatao sato kan organisasyon manongod sa pangangaipo nin moral asin espirituwal na kalinigan sa kongregasyon? Gurano niato iinaaplikar bilang indibiduwal an satong nadadangog?​—Sant. 1:​23-25.

⁸ An presenteng programa sa espesyal na aldaw nin asamblea nagdodoon kan satong pangangaipo na magin banal, siring na si Jehova banal. (1 Ped. 1:​14-16) An kabanalan nangangahulogan nin relihiyosong kalinigan o kadalisayan, pagkasagrado. Iyan nagtatao kan ideya nin pagigin isiniblag para sa paglilingkod sa Dios. Pinaniwalaan kita kan ministeryo kan maogmang bareta. Kun siring, dapat kitang magin malinig sa espirituwal, moral, asin pisikal tanganing magin angay na magdara kan banal na Tataramon nin katotoohan. Ini nagkakaipo na tawan niato nin orog kisa dating atension an satong sadiri. (Heb. 2:1) Mantang ginigibo niato iyan, kita mag-aani nin mga bendisyon na proporsionado sa satong personal na paghihingoa.

PAKINABANG SA PERSONAL NA PAG-ADAL

⁹ An personal na pag-adal nakatatabang sato na magkaigwa nin marigon na pagtubod, asin pinarararom kaiyan an satong pag-apresyar sa katotoohan. Iyan nagtatao sato nin kompiansa asin sinasangkapan kita na magtaram na may autoridad. Iyan nagtatao sato nin pagmansay asin pakarorop patin tinatabangan kita na isolog an bagong pagkatawo. (Col. 1:​9-11) Minsan siring, an mabungang pag-adal nagkakaipo nin panahon asin paghihingoa, asin mayo nin gutos sa pagkaigwa nin tamang kaaraman asin espirituwal na rarom nin pakasabot. Kun gurano an satong pag-adal iyo man an makukua niatong pakinabang.​—2 Cor. 9:​6, 7; Gal. 6:7.

¹⁰ Nagtatagama daw kita nin bastanteng panahon kada semana sa pag-andam para sa mga pagtiripon sa kongregasyon? Ini sarong paagi na ikapaheling niato an pag-apresyar sa espirituwal na pagkakan na itinatagama ni Jehova paagi sa maimbod asin madonong na oripon. An tamang pag-andam para sa pagtiripon nakatatabang sato na masunod an iskedyul sa pagbasa asin pag-adal sa Tataramon nin Dios. Nagtatagama daw kita nin panahon kada semana na gibohon an pagbasa niato sa Biblia sono sa programa sa Teokratikong Paadalan sa Pagmiministro? Pira sanang minuto an kaipuhan aroaldaw tanganing basahon asin horophoropon an materyal. An Pagtiripon sa Paglilingkod nakatatabang na kita magdanay na alisto sa mga paagi na magibo niatong epektibo an satong ministeryo sa publiko. Kita daw nag-aandam, na tinatawan nin espesyal na paghorophorop an kun paano niato magagamit an materyal na ini sa ministeryo? Asin ginigibo daw niato an paghihingoa na gamiton tolos iyan? Maninigong gibohon an espisipikong mga areglo tanganing makapag-andam para sa Pag-adal sa Torrengbantayan asin sa Pag-adal sa Libro kan Kongregasyon. Ginigibo daw niato iyan?

MAKIKABTANG SA MGA PAGTIRIPON

¹¹ Orog kitang makikinabang sa mga pagtiripon kun kita nakikikabtang dian. An pag-andam para sa mga pagtiripon dangan paghihingoa na makikabtang pinapagdadanay kitang atento sa oras kan pagtiripon asin nagigin mas pasil para sa sato na makinabang sa mga komento nin iba. Nagigirumdoman pa nin dakol an pagpapagal na ginibo ninda sa saindang enot na komento sa pagtiripon o sa saindang enot na pahayag nin estudyante sa Teokratikong Paadalan sa Pagmiministro. Minsan ngani maninigo na nawara na an kadaklan sa nerbiyos, kita daw nagpapadagos na maghingoa na mahayag sa gabos an satong espirituwal na pagtalubo? (1 Tim. 4:15) An iba nakikinabang asin napakokosog kan satong mga komento. Kun kita andam na marhay, na pinag-adalan an materyal na pag-oolayan sa mga pagtiripon, an satong makahulogan na pakikikabtang dian makapahihiro sa iba sa pagkamoot asin marahay na mga gibo.​—Heb. 10:​23-25.

