Suportaran an Areglo sa Paglilingkod sa Tahaw kan Semana
1 Si Jesus nagsabi: “Sa gabos na nasyon an maogmang bareta kaipuhan na ikahulit nguna.” (Mar. 13:10) Bilang pagkuyog sa pagboot na ini, an banwaan ni Jehova aktibo sa ministeryo, bako sanang kun Sabado asin Domingo, kundi sa laog man kan semana. Nakakapakikabtang daw kamo sa paglilingkod sa langtad sa tahaw kan semana kaiba an iba sa saindong kongregasyon?
KAIPUHAN AN ORGANISADONG MGA AREGLO
2 An paraataman sa paglilingkod maninigong mangenot sa paggibo nin depinidong mga areglo para sa paglilingkod sa tahaw kan semana. An lugar asin oras maninigong kombenyente para sa kadaklan na parahayag. An mga pagtiripon bago maglingkod sa kadaklan pangengenotan nin kamagurangan, ministeryal na mga lingkod, o iba pang kuwalipikadong bautisadong mga tugang. Kun mayo an mga ini, puwedeng iasignar an may kakayahan na bautisadong mga tugang na babae. (Helingon an Organized to Accomplish Our Ministry, pahina 77, parapo 3.) An naasignaran na tugang na babae maninigong magkolbong asin sa kadaklan matukaw kun nangengenot sa pagtiripon bago maglingkod.
3 An mga pagtiripon na ini bago maglingkod maninigong andamon nin igo. Puwedeng pag-olayan an teksto kan aldaw, nangorogna kun iyan angay sa paglilingkod sa langtad. Maninigong gamiton an mga punto sa Pagtiripon Bago Maglingkod. Maninigong tawan nin teritoryo an mga grupo.
SUPORTARAN AN LOKAL NA MGA AREGLO
4 An mga nagsusuportar sa mga areglo sa tahaw kan semana may oportunidad na manompongan an mga kagharong na tibaad mayo sa harong kun Sabado asin Domingo. Tibaad makaibanan nindo an mga tugang na babae na nasa eskuwelahan an mga aki o mayo sa katotoohan an agom na lalaki. An mga hobenes na bakasyon sa klase puwedeng sumuportar sa mga areglo sa paglilingkod sa tahaw kan semana. Parate na yaon an mga payunir tanganing ibanan an mga bagohan asin daing kabatidan sa laen-laen na kabtang kan ministeryo sa laog kan semana.
5 An gabos sinasadol na umabot nin tama sa oras para sa pagtiripon bago maglingkod asin makikabtang sa orolay asin pamibi. An paggibo nindo kaiyan matabang saindo na makikabtang nin maigot sa ministeryo sa langtad asin hanapon an mga maninigo sa teritoryong asignado sa saindo.—Mat. 10:11.