Mga Pagtiripon na ‘Nakakapahiro na Magpahiling nin Pagkamuot Asin Marahay na mga Gibo’

SA LAOG nin dakul na siglo, nagtitiripon an mga lingkod ni Jehova sa organisadong paagi. Sa suanoy na Israel, nagduduman sa Jerusalem an gabos na lalaki para sa tulong dakulang kapiyestahan. (Deut. 16:16) Kan inot na siglo, regular na nagtitiripon an mga Kristiyano, na sa parati sa sarong harong. (Filem. 1, 2) Sa ngunyan, igwa man kita nin mga pagtiripon, asembleya, asin kumbensiyon. Taano ta nagtitiripon an mga lingkod nin Diyos? An panginot na dahilan iyo na importanteng kabtang iyan kan satong pagsamba.—Sal. 95:6; Col. 3:16.

² Nakikinabang man sa mga pagtiripon an mga nag-aatender. Manungod sa kada ikapitong Kapiyestahan nin mga Payag-payag, sinabi sa mga Israelita: “Tipunon nindo an banwaan, an mga lalaki, an mga babayi, an mga aki, asin an mga dayuhan na residente na nasa laog kan saindong mga siyudad, tanganing magdangog sinda asin makanuod manungod ki Jehova na saindong Diyos asin magkaigwa nin pagkatakot sa saiya asin tanganing sunudon nanggad ninda an gabos na tataramon kan Katugunan na ini.” (Deut. 31:12) Malinaw nanggad, an sarong importanteng dahilan kan pagtiripon iyo na tanganing ‘matukduan ni Jehova.’ (Isa. 54:13) An mga pagtiripon nagtatao man sato nin oportunidad na magkamiridbidan asin mapakusog paagi sa pakikiasosyar.

MGA PAGTIRIPON KAN KONGREGASYON

³ An mga disipulo na nagtiripon pagkatapos kan Pentecostes 33 C.E. padagos na nagdangog sa itinutukdo kan mga apostol, asin “aroaldaw sindang pirming nasa templo na may pagkasararo.” (Gibo 2:42, 46) Pag-abot nin panahon, pag nagtitiripon an mga Kristiyano para sa pagsamba, binabasa ninda an ipinasabong na mga kasuratan, kaiba na an mga surat kan mga apostol asin iba pang Kristiyanong disipulo. (1 Cor. 1:1, 2; Col. 4:16; 1 Tes. 1:1; Sant. 1:1) Namimibi man sinda bilang sarong kongregasyon. (Gibo 4:24-29; 20:36) Kun beses, may mga isinasaysay na eksperyensiya nin mga misyonero. (Gibo 11:5-18; 14:27, 28) Pinag-uulayan ninda an mga doktrina sa Bibliya asin an kautuban nin ipinasabong na mga propesiya. Tinutukduan sinda manungod sa Kristiyanong paggawi asin diyosnon na debosyon. An gabos dinadagka na magin maigot na mga parabalangibog kan maugmang bareta.—Roma 10:9, 10; 1 Cor. 11:23-26; 15:58; Efe. 5:1-33.

⁴ Sa satong panahon, an Kristiyanong mga pagtiripon ginigibo sigun sa halimbawang itinao kan mga apostol. Sinusunod ta an ipinasabong na sadol sa Hebreo 10:24, 25: “Padagos tang isip-isipon an kada saro . . . , na dai pinapabayaan an satuyang pagtiripon, siring kan nakaugalian na nin nagkapira, kundi padagos na pinapakusog an lambang saro, lalo na ta nahihiling nindo na an aldaw harani na.” Sa masakit na huring mga aldaw na ini, kaipuhan niyato an dagdag pang pampakusog na nakukua sa regular na pagtiripon tanganing padagos na magin makusog an satong espirituwalidad asin Kristiyanong integridad. (Roma 1:11, 12) Bilang mga Kristiyano, napapalibutan kita nin maraot asin makasalan na henerasyon. Pero isinikwal na niyato an bakong diyosnon na paggawi asin kinabanon na mga pagmawot. (Fil. 2:15, 16; Tito 2:12-14) Kaya bako daw na mas gusto tang makiiba-iba sa mga lingkod ni Jehova? (Sal. 84:10) Saka bako daw na kapaki-pakinabang na marhay an pag-adal asin pag-urulay manungod sa Tataramon nin Diyos? Pag-ulayan ta an manlain-lain na pagtiripon na inareglo para sa kapakinabangan ta.

