Lubos na Makinabang sa mga Pagtiripon Bago Maglingkod sa Langtad
1. Paano makakatabang sa sato an mga pagtiripon bago maglingkod sa langtad?
1 An epektibong mga pagtiripon bago maglingkod sa langtad nagtatao nin tunay na pagparigon sa boot asin praktikal na pagtotokdo bago kita lumuwas sa ministeryo. Nagpapangyari iyan sa sato na makikabtang sa paghuhulit bilang grupo tanganing makaibanan niato an iba para sa suporta asin pagsasanay kan lambang saro. (Tal. 27:17; Ecl. 4:9, 10) Ano an magigibo niato tanganing lubos na makinabang sa mga pagtiripon na ini?
2. Ano an nagkapirang bagay na puedeng tokaron kan namamayo?
2 An Namamayo: An espesipikong impormasyon na pag-oolayan sa mga pagtiripon na ini sa parate dai sinasabi antes pa. Kun siring, kaipuhan an marahay na pag-andam kun kamo an mamamayo. Dai automatikong planohon na pag-olayan an pan-aroaldaw na teksto, pero tibaad gustohon nindo na iiba iyan sa pag-orolay kun iyan direktang konektado sa ministeryo. Isipon nindo an praktikal na tabang na ikakatao nindo sa mga naghuhulit sa aldaw na iyan. Halimbawa, tibaad gusto nindong pag-olayan o idemonstrar an sarong pag-atubang. Tibaad magdesisyon kamong repasohon an sarong bagay gikan sa librong Reasoning, librong Paadalan sa Pagmiministro, o sa sarong kabtang kasuarin pa sana sa Pagtiripon sa Paglilingkod. Sa ibang panahon, puede nindong pag-olayan kun paano aatubangon an sarong problema na tibaad maglataw sa saindong teritoryo, o puede nindong pag-olayan kun paano kukultibaron an interes asin poponan an mga pag-adal sa Biblia, nangorogna kun dakol an madalaw liwat. Ano man an pinag-oolayan, magin entusiastiko asin nakakaparigon sa boot.
3. Maninigong gurano kalawig an pagtiripon, asin ano an dapat na magibo durante kan panahon na iyan?
3 Ponan sa tamang oras an pagtiripon, dawa kun aram nindo na an nagkapira mahuhuri. Gamiton an tamang paghusgar sa pag-organisar kan mga grupo, asin mag-asignar nin teritoryo sa mga nangangaipo kaiyan. An lawig kan pagtiripon dai maninigong sumobra sa 10 sagkod 15 minutos asin mas halipot kun kasunod iyan nin pagtiripon kan kongregasyon. Bago nindo taposon an pagtiripon, maninigong aram kan gabos kun siisay an makakaibanan ninda asin kun saen sinda maghuhulit. An pagtiripon maninigong taposon paagi sa pamibi.
4. Ano an makakatabang tanganing an gabos lubos na makinabang sa mga pagtiripon bago maglingkod sa langtad?
4 Makakatabang Kamo: Kapareho nin mga pagtiripon kan kongregasyon, ipinapaheling niato an paggalang ki Jehova asin konsiderasyon sa iba paagi sa pag-abot sa tamang oras. Makikabtang sa pag-orolay. Puede nindong togotan na an namamayo an mag-asignar nin sarong tugang na makakaibanan nindo, o tibaad gustohon nindo na kamo an maggibo kan sadiri nindong mga areglo antes pa kan pagtiripon. Kun mas gusto nindo na gumibo nin sadiri nindong mga areglo, hingoahon na “humiwas” paagi sa pakikiiba sa laen-laen na parahayag, imbes na makiiba sa dayupot na mga katood sa kada pagluwas. (2 Cor. 6:11-13) Sa oras na matapos an pagtiripon, likayan an pagbago kan mga areglo, asin humale tolos-tolos pasiring sa teritoryo.
5. Ano an katuyohan nin mga pagtiripon bago maglingkod sa langtad?
5 An katuyohan nin mga pagtiripon bago maglingkod sa langtad kapareho kan sa ibang mga pagtiripon kan kongregasyon. Iinareglo an mga iyan tanganing ‘makonsiderar niato an lambang saro tanganing mandagka sa pagkamoot asin sa marahay na mga gibo.’ (Heb. 10:24, 25) Kun hinihingoa niatong makinabang sa mga pagtiripon na ini, matatabangan kita na gibohon an satong ministeryo—tunay na sarong ‘marahay na gibo’!