Mga Pagtiripon Bago Maglingkod sa Langtad
1. Taano ta interesado kitang maglingkod sa langtad sa organisadong paagi?
1 Itinao ni Jesus an halimbawa kun paano organisado asin epektibong aasikasohon an paghuhulit kan Kahadean. Siring man ngonyan, an mga may paninimbagan sa pambilog na kinaban na kampanyang ini nin paghuhulit kan Kahadean nagmamawot na marhay na masierto na naaasikaso sa kaparehong paagi an gibohon na ini. Kaoyon kan paghihingoang ini, ginagamit kan mga kongregasyon sa bilog na kinaban an mga pagtiripon bago maglingkod sa langtad bilang sarong paagi na maorganisar an mga grupo nin parahulit kan Kahadean para sa paglilingkod sa langtad.—Mat. 24:45-47; 25:21; Luc. 10:1-7.
2. Ano an inaasahan sa mga pagtiripon bago maglingkod sa langtad?
2 Sarong Marahay na Areglo: An mga pagtiripon bago maglingkod sa langtad dinisenyo na magtao nin pamparigon sa boot, praktikal na instruksion, asin paggiya para sa mga malingkod sa ministeryo sa langtad. An pangaroaldaw na teksto puedeng tokaron nin halipot kun iyan malinaw na aplikado sa ministeryo sa langtad. Kun beses, tinotokar an mga pagirumdom hale sa An Satong Ministeryo sa Kahadean, sa librong Reasoning, o tibaad sa librong Paadalan sa Pagmiministro tanganing andamon an gabos na presente para sa paghuhulit sa aldaw na iyan. Puede man na magpresentar nin halipot na demonstrasyon mapadapit sa alok na publikasyon. Bago an pantapos na pamibi, maninigo na aram na kan gabos kun siisay an makakaiba ninda sa ministeryo asin kun saen an teritoryo. Pagkatapos tolos kan pagtiripon na ini na dai masobra sa 15 minutos, an gabos maninigo na magpasiring na sa teritoryo.
3. Siisay an may paninimbagan sa pag-organisar kan mga pagtiripon bago maglingkod sa langtad?
3 Paano Iyan Inoorganisar? An paraataman sa paglilingkod, na iyo an nangengenot, an may paninimbagan sa pagkoordinar kan mga pagtiripon bago maglingkod sa langtad. Paninimbagan kan mga paraataman sa grupo o kan saindang mga katabang na ibanan an kanya-kanya nindang grupo sa paglilingkod sa langtad sa mga katapusan kan semana. Sa laog kan semana, tibaad magibo nin nagkapirang paraataman o ministeryal na lingkod na ibanan an mga grupo sa paglilingkod. An mga paraataman sa grupo nakikipagtabangan na marhay sa paraataman sa paglilingkod tanganing magkaigwa nin igong teritoryo sa pagharongharong an saindang grupo sa mga katapusan kan semana. Durante kan semana, an paraataman sa paglilingkod an maasikaso kan mga areglo para sa mga mangengenot sa mga grupo sa paglilingkod sa langtad.
4-6. (a) May koneksion sa teritoryo kan kongregasyon, ano an katuyohan kan mga pagtiripon bago maglingkod sa langtad? (b) Ano an puedeng isaisip tanganing maaraman an kaipuhan para sa mga pagtiripon bago maglingkod sa langtad?
4 Saen Asin Noarin Maninigong Gibohon an mga Pagtiripon na Ini? Imbes na sa sarong lugar magtiripon an bilog na kongregasyon, sa pangkagabsan pinakamarahay na gibohon an mga pagtiripon na ini sa kombenyenteng mga lugar, sa parate sa pribadong mga harong, sa bilog na teritoryo na may katuyohan na epektibong magibo an teritoryo kan kongregasyon. An mga Kingdom Hall puede man na gamiton sa katuyohan na ini. Ginagamit kan dakol na kongregasyon an Kingdom Hall para sa pagtiripon bago maglingkod pagkatapos tolos kan saindang pampublikong pahayag asin Pag-adal sa Torrengbantayan kun Domingo. Maninigo na gumibo nin paghihingoa tanganing mabawasan an oras na ginagamit sa pagbiahe pasiring sa teritoryo. Kun siring, an mga areglo puedeng repasohon sa panapanahon tanganing seguradohon na an presenteng mga tiriponan padagos na magigin angay para sa epektibo asin lubos na paggibo kan teritoryo.
5 Nakadepende sa teritoryo an pinakamarahay na oras para sa mga pagtiripon na ini asin kun pirang beses iyan maninigong gibohon sa bilog na semana. An minasunod na mga hapot puedeng magserbing giya tanganing maaraman kun saen asin kun noarin pinakamarahay na gibohon an mga pagtiripon bago maglingkod sa langtad.
6 Anong teritoryo an nangangaipo nin dugang pang atension? Ano an pinakamarahay na oras sa pagharongharong? Maninigo daw na mag-iskedyul nin oras sa banggi para sa pagharongharong o pagdalaw liwat? An gabos na areglo sa paglilingkod sa langtad maninigong ipaskil sa information board kan kongregasyon. Minamawot kan gabos na parahayag kan Kahadean na lubos na magibo an iinasignar na teritoryo sa sainda sagkod sa punto na masasabi man niato an arog kan sinabi ni apostol Pablo: “Mayo na ako nin teritoryo na dai nagigibo.”—Roma 15:23.
