Pag-aatubang kan Maogmang Bareta—Sa Pangrupong Paghuhulit
1 An pakikitipon sa iba bago an paglilingkod sa langtad praktikal asin nakapakokosog. An siring na probisyon nagpapakosog sa satong mga tugang na magtarabangan sa pagbalangibog kan maogmang bareta.
2 An ibang kongregasyon puwedeng mag-iskedyul nin paglilingkod sa langtad pagkatapos kan saro sa regular na mga pagtiripon sa Kingdom Hall. Minsan ngani tibaad dakol an sumuportar sa areglong ini, an mga nangengenot sa pag-adal sa libro nagtatao pa man giraray nin atension sa mga parahayag sa sadiri nindang grupo. Depende sa situwasyon ninda, an ibang kongregasyon ginigibo an saindang pagtiripon bago an paglilingkod sa langtad sa Sabado asin Domingo sa kada Pag-adal sa Libro kan Kongregasyon. May risang mga bentaha sa areglong ini. Minimidbid na magkakalaen an kamugtakan nin mga kongregasyon. Kun beses tibaad maninigo na pagsararoon an pirang saraditon na grupo. Kaya an grupo nin kamagurangan kaipuhan na konsideraron an lokal na mga kamugtakan asin aramon kun anong areglo an magbubunga kan pinakamarahay.—Helingon an Our Ministry, pahina 96-7.
SUPORTARAN AN MGA PAGTIRIPON BAGO AN PAGLILINGKOD SA LANGTAD
3 An pangrupong paghuhulit hale sa mga pag-adal sa libro nagtatao nin marahay na oportunidad sa nangengenot na magtao nin personal na tabang. An bagong mga parahayag saka an mas eksperyensiado na makikinabang sa pag-iba sa kamagurangan asin ministeryal na mga lingkod.
4 An mga pagtiripon bago an paglilingkod sa langtad sa laog kan semana puwedeng gibohon sa Kingdom Hall o sa laen-laen na lugar na kombenyente sa mga parahayag. An bilang kaini depende sa lokal na mga kamugtakan asin sa kun pira an puwedeng mangenot.
5 Ano an magigibo kan mga nangengenot sa pag-adal sa libro o kan mga naasignaran na mag-asikaso sa grupo tanganing maseguro na magamit kan gabos sa pinakamarahay an oras na itinagama ninda sa pangrupong paghuhulit? Puwedeng girumdomon kan mga nangengenot na an pagtiripon bago an paglilingkod sa langtad maninigong 10 sagkod 15 minutos sana. (Helingon an Our Ministry, pahina 77.) Dakol na oras an maeekonomiya kun iinasignar na an teritoryo bago paduman sa langtad, sa siring malilikayan an pagtiripontipon nin darakulang grupo sa mga kanto asin garo baga disorganisado. An iba naheling na nakatatabang na iasignar an espisipikong mga kabtang kan teritoryo sa kuwalipikadong mga parahayag sa laog nin itinalaan na panahon. Sa siring, oras na maareglo na an mga grupo, puwede na sindang humale tolos pasiring sa saindang teritoryo. An paraataman sa paglilingkod maninigong alisto na resolberan an mga problema sa pag-organisar sa mga grupo tanganing mas dakol na oras an magamit sa langtad.
6 An dakol na gurangan nang parahayag maogmang ginigirumdom an mga eksperyensia sa nag-aging mga taon mantang kaiba an iba sa pangrupong paghuhulit. An siring na mga eksperyensia nagpapasarig sa pagkasararo kan kongregasyon asin sa mga bogkos nin Kristianong pagkamoot. Minsan ngani kun beses tibaad may marahay na dahelan na mag-iba an duwang parahayag, sa dakol na teritoryo mas dakol an magigibo paagi sa pagsosolo mantang an iba naghuhulit sa harani. An pagsosolo, kun itinotogot kan kamugtakan, minatogot sato na maabot an mas dakol na tawo, asin iyan puwedeng magin marahay na pagsasanay sa ngapit kun halimbawa bugtakan nin dai linalaoman na mga restriksion an satong paghuhulit. An marahay na paghusgar, saka an pagmawot na magibo an pinakadakol, maninigong iyo an gumiya sa mga areglong gigibohon niato.
7 Sinadol ni apostol Pablo an mga Kristiano na “mangapot kita nin posog sa hayag na pagtuga kan satong paglaom.” Siring man, sinasabihan kita kan saiyang ipinasabong na mga tataramon na “magpasaradolsadol kita sa pagkamoot asin marahay na mga gibo, . . . na magpakinosogan kita.” (Heb. 10:23-25) Paagi sa pagsuportar sa mga areglo sa pangrupong paghuhulit, mapakosog logod niato an satong mga tugang sa “pagkamoot asin marahay na mga gibo.” Mantang ginigibo niato iyan, mag-aani kita nin dakol na marahay na mga balos gikan ki Jehova.