Pinakikinabang daw Nindo an Saindong Sadiri?
1 Minilyon ngonyan an boot na makaaram kun paano mapanggaganahan an mga problema asin magkakamit nin maogmang buhay. Galaga sindang nagbabasa nin mga librong giya sa personal na pag-oswag o naghahagad nin sadol sa mga grupo asin organisasyon kun paano mas marahay an saindang buhay. Tibaad puedeng sabihon nin nagkapira an limitadong mga pakinabang na nakamtan ninda. Pero, sa paghusgar sa kualidad nin buhay ngonyan, an mga tawo daw sa pankagabsan nakanood na makamtan an matoninong, nakakokontentong marhay na buhay paagi sa mga programa nin pagtotokdo nin tawo? Dai nanggad iyan masasabi!—1 Cor. 3:18-20.
2 Sa ibong na kampi, itinatao nin daing bayad kan satong Kaglalang an pinakanakatatabang na pagtotokdo sa gabos na maghihinanyog. Boot ni Jehova na an gabos makinabang sa saiyang pagtotokdo. Buka an palad na itinao nia an saiyang ipinasabong na Tataramon tangani na giyahan an katawohan sa pagkatanos, asin pinangyari nia na ipahayag an maogmang bareta kan saiyang Kahadean sa bilog na daga. (Sal. 19:7, 8; Mat. 24:14; 2 Tim. 3:16) An totoong maogmang buhay direktang konektado sa pagtao nin atension sa mga togon ni Jehova.—Isa. 48:17, 18.
3 An paggiya ni Jehova nakalalabi nanggad sa itinatao nin ano man na mga librong giya sa personal na pag-oswag o mga pamamaagi sa personal na pag-oswag na iinaalok kan kinaban. Makakukua kita nin tunay na tabang asin nagdadanay na mga pakinabang kun lubos niatong aaprobetsaran an mga probisyon ni Jehova na itinao sa saiyang Tataramon asin itinotokdo kan saiyang organisasyon.—1 Ped. 3:10-12.
4 Pakinabangon an Saindong Sadiri sa mga Pagtiripon kan Kongregasyon: Ngonyan, si Jehova nagpapaheling nin tunay na interes sa pagtotokdo sa sato kan saiyang mga dalan, asin kita nakikinabang paagi sa pagtao nin atension sa saiyang pagtotokdo. An satong limang semanal na pagtiripon nagtataong ebidensia kan mamomoton na pagmalasakit ni Jehova. Kun kita nag-aatender sa mga pagtiripon kan kongregasyon, nadadagdagan an satong kaaraman dapit sa Dios. Nakanonood kita kun paano poprotehiran an satong sadiri sa maraot paagi sa pagdayupot ki Jehova. Paagi kaini napaparahay an kondisyon kan satong isip.
5 Dakol pa. Sa mga pagtiripon kan kongregasyon nahihimo niatong “humiwas.” (2 Cor. 6:13) Kalabot digdi an pagmidbid sa iba sa kongregasyon. Kita nakikinabang sa pagbinalyohan nin pagparigon sa boot, arog kan isinurat ni apostol Pablo sa saiyang surat sa mga taga Roma. (Roma 1:11, 12) Kan magsurat sa mga Hebreo, marigon niang sinadol idtong tibaad nagigin ugale nang pabayaan an Kristianong pakikiiba.—Heb. 10:24, 25.
6 An magayagayang pagkakontento sa buhay direktang konektado sa pagigin interesado sa ikararahay nin iba. Ineenkaminar kita na humanap nin mga paagi na makakontribwir sa kaogmahan nin iba. Kun siring, an satong Kristianong mga pagtiripon tunay nanggad na para sa satong personal na kapakinabangan asin para sa kapakinabangan kan mga hinihingoa ta na makamtan an nakapakokosog na pakikiiba. An hinahagad sa sato iyo an satong odok sa pusong pakikikabtang.
7 Sinabi ni apostol Pablo an kaagid na punto sa saiyang hatol ki Timoteo kan sia magsurat: “Patoodon mo an saimong sadiri na diosnon na debosyon iyo an saimong pag-aaboton.” (1 Tim. 4:7) Puede niatong hapoton an satong sadiri: ‘Pinatotood ko daw an sakong sadiri? Ako daw nakakanood na makinabang sa sakong nadadangog sa mga pagtiripon kan kongregasyon?’ Iyo an isisimbag niato kun kita nagtatao nin atension sa satong nadadangog sa mga pagtiripon asin naghihingoang iaplikar an satong nanonodan. Paagi sa mga mata nin pagtubod, dapat na an maheling niato iyo an nasa likod kan mga tugang na lalaki na nagtotokdo asin helingon si Jehova bilang an Kaharohalangkaweng Paratokdo kan saiyang banwaan.—Isa. 30:20.
