Kun Paano Magigin Epektibo an mga Pagtiripon Bago Maglingkod sa Langtad

1. Ano an katuyuhan kan mga pagtiripon bago maglingkod sa langtad?

¹ Sarong beses, tinipon ni Jesus an 70 sa mga disipulo niya bago sinda maghulit. (Luc. 10:1-11) Pinakusog niya sinda paagi sa pagpagirumdom na dai sinda nagsosolo asin na ginigiyahan sinda ni Jehova, an “Kagurangnan nin anihon.” Ininstruksiyunan man sinda ni Jesus tanganing magin andam sinda sa gibuhon. Inorganisar asin isinugo niya sinda nin ‘manduwa-duwa.’ Arog man kaiyan an katuyuhan kan satong mga pagtiripon bago maglingkod sa langtad​—tanganing dagkahon, andamon, asin organisaron kita.

2. Gurano dapat kalawig an pagtiripon bago maglingkod sa langtad?

² Sa ngunyan, an pagtiripon bago maglingkod sa langtad 10 sagkod 15 minutos an lawig, kaiba na an pag-organisar kan mga grupo, pag-asignar nin teritoryo, asin pagpamibi. Liliwaton na iyan. Puon sa Abril, magigin lima sagkod pitong minutos an lawig kan pagtiripon bago maglingkod sa langtad. Pero, kun kasunod iyan nin pagtiripon kan kongregasyon, dapat mas halipot pa iyan dahil an mga maatender nag-ako pa sana nin marahayon na pagtukar sa Kasuratan. Huling pinahalipot an mga pagtiripon bago maglingkod sa langtad, mas dakul an panahon kan gabos sa ministeryo. Dikit man an mababawas sa oras kan mga payunir o parahayag na nagpuon nang maghulit bago an pagtiripon na iyan.

3. Paano gigibuhon na areglado an mga pagtiripon bago maglingkod sa langtad para lubos na makinabang an mga parahayag?

³ Dapat areglado an mga pagtiripon bago maglingkod sa langtad para lubos na makinabang an mga parahayag. Sa dakul na kongregasyon, an mga grupo sa paglilingkod sa langtad mas marahay na magtiripon sa suruhay na lugar imbes na sa saro sanang lugar. Paagi kaiyan, tibaad mas madali sa mga parahayag na makaduman sa tagbuan asin sa teritoryo. Mapapadali kaiyan an pag-organisar sa mga parahayag, asin mas matatawan nin atensiyon kan mga paraataman nin grupo an mga kagrupo niya. Puwedeng konsideraron kan grupo nin kamagurangan an lokal na mga kamugtakan asin magdesisyon kun ano an pinakamarahay. Bago tapuson an pagtiripon sa halipot na pamibi, dapat aram na kan gabos kun sain an teritoryo asin kun siisay an kapartner ninda.

4. Taano ta dai dapat isipon na bakong gayong importante an pagtiripon bago maglingkod sa langtad kumpara sa ibang pagtiripon?

⁴ Dai Dapat Isipon na Bakong Gayong Importante Kumpara sa Ibang Pagtiripon: Huling an mga pagtiripon bago maglingkod sa langtad ginigibo para sa kapakinabangan kan mga maluwas sa langtad, dai man kaipuhan na atenderan iyan kan bilog na kongregasyon. Pero, dai ini dapat ipasipara sana o isipon na bakong gayong importante kumpara sa ibang pagtiripon kan kongregasyon. Arog kan iba pang pagtiripon, an pagtiripon bago maglingkod sa langtad sarong probisyon hali ki Jehova na nagtatao sa sato nin oportunidad na mapahiro an lambang saro na magpahiling nin pagkamuot asin gumibo nin marahay. (Heb. 10:24, 25) Kaya, kaipuhan na andam na marhay an mamamayo tanganing an pagtiripon makapagtao nin onra ki Jehova asin makinabang an mga presente. An mga parahayag na maluwas sa langtad dapat maghinguwang makaatender kun praktikal iyan para sa sainda.

5. (a) Ano an dapat gibuhon kan paraataman sa paglilingkod para magin organisado an mga pagtiripon bago maglingkod sa langtad? (b) Paano dapat manginot an sarong sister sa pagtiripon bago maglingkod sa langtad?