PAGTIRIPON SA PURO KAN SEMANA

⁵ An inot na kabtang kan pagtiripon sa puro kan semana iyo an diskurso na basado sa Bibliya na inandam partikularmente para sa publiko, na an nagkapira tibaad primero pa sanang beses na makaatender. An pampublikong pahayag importanteng marhay huling naitatao kaiyan an espirituwal na pangangaipo kan mga bagong nakikiasosyar saka kan mga parahayag sa kongregasyon.—Gibo 18:4; 19:9, 10.

⁶ Si Cristo Jesus, an mga apostol niya, asin an mga kairiba ninda nagsagibo nin pampublikong mga pagtiripon na arog kan ginigibo ngunyan kan mga kongregasyon kan mga lingkod ni Jehova. Mayong duda, si Jesus an pinakamatibay na ispiker sa publiko na nabuhay digdi sa daga. May nagsabi manungod sa saiya: “Dai pa nin siisay man na tawong nagtaram nin arog kaini.” (Juan 7:46) Nagtaram siya na igwa nin awtoridad kaya napangalas an mga nagdadangog. (Mat. 7:28, 29) Nakinabang na marhay an mga nagsapuso kan mensahe niya. (Mat. 13:16, 17) Inarog kan mga apostol an halimbawa niya. Sa Gibo 2:14-36, mababasa ta an nakakapahirong marhay na diskurso ni Pedro kan aldaw nin Pentecostes 33 C.E. Rinibo an napahiro huli sa nadangog ninda. Pag-abot nin panahon, may mga nagturubod huli sa diskursong nadangog ninda ki Pablo sa Atenas.—Gibo 17:22-34.

⁷ Sa panahon man niyato ngunyan, milyon-milyon an nakikinabang sa mga pampublikong pahayag sa mga kongregasyon kada semana saka sa mga asembleya asin kumbensiyon. An siring na mga pahayag nakakatabang sato na pirming isaisip an Kristiyanong mga katukduan asin magin maigot sa paglilingkod sa Kahadian. Pag iniimbitaran ta an mga interesado asin an iba pa, natatabangan ta an mga tawo na maaraman an panginot na mga katukduan sa Bibliya.

⁸ Iba-iba an tema kan mga pampublikong pahayag. Ipinapaliwanag diyan an manungod sa mga doktrina asin propesiya sa Bibliya, mga prinsipyo saka konseho sa Kasuratan manungod sa pamilya asin mag-agom, mga sitwasyon na napapaatubang sa mga hoben, asin Kristiyanong pamantayan sa moral. May mga pahayag manungod sa makangangalas na mga linalang ni Jehova. An iba manungod sa pagtubod, kusog nin buot, asin integridad kan mga karakter sa Bibliya saka sa mga leksiyon na manunudan ta diyan.

⁹ Tanganing lubos na makinabang sa mga pampublikong pahayag, mahalaga na magdangog na marhay, hanapon an mga tekstong sinasabi kan ispiker, asin magsubaybay mantang binabasa saka ipinapaliwanag niya iyan. (Luc. 8:18) Paagi kaiyan, nasisiyerto tang totoo an sinasabi kan ispiker asin mas nagigin determinado kitang pangaptan asin isabuhay an satong mga nanunudan.—1 Tes. 5:21.

¹⁰ Kun may supisyenteng ispiker, an kongregasyon siguradong magkakaigwa nin pampublikong pahayag kada semana. Sa parati, magigibo ini paagi sa pag-imbitar nin mga ispiker hali sa kaharaning mga kongregasyon. Kun kulang nin mga ispiker, gigibuhon man giraray an mga pahayag sagkod na posible.

¹¹ An ikaduwang programa kan pagtiripon sa puro kan semana iyo an Pag-adal sa Torrengbantayan, sarong hapot-simbagan na pagtukar sa mga artikulo sa pag-aadalan na edisyon kan Torrengbantayan. Paagi sa Torrengbantayan, tinatawan kita ni Jehova nin napapanahon na espirituwal na kakanon.