8 Teokratikong Paadalan sa Pagmiministro Asin Pagtiripon sa Paglilingkod: An duwang pagtiripon na ini dinisenyo tangani na tabangan kitang magin epektibo sa Kristianong ministeryo. An Teokratikong Paadalan sa Pagmiministro siring nanggad kaiyan—sarong paadalan na may mga estudyante na nag-aako nin regular na pagtotokdo asin konseho. May oportunidad kamong ipaheling an saindong pag-oswag bilang pampublikong ispiker asin bilang paratokdo kan Tataramon nin Dios. Alagad tangani na lubos na makinabang sa paadalan, kaipuhan nindong magpalista, umatender, regular na makikabtang, asin isapuso an saindong mga asignasyon. An pag-ako asin pag-aplikar kan konseho na itinatao makatatabang sa saindo na gumibo nin pag-oswag.
9 Itinotokdo sa sato kan Pagtiripon sa Paglilingkod an importansia kan Kristianong ministeryo asin ipinaheheling sa sato kun paano kita makapakikikabtang sa paggibo nin mga disipulo. Kamo daw asin an saindong pamilya lubos na nakikinabang sa iinaatubang sa duwang pagtiripon na ini? Nagkomento an sarong Kristianong mag-agom: “Sa sarong Pagtiripon sa Paglilingkod, nadangog mi na maninigo ming pag-olayan an aroaldaw na teksto bilang sarong pamilya. Dai mi ini ginigibo kaidto, alagad ngonyan iyo na.” Paano ninda pinakinabang an saindang sadiri? Inadmitir ninda: “Nanompongan mi na orog na nakagagayagaya an samong mga pag-orolay mantang nagkakakan. Mayo na nin nagsisimbagan kun namamanggi.” Pati daw an sadit na mga aki nakikinabang sa mga pagtiripon? Iyo. Nagsasabi an ina: “Risang-risa na hararom an epekto kan mga pagtiripon sa samong mga aki. Sa sarong partikular na semana nadakop mi na nagpuputik an samong anom na taon na aking lalaki. Alagad kan semanang idto sa pagtiripon, an pahayag na nagtotokdo manongod sa pagputik. Huling nababanaag sa panlauog nia na sia may sala nanggad, hineling kan samong aki an saiyang ama asin sia luminukmo sa saiyang tukawan. Nagkaleksion sia, asin mayo na kaming mga problema pakatapos kaiyan.”
10 An sarong payunir na tugang na babae nagsasabi na sia naoogma na an mga suhestion sa pagpaoswag kan satong ministeryo itinatao sa Pagtiripon sa Paglilingkod. Taano? Ipinaliwanag nia: “Ako nagin estangkado. Kun beses sa paghona ko an isinusuherir sa An Satong Ministeryo sa Kahadean dai magigin epektibo. Alagad sa Pagtiripon sa Paglilingkod, kun nadadangog ko na maninigo niatong probaran iyan, ako napupukaw nin entusiasmo na iaplikar an mga suhestion. Ginigibo kaiyan na nakaoogma an ministeryo!” Pakalihis nin nagkapirang semanang pag-aplikar kan suhestion na pagmaigotan na makapoon nin pag-adal sa Biblia sa enot na pagsongko, sia nakapoon nin pag-adal sa enot na pagsongko sa sarong daragita na haloy nang namimibi para sa tabang.
11 Kun nakakadangog kamo nin sarong pahayag na kabale an hatol sa Biblia manongod sa personal na mga pagpili nindo, namamatean daw nindo na si Jehova an direktang nagtataram sa saindo? Siring kaiyan an paniniwala nin sarong tugang na lalaki. Sia nagsabi: “Sa sarong pagtiripon kasuarin pa sana, may sarong pahayag na dian trinatar nin sarong tugang na lalaki kun anong mga klase nin pag-aling-aling an tama para sa mga Kristiano asin kun anong mga klase an sala. Kaidto gustong-gusto kong magdalan nin boksing sa telebisyon. Alagad pakatapos kan pagtiripon na iyan, nagdesisyon ako na an isport na ini nasa kategoriya nin pag-aling-aling na bakong tama para sa mga Kristiano. Kaya dai na ako nagdadalan kaiyan.” Iyo, dawa ngani an tugang na lalaking ini nagkahilig sa sarong bagay na madahas, sia mapakumbabang naghimate sa paggiya ni Jehova.—Sal. 11:5.
