Nagtatabang daw Kamo na Magin Nakakapakosog an Kristianong mga Pagtiripon?
“Kun kamo nagtitiripon, . . . gibohon an gabos para sa pagpakosog.”—1 COR. 14:26.
1. Segun sa 1 Corinto kapitulo 14, ano an sarong mahalagang katuyohan nin Kristianong mga pagtiripon?
‘NAKAKAPAKOSOG nanggad na pagtiripon idto!’ Nasabi na man daw nindo iyan pagkaatender nindo sa sarong pagtiripon sa Kingdom Hall? Mayong duda na iyo na! Tunay nanggad na sarong gikanan nin pagparigon an mga pagtiripon kan kongregasyon, alagad iyan bakong makangangalas. Total, arog kaidtong panahon kan enot na mga Kristiano, an sarong mahalagang katuyohan kan satong mga pagtiripon ngonyan iyo na pakosogon sa espirituwal an gabos na nag-aatender. Mangnohon kun paano idinoon ni apostol Pablo sa enot niang surat sa mga taga Corinto an espesipikong katuyohan na iyan nin Kristianong mga pagtiripon. Sa bilog na kapitulo 14, paorootro niang sinabi na an kada kabtang na ipinepresentar sa mga pagtiripon kan kongregasyon maninigong iyo man an katuyohan—“pagpakosog kan kongregasyon.”—Basahon an 1 Corinto 14:3, 12, 26.a
2. (a) Ano an dahelan na nakakapakosog an mga pagtiripon? (b) Anong hapot an pag-oolayan niato?
2 Nasasabotan niato na an paggiya kan banal na espiritu nin Dios iyo an pangenot na dahelan na nakakapakosog o nakakaparigon an mga pagtiripon. Kun siring, pinoponan niato an kada pagtiripon kan kongregasyon paagi sa odok sa pusong pamimibi ki Jehova na an pagtiripon logod bendisyonan kan satong langitnon na Ama paagi sa saiyang banal na espiritu. Pero, aram niato na makakatabang an gabos na miembro kan kongregasyon na magin nakakapakosog sagkod sa mapupuede an mga programa kan pagtiripon. Kun siring, ano an nagkapirang lakdang na magigibo niato personalmente tanganing siertohon na an semanal na mga pagtiripon sa Kingdom Hall pirmeng magin gikanan nin espirituwal na kaginhawahan asin pagparigon sa boot?
3. Gurano kahalaga an Kristianong mga pagtiripon?
3 Tanganing masimbag iyan, sisiyasaton niato an nagkapirang aspekto kan mga pagtiripon na maninigong isaisip kan mga namamayo dian. Pag-oolayan man niato kun paano makakatabang an bilog na kongregasyon na magin nakakaogma an mga pagtiripon para sa gabos na nag-aatender. Interesanteng marhay para sa sato an temang ini huling sagrado an mga pagtiripon. Tunay nanggad na an pag-atender asin pagpartisipar sa mga pagtiripon mahahalagang aspekto kan satong pagsamba ki Jehova.—Sal. 26:12; 111:1; Isa. 66:22, 23.
Sarong Pagtiripon na an Katuyohan Pag-adalan an Biblia
4, 5. Ano an katuyohan kan Pag-adal sa Torrengbantayan?
4 Gabos kita gustong makinabang nin lubos sa semanal na Pag-adal sa Torrengbantayan. Huli kaini, tanganing masabotan nin malinaw an pangenot na katuyohan kan pagtiripon na iyan, repasohon niato an nagkapirang pagliliwat sa magasin na An Torrengbantayan asin sa mga artikulong pinag-aadalan.
5 Poon sa enot na pinag-adalan na edisyon kan An Torrengbantayan, an Enero 15, 2008 isyu, may mahalagang detalye na iiniba sa tutob kaiyan. Narisa daw nindo iyan? Helingang marhay an tutob kan magasin na kapot nindo. Sa ibaba kan torre, may maheheling kamong nakabukas na Biblia. An idinagdag na iyan nagdodoon kan dahelan kun taano ta kita may Pag-adal sa Torrengbantayan. Iyan tanganing pag-adalan an Biblia sa tabang kan magasin na ini. Iyo, sa satong semanal na Pag-adal sa Torrengbantayan, “ipinapaliwanag nin detalyado” an Tataramon nin Dios, asin arog kan panahon ni Nehemias kan suanoy, “may pagtao dian nin kahulogan.”—Neh. 8:8; Isa. 54:13.