¹² An mga artikulong pinag-aadalan parating manungod sa pag-aplikar kan mga prinsipyo sa Bibliya sa pang-aroaldaw na buhay. Pinapakusog kaiyan an mga Kristiyano laban sa “espiritu kan kinaban” asin maating paggawi. (1 Cor. 2:12) Paagi sa Torrengbantayan, urog na nagigin maliwanag an mga doktrina asin hula sa Bibliya, na nakakatabang sa gabos na padagos na makasabay sa pagliwanag kan katotoohan saka magdanay sa dalan kan mga matanos. (Sal. 97:11; Tal. 4:18) An pag-atender asin pagkomento sa Pag-adal sa Torrengbantayan makakatabang sa sato na mag-ugma sa paglaom sa matanos na bagong kinaban ni Jehova. (Roma 12:12; 2 Ped. 3:13) An pakikiasosyar ta sa mga kapwa Kristiyano nakakatabang sato na maipahiling sa buhay an mga aspekto kan bunga kan espiritu asin mapakusog an satong pagmawot na maglingkod ki Jehova na may kaigutan. (Gal. 5:22, 23) Napapakusog kitang tagalan an mga kasakitan asin magkaigwa nin “marahay na pundasyon para sa ngapit” tanganing “makapangapot [kita] nin higot sa tunay na buhay.”—1 Tim. 6:19; 1 Ped. 1:6, 7.

¹³ Paano kita lubos na makikinabang sa espirituwal na pagpakakan na ini? Bilang pamilya o indibidwal, dapat tang adalan an leksiyon antes pa, basahon an sitadong mga teksto, asin magkomento sa sadiring tataramon durante kan pagtiripon. Itatadom kaini sa satong puso an katotoohan, asin makikinabang an iba na nagdadangog sa satong kapahayagan nin pagtubod. Paagi sa pagdangog na marhay sa mga komento kan iba, makikinabang kita sa pag-adal surusemana.

PAGTIRIPON SA TAHAW KAN SEMANA

¹⁴ Nagtitiripon an kongregasyon kada semana sa Kingdom Hall para sa pagtiripon na inaapod na An Satong Kristiyanong Pamumuhay Asin Ministeryo. Igwa ini nin tulong seksiyon na dinisenyo para tabangan kitang magin “lubos na kuwalipikado” bilang mga ministro nin Diyos. (2 Cor. 3:5, 6) An iskedyul asin mga tutukaron yaon sa An Satong Kristiyanong Pamumuhay Asin Ministeryo—Workbook Para sa Pagtiripon kada bulan. An workbook na ini igwa man nin sampol na mga pakikipag-ulay na magagamit sa ministeryo.

¹⁵ An inot na seksiyon kan pagtiripon na ini, an Kayamanan na Yaon sa Tataramon nin Diyos, makakatabang sa sato na magin pamilyar sa mga pangyayari, kamugtakan, saka konteksto kan mga salaysay sa Bibliya asin maaraman kun paano ta iyan ikakaaplikar sa satong buhay. An seksiyon na ini igwa nin pahayag, pagbasa, asin pagtukar basado sa semanal na babasahon sa Bibliya. May mga visual aid man asin worksheet sa Workbook sa Pagtiripon na Pamumuhay Asin Ministeryo bilang pantabang sa pagtutukdo kan mga salaysay na iyan sa Bibliya. An hararom na pag-adal na ini sa Bibliya makakatabang sa sato mismong buhay asin sa satong pagtutukdo, tanganing kita magin “lubos na may kakayahan, lubos na nasangkapan para sa gabos na marahay na gibo.”—2 Tim. 3:16, 17.

¹⁶ An ikaduwang seksiyon kan pagtiripon iyo an Magin Andam sa Ministeryo. Dinisenyo ini tanganing matawan an gabos nin pagkakataon na makapagpraktis para sa ministeryo asin mapauswag an kakayahan sa paghuhulit asin pagtutukdo. Apuwera sa mga asignasyon kan mga estudyante, may tinutukar man na mga video nin sampol na pakikipag-ulay. An seksiyon na ini kan pagtiripon nakakatabang sa sato na magkaigwa kan “dila kan mga natukduan” tanganing “maaraman [ta] kun paano sisimbagon nin tamang tataramon an napapagal.”—Isa. 50:4.

¹⁷ An ikatulong seksiyon iyo an Pamumuhay Bilang Kristiyano. Tinutukar digdi kun paano iaaplikar sa satong pang-aroaldaw na buhay an mga prinsipyo sa Bibliya. (Sal. 119:105) An sarong panginot na kabtang sa seksiyon na ini iyo an Pag-adal sa Bibliya kan Kongregasyon. Arog kan Pag-adal sa Torrengbantayan, an Pag-adal sa Bibliya kan Kongregasyon sarong hapot-simbagan na pagtukar.