⁵ Pag-andam kan Mamamayo: Tanganing magin andam na marhay an saro sa pagpresentar kan saiyang kabtang, kaipuhan na amay na itao sa saiya an asignasyon. Totoo man ini sa mga pagtiripon bago maglingkod sa langtad. Siyempre, kun an mga grupo sa paglilingkod sa langtad nagtitiripon sa suruhay na lugar, an mga paraataman nin grupo o an mga assistant ninda an mamamayo sa pagtiripon kan saindang grupo. Alagad, kun an kongregasyon magkakaigwa nin pinagsararong pagtiripon bago maglingkod sa langtad, an paraataman sa paglilingkod maasignar nin mamamayo. May mga paraataman sa paglilingkod na nagtatao nin iskedyul sa gabos na mamamayo asin ipinapaskil an kopya kaiyan sa information board. Kaipuhan ninda nin marahay na paghusgar sa pag-asignar nin mga mamamayo, na iniisip na an kalidad kan mga pagtiripon na ini madepende man sa kakayahan sa pagtukdo asin pag-organisar kan mga mamamayo. Sa mga aldaw na daing mamamayo na elder, ministeryal na lingkod, o iba pang kuwalipikado na bawtisadong brother, dapat mag-asignar an paraataman sa paglilingkod nin sarong may kakayahan na bawtisadong sister na manginginot sa pagtiripon.​—Hilingon an artikulong “Kun Sister an Kaipuhan na Manginot sa Pagtiripon.”

6. Taano ta mahalagang mag-andam na marhay an mamamayo?

⁶ Pag may kabtang kita sa Teokratikong Paadalan sa Pagmiministro o sa Pagtiripon sa Paglilingkod, sineseryoso ta iyan asin pig-aandaman na marhay. Dai man gayod sa sato an saka pa sana maisip nin sasabihon pag pasiring na sa pagtiripon. Dapat arog man kaiyan an isipon ta kun mamamayo sa pagtiripon bago maglingkod sa langtad. Ngunyan na papahaliputon na iyan, lalo nang kaipuhan an marahay na pag-andam tanganing magin kapaki-pakinabang iyan asin matapos nin nasa oras. Kaiba man diyan an patiinot na pag-aram kan teritoryo.

7. Ano an nagkapira na puwedeng tukaron kan mamamayo?

⁷ Kun Ano an Tutukaron: Dahil iba-iba an kamugtakan sa kada teritoryo, an maimbod na uripon dai nagtao nin outline para sa kada pagtiripon bago maglingkod sa langtad. May nagkapirang suhestiyon sa kahon na “Mga Puwedeng Tukaron sa Pagtiripon Bago Maglingkod sa Langtad.” Sa parati, gigibuhon na pagtukar an pagtiripon. Sa ibang pagkakataon, puwedeng magkaigwa nin pinag-andaman na marhay na demonstrasyon o maghiling nin angay na video hali sa jw.org. Pag nag-aandam para sa pagtiripon bago maglingkod sa langtad, maninigong isaisip kan mamamayo kun ano an makakadagka asin makakatabang na magin andam an mga maluwas sa langtad sa aldaw na iyan.

8. Ano an tibaad mas marahay na tukaron sa mga pagtiripon bago maglingkod sa langtad pag Sabado asin Domingo?

⁸ Halimbawa pag Sabado, parating iinaalok kan mga parahayag an Torrengbantayan asin Awake! Dakul sa mga nagluluwas pag Sabado an dai nakakaluwas sa ibang aldaw, kaya tibaad madipisilan sindang girumdumon an prinaktis nindang presentasyon sa saindang Pampamilyang Pagsamba. Kaya, tibaad mas marahay kun rerepasuhon kan mamamayo an saro sa sampol na mga presentasyon sa likod kan An Satong Ministeryo sa Kahadian. Puwede man na tukaron kun paano gagamiton sa pag-alok nin magasin an sarong bareta sa lugar nindo, pangyayari, o piyesta opisyal o kun ano an pag-uulayan sa sunod kun akuon kan kagharong an mga magasin. Kun may presente na nakapag-alok na kan mga magasin, puwede sindang hagadan nin halipot na suhestiyon o pasaysayon nin nakakapakusog na eksperyensiya. Pag Domingo, arog man kaiyan an puwedeng gibuhon kan mamamayo sa alok para sa bulan. Puwedeng ialok dawa anong aldaw an mga publikasyon na ginagamit sa pag-adal arog kan brosyur na Maogmang Bareta asin Magdangog sa Dios asin kan librong Itinotokdo kan Biblia. Kaya puwedeng tukaron sa halipot kan mamamayo kun paano iaalok an saro sa mga publikasyon na ini.