6. (a) Ano an pagliliwat sa Pag-adal sa Torrengbantayan? (b) Ano an maninigong girumdomon mapadapit sa mga tekstong may nakalaag na “basahon”?
6 Huling an Biblia an pangenot na librong pinag-aadalan niato, may pagliliwat sa Pag-adal sa Torrengbantayan. An nagkapirang sitadong teksto sa mga artikulong pinag-aadalan may nakalaag na “basahon.” Kita gabos dinadagka na subaybayan an pagbasa sa mga tekstong ini durante kan pagtiripon gamit an sato mismong Biblia. (Gibo 17:11) Taano? Kun nababasa niato sa satong Biblia an hatol nin Dios, mas dakula an epekto kaiyan sa sato. (Heb. 4:12) Kun siring, bago kan pagbasa nin makosog sa mga tekstong ini, an namamayo sa pagtiripon maninigong magtao nin igong panahon sa gabos na mahanap an mga tekstong ini asin makasubaybay sa pagbasa.
Mas Dakol na Panahon na Ipahayag an Satong Pagtubod
7. Ano an oportunidad niato durante kan Pag-adal sa Torrengbantayan?
7 An saro pang pagliliwat sa mga artikulong pinag-aadalan sa An Torrengbantayan iyo an laba kaiyan. Sa nakaagi pa sanang mga taon, mas halipot iyan. Huli kaini, sa Pag-adal sa Torrengbantayan, mas dikit na panahon an ginagamit sa pagbasa kan mga parapo mantang mas dakol an panahon para sa pagkomento. Mas dakol sa kongregasyon an may oportunidad ngonyan na magpahayag sa publiko kan saindang pagtubod paagi sa pagsimbag sa imprentadong hapot, pag-aplikar nin teksto, pagsaysay nin halipot na eksperyensia na nagpapaheling kan kadonongan nin pagsunod sa mga prinsipyo sa Biblia, o iba pang paagi. Maninigo man na magkaigwa nin panahon na pag-olayan an mga retrato o drowing.—Basahon an Salmo 22:22; 35:18; 40:9.
8, 9. Ano an papel kan namamayo sa Pag-adal sa Torrengbantayan?
8 Minsan siring, magkakaigwa sana kan dagdag na panahon na iyan para sa laen-laen na komento kun halipot sana an komento kan mga nagpapartisipar asin daing gayo nagpaparakomento an namamayo sa Pag-adal sa Torrengbantayan. Kun siring, ano an makakatabang sa namamayo na magin timbang sa mga komento nia asin komento kan kongregasyon tanganing an pagtiripon magin nakakapakosog sa gabos?
9 Tanganing masimbag iyan, pag-isipan an ilustrasyon na ini. An Pag-adal sa Torrengbantayan na napapamayohan na marhay puedeng iagid sa sarong dakulang bouquet o inareglar na mga burak na kawiliwiling paghelingon. Kun paanong iyan kompuesto nin dakol na indibiduwal na burak, an Pag-adal sa Torrengbantayan kompuesto man nin dakol asin laen-laen na komento. Asin kun paanong an indibiduwal na mga burak magkakalaen an kadakulaan asin kolor, an mga komento magkakalaen man an laba asin paagi nin pagtao kaiyan. Asin ano an papel kan namamayo? An paminsanminsan na pagkomento nia puedeng iagid sa pira sanang dahon na maingat na idinadagdag sa inaareglar na mga burak. An mga dahon na ini dai nangingibabaw; imbes, nagpapagayon ini sa pagkaareglar kan mga burak. Kaagid kaiyan, kaipuhan na girumdomon kan namamayo na an saiyang papel, bakong mangibabaw, kundi na ikatampok an mga kapahayagan nin pag-omaw kan kongregasyon. Iyo, kun maingat na pinag-iiriba an dakol asin laen-laen na komento kan kongregasyon saka an pira sanang angay na komento kan namamayo, iyan nagigin siring sa sarong magayon na inareglar na mga burak nin tataramon na kawiliwili sa gabos na nag-aatender.
“Danay Kitang Magdolot sa Dios nin Atang nin Pag-omaw”
10. Paano minansay kan enot na mga Kristiano an mga pagtiripon kan kongregasyon?
10 An pagkaladawan ni Pablo sa Kristianong mga pagtiripon sa 1 Corinto 14:26-33 nagtatao sa sato nin pakasabot kun paano iyan ginibo kan enot na siglo. Sa pagkomento sa mga bersikulong ini, an sarong iskolar sa Biblia nagsurat na an talagang naririsa manongod sa mga pagtiripon kan enot na mga Kristiano iyo na siertong “haros lambang nag-aatender nakakamate na pribilehio saka obligasyon nia na magpartisipar dian. An saro dai nag-aatender na an katuyohan magdangog sana; sia nag-aatender bako sanang tanganing mag-ako kundi magtao.” Tunay nanggad, minansay kan enot na mga Kristiano an mga pagtiripon kan kongregasyon bilang oportunidad na ikapahayag an pagtubod ninda.—Roma 10:10.