¹⁸ Kada bulan, pag igwa nang bagong Workbook sa Pagtiripon na Pamumuhay Asin Ministeryo, inaanalisar iyan na marhay kan koordineytor kan grupo nin kamagurangan, o nin sarong elder na nagtatabang sa saiya, bago maggibo nin iskedyul. Kada semana, sarong elder na mahusay magtukdo asin inaprubaran kan grupo nin kamagurangan an magseserbing tsirman sa pagtiripon. Kaiba sa paninimbagan niya an pagsigurado na mapunan asin matapos sa tamang oras an pagtiripon pati na an pagtao nin komendasyon asin konseho sa mga estudyante na may kabtang.

¹⁹ Pag regular kitang nag-aandam, nag-aatender, asin nagpapartisipar sa Pagtiripon na Pamumuhay Asin Ministeryo, nadadagdagan an satong kaaraman sa Kasuratan, an satong pakasabot sa mga prinsipyo sa Bibliya, an satong kumpiyansa sa paghuhulit kan maugmang bareta, asin an satong kakayahan sa paggibo nin mga disipulo. An mga nag-aatender na bako pang bawtisadong Saksi nakikinabang man sa maugmang asosasyon asin programang nakakapakusog sa espirituwal. Tanganing tabangan kita na mag-andam sa pagtiripon na ini asin sa iba pa, puwede tang gamiton an Watchtower Library, JW Library^®, Watchtower ONLINE NA LIBRARYA (kun igwa sa lengguwahe nindo), asin an librarya sa Kingdom Hall. An librarya sa Kingdom Hall igwa nin publikasyon kan Mga Saksi ni Jehova, Watch Tower Publications Index o Giya sa Pag-research Para sa Mga Saksi ni Jehova, saka nagkapirang bersiyon kan Bibliya, konkordansiya, diksiyonaryo, asin iba pang nakakatabang na reperensiya. An librarya na ini puwedeng gamiton nin siisay man bago o pagkatapos kan mga pagtiripon.

PAGTIRIPON BAGO MAGLINGKOD SA LANGTAD

²⁰ Sa lain-lain na oras sa laog kan semana asin sa mga puro kan semana, nagtitiripon nin madali sana an mga grupo nin mga parahayag bago maglingkod sa langtad. Sa parati, ginigibo ini sa mga pribadong harong o sa iba pang kumbenyenteng lugar. Puwede man na gamiton an Kingdom Hall para digdi. Pag an saradit na mga grupo nagtitiripon sa iba-ibang lokasyon sa teritoryo, mas madali para sa mga parahayag na makaduman sa mga pagtiripon bago maglingkod asin sa teritoryo. Madaling maoorganisar an mga parahayag asin makakaduman tulos sinda sa teritoryo. Mas matatawan man nin atensiyon kan paraataman nin grupo an mga kagrupo niya. Bagaman may mga bentaha kun magkakasuhay an pagtiripon kan mga grupo, tibaad may mga pagkakataon na mas praktikal kun iribang magtitiripon an nagkapirang grupo. Halimbawa, kun dikit an mga parahayag na nagluluwas sa ministeryo sa mga aldaw sa laog kan semana, tibaad mas marahay na pag-iribanon an nagkapirang grupo o magtiripon gabos sa Kingdom Hall o sa ibang angay na lokasyon. Paagi kaini, may makakapartner an mga parahayag. Tibaad kumbenyente man para sa kongregasyon na magtiripon sa Kingdom Hall bago maglingkod sa langtad pag holiday o piyesta opisyal. O puwede man na pagsararuon an gabos na grupo sa pagtiripon bago magluwas sa langtad pagkatapos kan Pag-adal sa Torrengbantayan.

²¹ Kun magkakasuhay an pagtiripon kan mga grupo, an paraataman nin grupo an manginginot sa pagtiripon bago maglingkod sa langtad. Sa pana-panahon, puwedeng asignaran kan paraataman nin grupo an assistant niya o an ibang kuwalipikadong brother na mamayo sa siring na mga pagtiripon. An mamamayo dapat na mag-andam nin tutukaron na puntong praktikal asin makakatabang sa ministeryo sa langtad. Sasabihon niya an areglo sa paghuhulit, dangan saro sa grupo an manginginot sa pamibi. Pagkatapos kaiyan, maduman na tulos sa teritoryo an grupo. Lima sagkod pitong minuto sana an mga pagtiripon na iyan, pero dapat na mas halipot iyan kun kasunod iyan nin pagtiripon kan kongregasyon. Dapat na magtao iyan nin pampakusog, praktikal na instruksiyon, asin paggiya para sa mga mahulit. An mga baguhan o iba pa na tibaad nangangaipo nin tabang puwedeng ipartner sa eksperyensiyadong mga parahayag para masanay sinda.

