Hapot

● Paano maninigong gibohon an pagtiripon bago maglingkod?

An pagtiripon bago maglingkod sarong establisadong areglo kan kongregasyon. Iyan maninigong husay asin gibohon na may dignidad. An kaisipan asin gawe kan mga nag-aatender maninigong kapareho kun nag-aatender sa mga pagtiripon kan kongregasyon. An pagtiripon maninigong ponan nin nasa oras dawa kun aram niato na may mga mahuhuri. An naasignaran na mangenot maninigong andam na iatubang an praktikal na magagamit sa aldaw na iyan sa paglilingkod. An An Satong Ministeryo sa Kahadean nagtatao nin kapakipakinabang na mga suhestion para sa pagtiripon na ini.

Dai kaipuhan na pag-olayan an teksto kan aldaw sa kada pagtiripon. Kun an teksto sa aldaw na iyan nagtatao nin pagpakosog sa paglilingkod sa langtad, iyan puwedeng pag-olayan sa halipot. An pagtiripon maninigong amay tanganing tumogot na magamit an bilog na nakaiskedyul na oras sa langtad. Iyan maninigo na 10 sagkod 15 minutos sana kalawig. Minsan siring, iyan puwedeng mas halipot kun iyan kasunod nin sarong pagtiripon kan kongregasyon. An iskedyul kan mga payunir maninigong konsideraron, ta an haralawig o atrasadong mga pagtiripon bago maglingkod tibaad makaapektar sa mga kaipuhan na maimbod na mag-otob sa iskedyul.

Maninigong gibohon an areglo na an gabos na presente may asignasyon na huhulitan. Siyempre, an iba tibaad may ginibong personal na areglo na dumalaw liwat o mag-adal asin dai na kaipuhan na tawan nin teritoryo.

An gabos na presente maninigong atentibo sagkod na naorganisar na an mga grupo asin nakapamibi na. An mga asignasyon sa mga grupo asin teritoryo maninigong gibohon bago tapuson nin pamibi an pagtiripon bago maglingkod, bakong kun yaon na sa teritoryo.