Mga Pagtiripon Para sa Pagsadol nin Pagkamoot Asin Marahay na mga Gibo
An enot na mga Kristiano nagtiripon, parate sa pribadong mga harong, tanganing mag-ako nin pagtotokdo asin magkamit nin nakapagpapakosog na pakikiasosyar. Ngonyan, an mga kongregasyon nin mga Saksi ni Jehova nagtitiripon tolong beses kada semana. Imbitado kamong umatender sa arin man sa mga pagtiripon na ini. An saindang mga pagtiripon bakong rituwalistiko, kundi nakasentro sa banal na pagtotokdo. An mga pagtiripon kan kongregasyon pinoponan asin tinatapos nin awit asin pamibi. An pag-atender libre, asin daing ginigibong pagkolekta.—Gibo 4:23-31; 14:22; 15:32, 35; Roma 16:5; Colosas 4:15.
Seguro an enot na pagtiripon na maaatenderan nindo iyo an 45-minutos na pahayag-publiko, na manonongod sa mga katokdoan kan Biblia, hula, o hatol dapit sa Kristianong pamumuhay. Kasunod kan pahayag na ini, igwa nin pag-adal sa Biblia, na ginagamit an sarong artikulo sa An Torrengbantayan na talagang sinadya para sa pag-adal kan kongregasyon. An pag-adal arog kaini an paagi: Binabasa an sarong parapo sa An Torrengbantayan, asin an nangengenot nagtatao nin mga hapot tanganing an mga presente makapagboluntaryong sumimbag paagi sa pag-itaas kan saindang kamot. Sa parate nagkapirang komento an itinatao sa kada parapo. Sarong oras an pagtiripon.
Pakaagi nin pirang aldaw sa laog kan semana, may duwa pang 45-minutos na pagtiripon na ginigibo. An saro iyo an Teokratikong Paadalan sa Pagmiministro. Iyan nagtotokdo kun paano magtitipon nin materyal para sa mga tema sa Biblia asin ikatokdo iyan nin epektibo. Pakatapos nin 21 minutos na espesyal na pagtotokdo, an mga estudyante na patienot na inasignaran nagtatao nin haralipot na presentasyon. Pakatapos kan kada presentasyon, an instruktor kan paadalan nagtatao nin konseho kun paano puwedeng umoswag an estudyante. May nagkapirang libro na inandam para sa paadalan na ini. An mga regular na nag-aatender sa mga pagtiripon puwedeng magpalista, basta sinda namumuhay nin oyon sa mga Kristianong prinsipyo.
An kasunod na pagtiripon inaapod na Pagtiripon sa Paglilingkod. Iyan igwa nin tolo o apat na kabtang manongod sa pag-aatubang kan maogmang bareta sa harong-harong saka sa iba pang kabtang kan ministeryo. An mga kabtang na ini iinaatubang bilang mga pahayag, orolay, o demonstrasyon, na may partisipasyon an mga nagdadangog. An kadaklan kan programa basado sa An Satong Ministeryo sa Kahadean, apat na pahinang instruksion na ipinupublikar nin bulanan kan Watch Tower Society.
An saro pang pagtiripon semanal na pag-adal sa saradit na grupo, na parateng sa pribadong mga harong sa bilog na teritoryo kan kongregasyon. An pag-adal basado sa Biblia asin sa sarong bagong libro na ipinublikar kan Sosyedad. Mantang mas sadit an grupo, igwa nin orog na oportunidad an gabos na makikabtang sa orolay, asin may marahay na oportunidad an mga presente na orog na magkaminidbidan.
An kadaklan na kongregasyon ginigibo an saindang pagtiripon sa Kingdom Hall na itinogdok kan mga Saksi ni Jehova. An gastos gikan sa boluntaryong mga donasyon kan mga Saksi mismo, asin sa kadaklan an trabaho ginibong daing bayad nin boluntaryong mga trabahador. Igwa nin mga kahon nin donasyon sa gabos na pagtiripon para sa mga boot na magdonar.
An mga pagtiripon kan kongregasyon nakatatabang sa mga Saksi ni Jehova na kuyugon an hatol sa Hebreo 10:24, 25: “Magpasaradolsadol kita sa pagkamoot asin sa marahay na mga gibo, na dai pagpabayaan an satong pagtorotiripon, siring kan kaugalean nin nagkapira, kundi na magpakinosogan kita, asin lalo na ta naheheling [niato] na an aldaw harani na.”
• Anong mga kabtang kan pagtiripon kaidtong enot na mga Kristiano an maheheling sa mga pagtiripon kan mga Saksi ni Jehova?
• Isabi kun ano an iinaatubang sa limang pagtiripon na regular na ginigibo kan mga Saksi.
• Paano nagkaigwa nin mga lugar na tiriponan?
[Mga ritrato sa pahina 14]
Magurang na nangengenot sa Pag-adal sa Torrengbantayan, sa Estados Unidos
Eksena sa Teokratikong Paadalan sa Pagmiministro, sa Faeroe Islands
Pangrupong pag-adal sa pribadong harong, sa Yap
Kingdom Hall, sa New Braunfels, Texas, E.U.A., na itinogdok nin mga Saksi ni Jehova sa duwang aldaw
[Mga ritrato sa pahina 15]
Mga Kingdom Hall sa laen-laen na nasyon
Hapon
Australia
Austria
España