MGA AREGLO NIN PAGTIRIPON PARA SA BAGO O SADIT NA MGA KONGREGASYON

²² Miyentras na nagdadakul an nagigin disipulo, nagdadakul man an mga kongregasyon. An aplikasyon para sa bagong kongregasyon sa parati isinusumitir kan paraataman nin sirkito. Pero sa nagkapirang kamugtakan, tibaad mas may bentaha kun an saradit na grupo mag-asosyar sa pinakaharaning kongregasyon.

²³ Kun beses, an saradit na kongregasyon tibaad puro sana mga sister. Kun iyan an kamugtakan, an sister na nanginginot sa pamibi sa kongregasyon o nagkokondukta sa mga pagtiripon dapat na magkulbong, kauyon kan areglo na sinasabi kan Kasuratan. (1 Cor. 11:3-16) Sa parati, siya nakatukaw asin nakaatubang sa grupo. An mga sister dai nagtatao nin mga diskurso sa mga pagtiripon. Imbes, binabasa ninda an materyal na itinao kan organisasyon asin kinokomentuhan ninda iyan, o puwede man nindang gibuhon iyan na pag-urulay o demonstrasyon. Hahagadon kan sangang opisina na saro sa mga sister an magresibi saka magpadara nin mga surat sa sangang opisina asin mag-asikaso kan mga pagtiripon. Pag-abot nin panahon, kun may mga brother na kuwalipikado na, sinda na an maasikaso kan mga paninimbagan na ini.

MGA PANSIRKITONG ASEMBLEYA

²⁴ Kada taon, may ginigibong areglo na magtiripon sa duwang tigsarong aldaw na pansirkitong asembleya an mga kongregasyon na kabilang sa sarong sirkito. An maugmang mga okasyon na ini nagtatao nin oportunidad sa gabos na presente na ‘buksan nin lubos an saindang puso’ sa pakikiasosyar sa mga kapwa Kristiyano. (2 Cor. 6:11-13) Isinasaisip kan organisasyon ni Jehova an espesipikong mga pangangaipo kan mga tugang pag nag-aandam nin mga tema na basado sa Kasuratan asin nin lain-lain na kabtang sa mga programang ini. Ipinepresentar an impormasyon paagi sa mga diskurso, demonstrasyon, pag-akto nin mga eksperyensiya, pakikipag-ulay sa sadiri, asin interbiyu. An siring na napapanahon na pagtutukdo nakakapakusog sa gabos na nag-aatender. An mga asembleyang ini nagtatao nin oportunidad sa bagong mga disipulo na magpabawtismo bilang simbolo kan saindang pagdusay ki Jehova.

MGA PANGREHIYON NA KUMBENSIYON

²⁵ Sarong beses kada taon, may ginigibong mas darakulang pagtiripon. Sa parati, tulong aldaw an mga pangrehiyon na kumbensiyon na ini, na pinag-iiriba an mga kongregasyon hali sa nagkapirang sirkito. Sa mas saradit na sangay, tibaad mas praktikal sa sainda na magtiripon sa saro sanang lokasyon an gabos na kongregasyon na nasa teritoryo kaiyan. Sa ibang kadagaan, an mga areglo para sa mga pagtiripon na ini puwedeng magkakalain depende sa mga kamugtakan o sigun sa instruksiyon kan organisasyon. Sa pana-panahon, may ginigibong mga internasyonal o espesyal na kumbensiyon sa nagkapirang nasyon na puwedeng atenderan nin ribo-ribong Saksi hali sa lain-lain na kadagaan. Sa nag-aging mga taon, dakul an nakanuod manungod sa maugmang bareta kan Kahadian huli sa publisidad manungod sa darakulang pagtiripon na ini kan Mga Saksi ni Jehova.

²⁶ Para sa nagdusay na mga lingkod ni Jehova, an mga kumbensiyon maugmang mga okasyon na diyan nagkakasararo sinda sa pagsamba. Ihinahayag diyan an urog pang liwanag manungod sa katotoohan. Sa nagkapirang kumbensiyon, may ilinuluwas na bagong mga publikasyon para magamit sa personal na pag-adal asin pag-adal sa kongregasyon o sa ministeryo sa langtad. May ginigibo man na pagbawtismo sa mga kumbensiyon. Nakakatabang an mga kumbensiyon lalo na sa pagpakusog kan satong espirituwalidad. Nagtatao iyan nin patotoo na an mga lingkod ni Jehova saro nanggad na internasyonal na organisasyon nin nagdusay na mga Kristiyano asin yaon sainda an midbidan nin pagigin mga disipulo ni Jesu-Cristo.—Juan 13:35.

