Hapot

◼ Ano an magigibo niato tangani na makatabang na mapaoswag an pagigin epektibo kan satong mga pagtiripon?

An iba tibaad may tendensiang maghona na an kamagurangan asin ministeryal na mga lingkod an solamenteng may paninimbagan para sa kapangganahan kan mga pagtiripon kan kongregasyon huli ta sinda an nagkokondukta kaiyan asin nag-aasikaso kan kadaklan sa mga kabtang. An totoo, kita gabos personal na makakokontribwir na magin interesante asin kapakipakinabang an mga pagtiripon. Makatatabang kita na magibo an mga pagtiripon na orog na epektibo sa minasunod na sampulong paagi:

Mag-andam nin patienot. Kun kita nag-aandam nin marhay, interesante para sa sato an mga pagtiripon. Kun kita gabos naggigibo kaini, mas buhay asin orog na nakaparirigon an mga pagtiripon. Umatender nin regular. An halangkaw na bilang nin nag-aatender orog na nakaparirigon sa boot kan gabos na presente, na pinakokosog an satong pag-apresyar sa importansia nin pag-atender. Umabot na nasa oras. Kun nakatukaw na bago pumoon an programa, makaiiba kita sa pambukas na awit asin pamibi patin sa siring lubos na makikinabang sa pagtiripon. Umatender na kompleto an gamit. Paagi sa pagdara kan satong Biblia asin (mga) publikasyon na ginagamit durante kan pagtiripon, masusundan asin masasabotan niato nin orog an ipinaliliwanag. Likayan an mga disturbo. Makahihinanyog kita nin orog kun kita nakatukaw sa enotan. An mga paghinghing asin pagparaduman sa kasilyas puedeng ikawara kan konsentrasyon niato asin kan iba. Magin partisipante. Kun dakol sa sato an nag-iitaas nin kamot asin nagkokomento, mas dakol an naparirigon an boot asin napakokosog kan mga kapahayagan nin pagtubod. Magkomento nin halipot. Ini nagtatao nin oportunidad na makikabtang an pinakadakol na mapupuede. An satong halipot na mga komento maninigo na konektado sa materyal na pinag-aadalan. Gibohon an mga asignasyon. Bilang mga estudyante sa Teokratikong Paadalan sa Pagmiministro o bilang mga partisipante sa Pagtiripon sa Paglilingkod, mag-andam nin marhay, mag-ensayo nin patienot, asin hingoahon na gibohon iyan. Komendaran an mga may kabtang. Sabihon sa iba kun gurano nindo inaapresyar an saindang mga paghihingoa. Ini nakaparirigon sa sainda asin nakamomotibar sa sainda na orog pa nganing maghingoa sa ngapit. Magparinigonan nin boot. An maboot na mga pagtaratara asin nakaparirigon na mga pakikipag-olay, bago asin pakatapos kan mga pagtiripon, nakadadagdag sa kaogmahan asin mga pakinabang na nakukua niato sa pag-atender sa mga pagtiripon.