12 An Pampublikong Pagtiripon, an Pag-adal sa Torrengbantayan, Asin an Pag-adal sa Libro kan Kongregasyon: An nadadangog niatong mga pampublikong pahayag kada semana nagtatratar nin manlaenlaen na tema sa Biblia. Ano an nakukua nindo sa mga pahayag na ini? Nagkomento an sarong Kristianong agom na lalaki manongod sa mga pakinabang na inako nia: “Itinampok nin sarong pampublikong pahayag an gabos na bunga kan espiritu. Sinambit kan ispiker, mapadapit sa saiyang sadiri, na tanganing makultibar an mga bungang ini, minapili sia nin sarong partikular na kualidad asin hinihingoang paoswagon iyan sa laog nin sarong semana. Sa katapusan kan semana, hinohorophorop nia kun ano an nagibo nia sa pagpaheling kan bungang iyan sa saiyang aroaldaw na mga aktibidad. Dangan naghihingoa siang paoswagon an saro na naman na kualidad sa masunod na semana. Nagustohan ko an ideyang iyan asin pinonan ko mismong gibohon iyan.” Abaa karahay na aplikasyon kan nanodan!
13 Tinotokdoan kita kan Pag-adal sa Torrengbantayan na iaplikar an mga prinsipyo sa Biblia sa manlaenlaen na situwasyon sa buhay. Tinatabangan kita kaini na mapagdanay an kalmadong isip asin puso sa ibong kan mga kahaditan sa buhay. An Pag-adal sa Torrengbantayan pinapagdadanay man kitang maaraman an pinakabagong impormasyon sa progresibong katotoohan. Halimbawa, dai daw kita nakinabang sa mga artikulong pinag-adalan sa Torrengbantayan na Mayo 1, 1999, na may temang: “An mga Bagay na Ini Kaipuhan na Mangyari,” “An Nagbabasa Gumamit nin Pakamansay,” asin “Magin Alerto Asin Magin Utitok!” Ano an nagin epekto sa saindo personalmente kan mga pinag-adalan na ini? Ipinaheheling daw nindo paagi sa saindong mga gawe-gawe na isinasapuso nindo an patanid ni Jesus dapit sa ngapit? Iinaandam daw nindo an saindong sadiri para sa mga pagbalo na maabot kun maheling na niato an “makababaldeng bagay na nagpapangyari nin kagabaan . . . na nagtitindog sa sarong banal na lugar”? (Mat. 24:15-22) An saindo daw na mga pasohan asin buhay nagpaparisa na, bakong an pagtipon nin materyal na mga rogaring, kundi an pagsantipikar sa ngaran ni Jehova an pinakaimportante sa saindo? Sa Pag-adal sa Torrengbantayan, bako daw na nakanonood kitang pakinabangon an satong sadiri ngonyan?
14 Isip-isipa kun gurano kadakol kan nanonodan niato sa Pag-adal sa Libro kan Kongregasyon kada semana. Sa presente pinag-aadalan niato an libro kan Biblia na Daniel. Sa apat na bulan na pinag-aadalan niato an librong iyan kan Biblia, dai daw niato naheling na nagtatalubo an satong pagtubod kada semana? Arog kan namomotan ni Jehova na si propeta Daniel, pinakokosog niato an satong pagtubod tanganing kita makatagal.
15 Tinotokdoan Kita ni Jehova na Mamuhay nin Magayagaya: Nalilikayan ta an dakol na kamondoan kun kita nagtatao nin atension sa mga pagboot nin Dios. Dugang pa, naeeksperyensiahan niato kun ano an kahulogan nin magayagayang pamumuhay. Sa pagsunod sa pangengenot ni Jehova, kita nagigin mga kabali sa saiyang gibohon, bako sanang mga paramasid. Asin idtong mga naggigibo kan gibohon nin Dios maogmang mga tawo.—1 Cor. 3:9; Sant. 1:25.
16 Tolos na isip-isipon kun paano nindo iaaplikar an mga bagay na saindong nadadangog sa mga pagtiripon kan kongregasyon. (Juan 13:17) Paglingkodan an Dios nin entusiastiko, nin bilog nindong puso. Magsosopay an saindong kagayagayahan. Magigin mas marahay, mas makahulogan an saindong buhay. Iyo, pakikinabangon nindo an saindong sadiri.