11. (a) Ano an nakakatabang na marhay na magin nakakapakosog an mga pagtiripon, asin taano? (b) Anong mga suhestion an maninigo tang iaplikar na makakapaoswag sa satong mga komento sa mga pagtiripon? (Helingon an nota sa ibaba.)
11 An pagpahayag kan satong pagtubod sa mga pagtiripon nakakatabang na marhay sa “pagpakosog kan kongregasyon.” Siertong maoyon kamo na gurano man kadakol nang taon kitang nag-aatender dian, tunay na nakakaogma pa man giraray na maghinanyog sa mga komento kan mga tugang. Kita napapahiro nin odok sa pusong simbag nin sarong maimbod asin may edad nang kapagtubod; kita naoogma huli sa may hararom na pakasabot na komento nin sarong mapagmakolog na magurang sa kongregasyon; asin napapangisi nanggad kita kun nagtatao nin sadiring komento an sarong aki bilang kapahayagan nin tunay na pagkamoot ki Jehova. Malinaw nanggad na paagi sa pagkomento kita gabos nagtatabang na magin nakakapakosog an Kristianong mga pagtiripon.b
12. (a) Ano an manonodan sa halimbawa ni Moises asin Jeremias? (b) Paano an pamibi makakatabang sa pagkomento?
12 Pero, para sa mga masusupgon, posibleng depisilon an pagkomento. Kun totoo iyan sa saindo, puedeng makatabang an paggirumdom na bako sana kamo an arog kaiyan. Sa katunayan, dawa an maimbod na mga lingkod nin Dios na arog ni Moises asin Jeremias nagpahayag nin kawaran nin kompiansa sa saindang kakayahan na magtaram sa publiko. (Ex. 4:10; Jer. 1:6) Pero, kun paanong tinabangan ni Jehova an mga lingkod na iyan kan suanoy na omawon sia sa publiko, tatabangan man kamo nin Dios na magdolot nin mga atang nin pag-omaw. (Basahon an Hebreo 13:15.) Paano kamo matatabangan ni Jehova na mapangganahan an saindong takot sa pagkomento? Enot, mag-andam na marhay para sa pagtiripon. Dangan, bago kamo magpa-Kingdom Hall, mamibi ki Jehova asin espesipikong ipakipag-olay na logod tawan kamo nin kosog nin boot na magkomento. (Fil. 4:6) Kamo naghahagad nin sarong bagay na “segun sa saiyang kabotan,” kaya makakapagtiwala kamo na sisimbagon ni Jehova an pamibi nindo.—1 Juan 5:14; Tal. 15:29.
Mga Pagtiripon na an Katuyohan ‘Magpakosog, Magparigon, Asin Magranga’
13. (a) Ano an maninigong magin epekto kan satong mga pagtiripon sa mga nag-aatender? (b) Anong hapot an nangorognang mahalaga para sa kamagurangan?
13 Sinabi ni Pablo na an sarong mahalagang katuyohan kan mga pagtiripon kan kongregasyon iyo na ‘pakosogon, parigonon, asin rangahon’ an mga nag-aatender.c (1 Cor. 14:3) Paano masisierto kan kamagurangan ngonyan na an saindang mga kabtang sa mga pagtiripon tunay nanggad na nakakapaogma asin nakakaranga sa mga tugang? Tanganing masimbag iyan, siyasaton niato an sarong pagtiripon na pinamayohan ni Jesus dai nahaloy pagkabuhay liwat sa saiya.
14. (a) Ano an mga pangyayari bago kan pagtiripon na iinareglar ni Jesus? (b) Taano ta siertong nakaginhawa an mga apostol kan ‘si Jesus magdolok asin magtaram sa sainda’?