9. Ano an puwedeng tukaron kun may espesyal na kampanya pag Sabado asin Domingo?

⁹ Kun may espesyal na kampanya pag Sabado asin Domingo, puwedeng tukaron kan mamamayo kun paano iaalok an bagong mga magasin kaiba kan imbitasyon o tract, o kun ano an gigibuhon pag interesado an kagharong. Puwede man magsaysay nin mga eksperyensiya na nagtatampok kan kahalagahan nin siring na mga kampanya.

10, 11. Taano ta mahalaga an pag-andam kan mga parahayag tanganing magin mapanggana an pagtiripon bago maglingkod sa langtad?

¹⁰ Pag-andam kan mga Parahayag: May magigibo man an mga parahayag para magin mapanggana an pagtiripon bago maglingkod sa langtad. Kun patiinot sindang nag-aandam para sa ministeryo, tibaad sa saindang pampamilyang pagsamba, may maikokontribwir sinda sa ibang parahayag. Kaiba man sa marahay na pag-andam an pagkua nin mga magasin asin literatura bago magduman sa pagtiripon bago maglingkod sa langtad para makahali tulos an gabos pasiring sa teritoryo.

¹¹ Mahalaga man na planuhon na makaabot sa pagtiripon mga pirang minuto bago iyan magpuon. Siyempre, hinihinguwa tang mag-amay sa gabos na pagtiripon kan kongregasyon. Pero, tibaad makaabalang marhay kun maabot kitang huri sa pagtiripon bago maglingkod sa langtad. Taano? Dakul an kinokonsiderar kan brother na namamayo bago niya organisaron an grupo. Kun dikit sanang parahayag an presente, tibaad ipadagos na sana ninda an teritoryong dai pa natapos kan nakaagi. Kun harayo an teritoryo, tibaad ipartner niya an mga parahayag na daing lunadan sa mga may lunadan. Kun delikado sa teritoryo, tibaad ipartner niya o iasignar an mga brother na maghulit harani sa mga grupo nin sister. An mga parahayag na maluya an hawak tibaad iasignar niya na maghulit sa mga lugar na patag an dalan o sa mga harong na hababa sana an hagdan. An mga baguhan tibaad ipartner sa mas eksperyensiyadong mga parahayag. Kaya, kun may mag-abot nin huri, sa parati, kaipuhan na liwaton o baguhon an areglo. Siyempre, may rasonableng dahilan kaya nahuhuri kita kun minsan. Pero, kun nakatudan ta na iyan, puwede tang haputon an satong sadiri kun iyan daw dahil sa kawaran ta nin pagpapahalaga sa mga pagtiripon bago maglingkod sa langtad o dahil dai ta ginigibo nin mas amay an mga dapat gibuhon.

12. Kun sa parati may sadiri ka nang plano pag nagluluwas sa langtad, ano an puwede mong pag-isipan?

¹² An mga parahayag puwedeng pumili nin kapartner bago magpuon an pagtiripon, o maghalat kun siisay an ipapartner sa sainda. Kun pirming ika an nagpipili nin makakapartner mo, puwede mo daw pag-isipan na ‘magpahiwas’ paagi sa pagpartner sa iba-ibang parahayag imbes na sa mga amigo mo na sana pirmi? (2 Cor. 6:11-13) Puwede mo daw partneran paminsan-minsan an sarong baguhan para matabangan siyang mapauswag an kakayahan niya sa pagtukdo? (1 Cor. 10:24; 1 Tim. 4:13, 15) Magdangog na marhay sa ano man na instruksiyon, arog kan kun sain kamo mapuon na maghulit. Pagkatapos kan pagtiripon, likayan na baguhon an mga areglo asin magduman na tulos sa teritoryo.

13. Kun seryosong ginigibo kan gabos an saindang kabtang, ano an puwedeng magin epekto sa sato kan mga pagtiripon bago maglingkod sa langtad?

¹³ Pagkatapos na maghulit, an 70 na inorganisar ni Jesus sa paghuhulit ‘nagbaralik na may kaugmahan.’ (Luc. 10:17) Siguradong nakatabang an pakipagtipon ni Jesus sa sainda bago sinda maghulit. Sa ngunyan, puwede man na magkaigwa nin arog kaiyan na epekto sa sato an mga pagtiripon bago maglingkod sa langtad. Kun seryosong ginigibo kan gabos an saindang kabtang, an mga pagtiripon bago maglingkod sa langtad makakadagka sa sato, makakatabang na magin andam asin organisado sa pag-utob kan sugo sa sato na ‘magpatotoo sa gabos na nasyon.’​—Mat. 24:14.