¹² An satong komento dai maninigong magin halawig asin komplikado. Parate na pinakamarahay na tumao nin haralipot na komento na direktang minasimbag sa hapot na itinao o nakatatabang na linawon an pag-aplikar nin sarong teksto. Kun kita nag-andam nin marhay, kita makapagkokomento sa sadiri niatong pananaram. Kun ginigibo niato iyan, mas dakula an pakinabang niato asin nin iba. Taano? Huli ta hinahagad kaiyan na horophoropon niato an satong sinasabi asin ipaliwanag an punto sono sa pakasabot niato dian. Tibaad huli kaini magin mas madali sa iba na masabotan an materyal. Saro pa, iyan makatatabang sato na magirumdoman an impormasyon tanganing magamit sa ibang okasyon.

MAGSABWAG NIN ABUNDA SA LANGTAD

¹³ An satong Kristianong ministeryo kayamanan nin paglilingkod. (2 Cor. 4:7) Arog daw kaiyan an pagheling nindo? Paagi sa ministeryo, igwa kita kan pribilehiyo na ipahayag an satong pagtubod sa iba. Sinabi ni Jesus na gikan sa kapanoan kan puso, an ngoso nagtataram. (Luc. 6:45) An personal na paghihingoa na ginigibo niato tanganing magkaigwa nin lubos na kabtang sa ministeryo sa langtad minatogot sato na mag-ani nin kadakol na pakinabang. Minatarom an satong pakasabot sa katotoohan, asin nagkakaigwa kita nin orog na abilidad sa paggamit sa Biblia. Nasa sato an kagayagayahan na darahon sa iba an katotoohan asin tabangan sinda na makanood manongod sa saindang Dakulang Kaglalang. Kita minatindog na mga saksi sa pagigin tama kan pamamahala nin Dios asin sa saiyang soberaniya. Maogma kita ta aram niato na napaoogma niato si Jehova, na liniwat sa kaagid nia asin naggigibo kan saiyang kabotan.​—Mat. 5:48.

¹⁴ Kun padagos niatong sosokolon an satong personal na paghihingoa, an pagsamba niato ki Jehova noarin man dai magigin paramas sanang paglilingkod. Ano an boot sabihon kaiyan? Iyan nangangahulogan na dai kita magigin kulang nin kaigotan sa pag-otob sa kabotan nin Dios, na nagtatao sana saiya nin sagin paglilingkod o nin pinakakadikit na mayo nin tunay na odok sa pusong debosyon asin paghihingoa. An paglilingkod niato ki Jehova dapat na bilog na puso. Igwa kita nin Makakasuratan na obligasyon na itao an bilog niatong makakaya sa paglilingkod sa saiya. (Col. 3:​23, 24) Totoo, laen-laen an kamugtakan, asin si Jehova dai naghahagad sato nin labi sa kaya niatong gibohon. Minsan siring, an kaya niatong gibohon, linalaoman niang gibohon niato! (Mat. 22:37) Mantang an makasalan na naturalesa nin tawo may tendensiang pagianan an sadiri, marahay na siyasaton niato an satong sadiri sa panapanahon asin helingon kun saen an mapaooswag niato sa satong paglilingkod sa Dios. Nagtutuod daw kitang gibohon iyan?

¹⁵ Kaipuhan an pagmamaan tanganing malikayan niato an pagtogot na an personal na mga gibo asin kamawotan makaolang sato sa pagtao kan pinakamakakaya niato sa paglilingkod ki Jehova. An mga kaalingan, apisyon, asin dibersion dapat na ibugtak sa lugar. Saro pa, dapat kitang magmaan tumang sa tendensia na magsobra an panahon sa sekular na mga aktibidad. Sa pagkuyog sa hatol ni Jesus sa Mateo 6:​22, 23, daing duwa-duwa na makagigibo kita nin orog na paghihingoa sa pag-otob sa espirituwal na mga interes asin mag-aani nin sono dian.

¹⁶ Mantang kita padagos na naghihigos sa pagsolog kan bagong pagkatawo, aakoon niato an satong paninimbagan sa pag-aplikar kan hatol asin mga suhestion na inaako niato sa mga pagtiripon kan kongregasyon, asamblea, kombension, asin paagi sa mga publikasyon. An lambang saro logod sa sato maigot na mag-adal, aktibong makikabtang sa mga pagtiripon, asin makikabtang sa dakulang gibohon na ini na paggibo nin mga disipulo sagkod sa itinotogot kan satong personal na kamugtakan. Sa siring na pagbalos na may pag-apresyar sa pagkamoot nin Dios, makalalaom kita na mag-ani nin abundang espirituwal na balos ngonyan asin mapagdanay an marigon na paglaom sa buhay na daing sagkod sa bagong kinaban ni Jehova.