14 Enot, mangnoha an mga pangyayari bago kan pagtiripon na iyan. Bago gadanon si Jesus, ‘binayaan sia kan mga apostol asin nagdurulag,’ saka arog kan ihinula, sinda ‘nagkawararak pasiring sa kanya-kanyang harong.’ (Mar. 14:50; Juan 16:32) Dangan, pagkabuhay liwat sa saiya, inimbitaran ni Jesus na mag-atender sa espesyal na pagtiripon an mga apostol na pinangluluyahan nin boot.d Bilang reaksion, “an onseng disipulo nagduman sa Galilea sa bukid na pinadumanan ni Jesus sa sainda.” Pag-abot ninda, “si Jesus nagdolok asin nagtaram sa sainda.” (Mat. 28:10, 16, 18) Imahinara an siertong pakaginhawa nanggad kan mga apostol kan si Jesus an enot na maggibo kaiyan! Ano an tinokar ni Jesus?
15. (a) Anong mga tema an tinokar ni Jesus, alagad ano an dai nia tinokar? (b) Ano an nagin epekto sa mga apostol kan pagtiripon na iyan?
15 Nagpoon si Jesus paagi sa pagpaisi: “An gabos na autoridad sa langit asin sa daga itinao na sa sako.” Dangan tinawan nia sinda nin asignasyon: “Kun siring, paduman kamo asin gumibo kamo nin mga disipulo.” Ultimo, tinawan nia sinda nin mamomoton na garantiya: “Ako kaiba nindo sa gabos na aldaw.” (Mat. 28:18-20) Alagad nariparo daw nindo an dai ginibo ni Jesus? Dai nia sinagwe an mga apostol; ni ginamit man nia an pagtiripon na iyan tanganing kuestionon an motibo ninda o orog pang konsensiahon sinda paagi sa pagsambit sa temporaryong kaluyahan kan saindang pagtubod. Imbes, sinierto ni Jesus sa sainda an pagkamoot nia asin kan saiyang Ama kan pagkatiwalaan nia sinda nin magabat na asignasyon. Ano an nagin epekto sa mga apostol kan pamamaagi ni Jesus? Sinda napakosog, naparigon, asin narangang marhay kaya dai nahaloy pagkatapos kan pagtiripon na iyan, sinda ‘nagtotokdo asin nagpapahayag na giraray kan maogmang bareta.’—Gibo 5:42.
16. Paano inaarog kan Kristianong kamagurangan ngonyan an halimbawa ni Jesus sa pamamayo sa mga pagtiripon na gikanan nin kaginhawahan?
16 Bilang pag-arog ki Jesus, minamansay kan kamagurangan ngonyan an mga pagtiripon bilang oportunidad na siertohon sa mga kapagtubod an dai nasusudyang pagkamoot ni Jehova para sa banwaan nia. (Roma 8:38, 39) Huli kaini, sa saindang mga kabtang sa pagtiripon, an kamagurangan nagkokonsentrar sa marahay na mga kualidad kan mga tugang, bako sa mga kaluyahan ninda. Dai ninda kinukuestion an motibo kan mga tugang. Imbes, ihinahayag kan saindang mga tataramon na minamansay ninda an mga kapagtubod bilang mga indibiduwal na namomoot ki Jehova asin gustong gibohon an tama. (1 Tes. 4:1, 9-12) Siempre, kun beses kaipuhan kan kamagurangan na magtao nin hatol na nagtatanos sa kongregasyon sa pangkagabsan, alagad kun pira sanang indibiduwal an kaipuhan na itanos, sa parate pinakamarahay na itao an siring na hatol sa pribadong pakipag-olay sa sainda. (Gal. 6:1; 2 Tim. 2:24-26) Kun nagtataram sa bilog na kongregasyon, katuyohan kan kamagurangan na magtao nin komendasyon kun angay. (Isa. 32:2) Sinda nagmamaigot na magtaram sa paaging nakakaginhawa asin nakakapakosog sa gabos na nag-atender pagkatapos kan pagtiripon.—Mat. 11:28; Gibo 15:32.
Sarong Ligtas na Lugar
17. (a) Taano ta orog na mahalaga kisa kasuarin man na an satong mga pagtiripon ligtas na lugar? (b) Ano an magigibo nindo personalmente tanganing magin nakakapakosog an mga pagtiripon? (Helingon an kahon na “Sampulong Paagi na Magin Nakakapakosog an mga Pagtiripon Para sa Saimo Asin sa Iba.”)
