Kun Paano Makikinabang sa Saindong Grupo sa Paglilingkod sa Langtad
1. Anong mga pakinabang sa Pag-adal sa Libro kan Kongregasyon an yaon pa man giraray sa satong grupo sa paglilingkod?
1 Pighahanaphanap daw nindo an nagkapirang aspekto kan Pag-adal sa Libro kan Kongregasyon? An mga grupo sadit sana asin mas relaks an kamugtakan. Dahil kaini, pasil magkaigwa nin mga katood na gikanan nin espirituwal na suporta. (Tal. 18:24) Aram kan paraataman sa pag-adal sa libro an laen-laen na kamugtakan niato asin makakatao sia nin personal na pamparigon sa boot. (Tal. 27:23; 1 Ped. 5:2, 3) Yaon pa man giraray an mga pakinabang na ini paagi sa satong grupo sa paglilingkod.
2. Paano kita magibo nin inisyatiba na magkaigwa sa satong grupo sa paglilingkod nin mga katood na gikanan nin espirituwal na suporta?
2 Magkaigwa nin Inisyatiba: Sa pangkagabsan, an mga grupo sa paglilingkod pareho kadakula kan mga grupo nin pag-adal sa libro. An “daramay” na pagmiministeryo kaiba kan mga tugang puedeng magresulta sa dayupot na pakikikatood. (Fil. 1:27, An Banal na Biblia) Pira sa saimong kagrupo an nakapartner mo na? Puede ka daw “humiwas” sa bagay na ini? (2 Cor. 6:13) Saro pa, puede tang imbitaran paminsanminsan an saro sa mga kagrupo niato na umiba sa satong Pampamilyang Pagsamba o pagkakan. Sa nagkapirang kongregasyon, nagsasarosalida an mga grupo sa paglilingkod sa pagpakakan sa nagdadalaw na ispiker. Sa semanang nakaasignar sa sainda, an grupo iribang nagkakarakan asin nagpapakinosogkosogan baga man makakaiba an ispiker o dai.
3. Ano an nagkapirang oportunidad na kita pinapastoran sa satong grupo sa paglilingkod?
3 Minsan ngani duwang beses na sana kada semana nagtitiripon an kongregasyon, dai ini nangangahulogan na maninigong inaan an ginigibong pagpastor sa mga parahayag. Ninombrahan an mga paraataman nin grupo tanganing tawan an mga miembro kan lambang grupo nin personal na pamparigon sa boot asin pagsasanay sa ministeryo. Kun an paraataman kan saindong grupo dai pa nag-iskedyul na makapartner ka sa ministeryo, makiolay sa saiya na ibanan ka. Dugang pa, an paraataman sa paglilingkod nakikikabtang sa ministeryo kaiba nin sarong grupo sarong beses kada bulan, na ginigibo iyan sa katapusan kan semana. Sa mas saradit na kongregasyon na kadikit sana an grupo sa paglilingkod, puede niang iareglo na dalawon an lambang grupo duwang beses kada taon. Inaareglo daw nindo an saindong iskedyul tanganing makaiba sa ministeryo kun dinadalaw nia an grupo nindo?
4. (a) Paano inoorganisar an mga pagtiripon bago maglingkod? (b) Taano ta maninigo tang pag-isipan na ipagamit an satong harong para sa pagtiripon na iyan?
4 Sa parate, mas marahay na an lambang grupo suruhay na magtiripon bago maglingkod sa katapusan kan semana. Kun igwa nin nagkapirang lokasyon na haros magkasarabay an pagtiripon bago maglingkod, mas madali sa mga parahayag na makaduman sa tiriponan asin sa teritoryo. An mga parahayag maoorganisar nin marikas asin makakaduman sa teritoryo na bakong atrasado. Mas pasil man sa paraataman nin grupo na tawan nin maingat na atension an mga kagrupo nia. Minsan siring, may mga kamugtakan na tibaad mas marahay na mag-ibanan an sarong grupo o labi pa. Kun an bilog na kongregasyon iribang nagtitiripon bago maglingkod sa enot na Sabado kan bulan o pagkatapos kan Pag-adal sa Torrengbantayan, parateng nakakatabang kun an lambang grupo taraed na magtukaw. Mas marahay man kun an paraataman nin grupo tatawan nin pirang minuto na maorganisar an grupo nia bago taposon an pagtiripon paagi sa pamibi.—Hilingon an kahon na “Puede daw Nindong Ipagamit an Saindong Harong?”
5. Minsan ngani tapos na an areglo sa Pag-adal sa Libro kan Kongregasyon, may kompiansa kita sa anong bagay?
5 Minsan ngani tapos na an areglo sa Pag-adal sa Libro kan Kongregasyon, padagos na itinatao ni Jehova an gabos na kaipuhan niato tanganing magibo an kabotan nia. (Heb. 13:20, 21) Huling pinapangatamanan ni Jehova, dai kita nagkukulang nin ano man. (Sal. 23:1) Dakol na bendisyon an inaako niato paagi sa satong grupo sa paglilingkod. Kun igwa kita nin inisyatiba asin ‘magtatanom nin dakol, dakol man an aanihon’ niato.—2 Cor. 9:6, An Marahay na Bareta Biblia.
[Kahon sa pahina 6]
Puede daw Nindong Ipagamit an Saindong Harong?
An nagkapirang kongregasyon pinagsasararo an mga grupo sa paglilingkod sa katapusan kan semana huling kulang an harong na mapagtitiriponan. An pagtiripon bago maglingkod ekstension kan areglo sa kongregasyon, kaya tunay na sarong pribilehio an pagpagamit nin harong para dian. Puede daw nindong ipagamit an saindong harong? Dai mag-alangan huling simple sana an harong nindo. Eestudyaran kan mga elder an lokasyon kan harong nindo asin an iba pang bagay na kaagid sa pagpili nin lokasyon para sa pag-adal sa libro. Kun gusto nindong ipagamit an saindong harong, sabihon iyan sa paraataman kan grupo nindo.