²⁷ An pag-atender sa mga pagtiripon kan lokal na kongregasyon saka sa mga asembleya asin kumbensiyon nagpapakusog sa sato na gibuhon an kabutan ni Jehova. Napoproteksiyunan man kita sa kinabanon na mga impluwensiya na puwedeng makapaluya sa satong pagtubod bilang mga Kristiyano. An siring na mga pagtiripon nagtatao nin kamurawayan asin kaumawan ki Jehova. (Sal. 35:18; Tal. 14:28) Nagpapasalamat nanggad kita na iinareglo ni Jehova an mga okasyon na ini para sa espirituwal na kaginhawahan kan saiyang nagdusay na mga lingkod sa panahon na ini kan katapusan.

AN PAMANGGIHAN KAN KAGURANGNAN

²⁸ Sarong beses kada taon, sa anibersaryo kan kagadanan ni Jesu-Cristo, sineselebrar kan mga kongregasyon kan Mga Saksi ni Jehova sa bilog na kinaban an Memoryal kan kagadanan ni Cristo, o an Pamanggihan kan Kagurangnan. (1 Cor. 11:20, 23, 24) Ini an pinakamahalagang pagtiripon kan taon para sa mga lingkod ni Jehova. Espesipiko kitang pinagbutan na selebraron iyan.—Luc. 22:19.

²⁹ An petsa kan Memoryal katumbas kan petsa kan Paskuwa na sinasabi sa Kasuratan. (Ex. 12:2, 6; Mat. 26:17, 20, 26) An Paskuwa iyo an taunan na selebrasyon sa pagrumdom kan paghali kan mga Israelita sa Ehipto kan taon 1513 B.C.E. Kan panahon na idto, an ika-14 aldaw kan saindang inot na lunar na bulan an pinili ni Jehova na petsa na kakakanon ninda an kordero nin Paskuwa asin mahali sinda sa pagkabihag sa Ehipto. (Ex. 12:1-51) Para maaraman an petsa, nagbibilang nin 13 aldaw puon sa inot na paglataw kan bagong bulan (new moon) na pinakaharani sa spring equinox asin mahihiling sa Jerusalem. Sa parati, an pagselebrar kan Memoryal natatangod sa inot na kabilugan kan bulan (full moon) pagkatapos kan spring equinox.

³⁰ Sa Mateo 26:26-28, sinabi mismo ni Jesus kun paano iseselebrar an Memoryal. Bako iyan misteryosong ritwal kundi sarong simbolikong pamanggihan na an mga nagkakakan asin nag-iinom diyan iyo an mga inapod tanganing magin kairiba ni Jesu-Cristo na tagapagmana kan Kahadian sa langit. (Luc. 22:28-30) An gabos na iba pang nagdusay na Kristiyano asin interesadong tawo dinadagka na umatender sa Pamanggihan kan Kagurangnan bilang mga nagmamasid. Paagi sa pag-atender, ipinapahiling ninda an saindang pagpapahalaga sa itinaong probisyon ni Jehova Diyos para sa kapakinabangan kan bilog na katawuhan paagi sa saiyang Aki, si Jesu-Cristo. Bago kan Memoryal, may ginigibong espesyal na pampublikong pahayag na an katuyuhan dagkahon kitang umatender sa okasyon na ini asin lalo pang pakusugon an interes kan mga bisita na mag-adal nin Bibliya.

³¹ Bilang mga Saksi ni Jehova, maugma tang inaabangan an mga pagkakataon na iriba kitang nagtitiripon, na diyan ‘padagos tang iniisip-isip an kada saro sa katuyuhan na mapahiro an lambang saro na magpahiling nin pagkamuot asin marahay na mga gibo.’ (Heb. 10:24) Alisto an maimbod asin mapagmansay na uripon sa pag-areglo kan siring na mga pagtiripon tanganing maitao an espirituwal na mga pangangaipo ta. Dinadagka an gabos na lingkod ni Jehova pati na an mga interesado na lubos na makinabang sa regular na mga pagtiripon. Pag udok sa puso niyatong pinapahalagahan an mga probisyon ni Jehova paagi sa saiyang organisasyon, nagkakasararo kita bilang mga lingkod niya. Urog sa gabos, nauumaw asin napapamuraway ta si Jehova.—Sal. 111:1.