17 Mantang an kinaban ni Satanas orog pang nagigin mapang-api, kaipuhan tang siertohon na an satong Kristianong mga pagtiripon ligtas na lugar—sarong gikanan nin karangahan para sa gabos. (1 Tes. 5:11) Nagigirumdoman nin sarong tugang na babae na nagtagal nin grabeng pagbalo kaiba an saiyang agom pirang taon na an nakaagi: “An pagigin nasa Kingdom Hall garo pagigin nasa mapagmakolog na kamot ni Jehova. Sa mga oras na kami yaon duman, na napapalibotan nin mga tugang na Kristiano, namamatean mi na ikinakabugtak niamo ki Jehova an nakakapagabat sa samo, asin naeeksperyensiahan mi an panglaog na pagkakalmado.” (Sal. 55:22) Maparigon asin maranga man logod an gabos na nag-aatender sa mga pagtiripon niato. Tanganing masierto ini, padagos kitang magtabang na magin nakakapakosog an Kristianong mga pagtiripon.
[Mga Nota sa Ibaba]
a Ihinula na mapondo an nagkapirang aspekto nin Kristianong mga pagtiripon kan enot na siglo. Halimbawa, dai na kita ‘nagtataram nin laen-laen na lenguahe’ o ‘naghuhula.’ (1 Cor. 13:8; 14:5) Minsan siring, an mga instruksion ni Pablo nagtatao sa sato nin orog na pakasabot sa kun paano gigibohon an Kristianong mga pagtiripon ngonyan.
b Para sa mga suhestion kun paano mapapaoswag an satong mga komento sa mga pagtiripon, helingon An Torrengbantayan na Setyembre 1, 2003, pahina 19-22.
c Kun dapit sa pagkakalaen kan “pagparigon” asin “pagranga,” ipinaliwanag kan Vine’s Expository Dictionary of Old and New Testament Words na an termino sa Griego na trinadusir na “pagranga” nagpaparisa “nin orog na pagpadangat kisa sa [pagparigon].”—Ikomparar an Juan 11:19.
d Tibaad ini an pangyayari na sinambit ni Pablo kan huri kan sabihon nia na si Jesus “nagpaheling sa labing limang gatos.”—1 Cor. 15:6.
Ano an Isisimbag Nindo?
• Gurano kahalaga an Kristianong mga pagtiripon?
• Taano ta nakakatabang sa “pagpakosog kan kongregasyon” an mga komento sa mga pagtiripon?
• Ano an manonodan sa pagtiripon na pinamayohan ni Jesus kaiba an saiyang mga parasunod?
[Kahon/Mga Ritrato sa pahina 22, 23]
SAMPULONG PAAGI NA MAGIN NAKAKAPAKOSOG AN MGA PAGTIRIPON PARA SA SAIMO ASIN SA IBA
Mag-andam nin patienot. Kun patienot mong pinag-aadalan an mga totokaron sa Kingdom Hall, magigin mas interesanteng marhay para sa saimo an mga pagtiripon asin iyan magkakaigwa nin mas hararom na epekto.
Mag-atender nin regular. Huling mas napaparigon an gabos na presente kun dakol an nag-aatender, mahalaga an saimong presensia.
Mag-abot na nasa oras. Kun nakatukaw ka na bago magpoon an programa, makakasabay ka sa pambukas na awit asin pamibi, na kabtang kan satong pagsamba ki Jehova.
Mag-atender na kompleto sa gamit. Darahon an saimong Biblia asin an (mga) publikasyon na gagamiton sa pagtiripon tanganing makasubaybay asin mas masabotan an tinotokar.
Likayan an mga nakakadisturbo. Halimbawa, basahon an mga text message sa cell phone pagkatapos, bakong durante, kan mga pagtiripon. Paagi kaiyan, ibinubugtak mo sa tamang lugar an personal na mga aktibidad.
Magpartisipar. Kun mas dakol an nagkokomento, mas dakol an napaparigon asin napapakosog huli sa laen-laen na kapahayagan nin pagtubod.
Papagdanayon na halipot sana an saimong komento. Ini nagtatao nin oportunidad na magkomento an pinakadakol na mapupuede.
Gibohon an mga asignasyon. Bilang estudyante sa Teokratikong Paadalan sa Pagmiministro o partisipante sa Pagtiripon sa Paglilingkod, mag-andam na marhay, mag-ensayo nin patienot, asin pagmaigotan na marhay na dai kanselaron an mga asignasyon mo.
Tawan nin komendasyon an mga may kabtang o nagpartisipar. Sabihon sa mga may kabtang sa pagtiripon o nagkomento na inaapresyar mong marhay an saindang paghihingoa.
Makiasosyar. An maboot na pagkumusta asin nakakapakosog na pakikipag-olay bago asin pagkatapos nin mga pagtiripon nakakadagdag na marhay sa kaogmahan asin kapakinabangan huli sa pagigin presente.