7. Ano an paninimbagan kan inasignaran na mangenot sa grupo sa paglilingkod sa langtad?
7 Pangengenot sa mga Pagtiripon Bago Maglingkod sa Langtad: An saro na inasignaran na mag-asikaso kan pagtiripon na ini nagpapaheling nin hararom na paggalang sa teokratikong areglong ini paagi sa pag-andam na marhay. An mga pagtiripon na ini maninigong magpoon sa tamang oras saka maninigong nakakapagtokdo asin halipot, mga 10 sagkod 15 minutos. Bago ponan an pagtiripon, an nangengenot maninigo na igwa nang teritoryo na gigibohon kan grupo. Minsan ngani an mga mahuhuri dai kaipuhan na halaton pagkatapos kan pagtiripon bago maglingkod sa langtad, makakatabang an pagwalat nin mensahe kun saen an teritoryo kan grupo. Pagkatapos tolos kan pagtiripon, an gabos maninigo na magpasiring na sa iinasignar na teritoryo. An organisadong marhay asin nakakapagtokdong pagtiripon bago maglingkod sa langtad daing duda na makakatao kan kinakaipuhan na paggiya sa gabos na presente tanganing gibohon an saindang ministeryo sa aldaw na iyan.—Tal. 11:14.
8. Sa anong mga paagi puedeng makikooperar sa mga nangengenot an mga nag-aatender sa mga pagtiripon bago maglingkod sa langtad?
8 Pag-atender sa mga Pagtiripon Bago Maglingkod sa Langtad: Mahalagang marhay an kooperasyon. (Heb. 13:17) Kun posible, tatabangan kan saro na nag-oorganisar sa grupo an siisay man na nangangaipo nin makakaiba. Marahay kun presente an eksperyensiadong mga parahayag tanganing makatabang sa mga parahayag na bagohan asin mayo pang gayong eksperyensia. Dakulang karahayan an puedeng magibo kan mga andam na asignaran sa panapanahon na maglingkod kaiba an ibang parahayag. (Tal. 27:17; Roma 15:1, 2) An gabos maninigong odok na maghingoa na magin nasa oras. An paggalang niato sa teokratikong areglong ini asin konsiderasyon sa satong mga kapagtubod mapahiro sa sato na gibohon an kinakaipuhan na mga pagliliwat sa bagay na ini.—2 Cor. 6:3, 4; Fil. 2:4.
9. Sa anong mahalagang mga paagi masusuportaran kan mga payunir an areglong ini?
9 Suporta kan mga Payunir: An suporta kan mga payunir sa mga pagtiripon bago maglingkod sa langtad kapakipakinabang na marhay asin nakakaparigon sa boot kan gabos. Siempre, dakol an responsabilidad kan mga payunir. Apuera sa mga pagkondukta nin pag-adal sa Biblia asin pagdalaw liwat, kaiba sa saindang iskedyul sa aroaldaw an pag-asikaso sa mga paninimbagan sa pamilya asin sekular na trabaho. Sa siring, dai maninigong isipon kan mga payunir na kaipuhan nindang suportaran an lambang pagtiripon bago maglingkod sa langtad na inorganisar kan kongregasyon, lalo na kun ginigibo iyan kada aldaw. Minsan siring, posibleng marhay na masusuportaran kan mga payunir an kisiera nagkapirang pagtiripon bago maglingkod kada semana. Sa sarong paagi, an mga pagtiripon bago maglingkod sa langtad nagseserbing pagsasanay, asin an kaaraman sa Biblia saka eksperyensia kan mga payunir puedeng magin dakulang tabang sa iba. Sinda nagin eksperyensiado sa ministeryo huli sa pirme nindang pakikikabtang sa ministeryo sa langtad. Puede ninda ining ihiras. Huli sa saindang maigot na pakikikabtang sa ministeryo asin sa mga pagtiripon bago maglingkod sa langtad, sinda nagin mga halimbawa na dapat arogon. Asin pinapahalagahan na marhay an saindang pakikikabtang sa mga pagtiripon na ini bago maglingkod.
10. Taano ta angay na an gabos na parahayag kan Kahadean magtao nin bilog na pusong pagsuportar sa areglong ini?
10 Arog kaidto ki Jesus asin sa saiyang mga disipulo, an dakulang kabtang kan paghuhulit niato kan Kahadean nagigibo paagi sa pagpapatotoo sa harong-harong. An katuyohan kan mga pagtiripon bago maglingkod sa langtad iyo na magparinigonan nin boot asin epektibong makikabtang sa gibohon na ini. An gabos na parahayag kan maogmang bareta maninigo na magin parasuportar sa siring na teokratikong mga areglo sagkod sa mapupuede. (Gibo 5:42; 20:20) Kita gabos logod na bilog na pusong magsuportar sa paghihingoang ini. Paagi sa paggibo kaiyan, makakasierto kita sa abundang bendisyon ni Jehova asin mapapagayagaya niato an puso kan satong Poon, si Jesu-Cristo, mantang ihinuhulit niato an maogmang bareta kan Kahadean nin Dios.—Mat. 25:34-40; 28:19, 20.