Limang Paagi Kun Paano Makakakua nin Tinotokdoan sa Biblia
1. Kun nadedepisilan kitang maghanap nin totokdoan sa Biblia sa teritoryo niato, ano an maninigo tang gibohon, asin taano?
1 Nadedepisilan daw kamong maghanap nin totokdoan sa Biblia? Padagos na magmaigot. Binebendisyonan ni Jehova an mga dai minasuko sa paggibo kan kabotan nia. (Gal. 6:9) Makakatabang sa saindo an minasunod na limang suhestion.
2. Paano niato magagamit an direktang pag-alok sa pagpoon nin pag-adal sa Biblia?
2 Direktang Pag-alok: Aram nin dakol na nag-aalok kita nin An Torrengbantayan asin Awake!, pero tibaad dai ninda aram na nag-aalok kita nin pag-adal sa Biblia. Taano ta dai probaran an direktang pag-alok kun naghaharongharong? Puede man nindong hapoton an mga interesadong dinadalaw nindo kun gusto nindang mag-adal sa Biblia. Kun magsayuma sinda, puede kamong padagos na magwalat nin literatura asin pataluboon an interes ninda. An sarong brother dakol nang taon na nagdadalaw sa sarong mag-agom bilang ruta nin magasin. Pagkatapos na iwalat sa sainda an pinakabagong mga magasin, pahale na sia kan bigla niang maisip na maghapot: “Gusto nindong mag-adal sa Biblia?” Nasorpresa sia kan magsimbag sinda nin iyo. Bautisado na sinda ngonyan.
3. Maninigo daw niatong isipon na may nagtotokdo na sa Biblia sa mga interesadong nag-aatender sa pagtiripon? Ipaliwanag.
3 Mga Nag-aatender sa Pagtiripon: Dai pag-isipon na may nagtotokdo na sa Biblia sa mga interesado na nahihiling nindo sa mga pagtiripon kan kongregasyon. An sarong brother nagsabi: “Labing kabanga sa mga tinokdoan ko sa Biblia an naponan paagi sa pakikipag-olay sa mga nag-atender sa pagtiripon.” An sarong sister nagdesisyon na kaolayon an sarong masusupgon na babae na an bautisadong mga aking babae kakongregasyon nia. An babae mga 15 taon nang nag-aatender sa mga pagtiripon asin pirmeng nag-aabot nin eksakto pakapoon kan pagtiripon dangan minahale tolos pagkatapos kaiyan. Nag-oyon sia na mag-adal asin pag-abot nin panahon nag-ako kan katotoohan. An sister nagsurat: “An pinanghihinayangan ko sana hinalat ko pa an 15 taon bago ko sia hinapot kun gusto niang mag-adal!”
4. Paano kita makakanompong nin totokdoan sa Biblia paagi sa mga referral?
4 Mga Referral: An sarong sister naghihingoang ibanan an nagkapirang tugang sa mga tinotokdoan ninda sa Biblia. Sa katapusan kan pag-adal, sinasabi nia sa kaiba nia kun puede niang hapoton an tinotokdoan sa Biblia kun may kamidbid ini na gusto man mag-adal. Kun nag-aalok kan librong Itinotokdo kan Biblia sa saro na dinadalaw nindo, puede nindo siang hapoton: “May kamidbid ka na magugustohan man an librong ini?” Kun beses, an mga kamugtakan dai nagtotogot sa mga parahayag asin payunir na magkondukta nin pag-adal sa mga nakakaolay ninda sa teritoryo. Kaya sabihon sa iba na puede kamong magkondukta nin pag-adal sa Biblia.
5. Taano ta puede tang hapoton an mga bakong kapagtubod na agom kan mga kakongregasyon niato kun gusto nindang mag-adal?
5 Mga Agom na Bakong Kapagtubod: Igwa daw kamo nin mga kakongregasyon na an agom bakong kapagtubod? May mga agom na bakong kapagtubod na habong makipag-olay manongod sa Biblia sa Kristianong agom pero nag-aako nin alok na makipag-adal sa bakong kapamilya. Sa parate, pinakamarahay na kaolayon nguna an Saksing agom tanganing maaraman an pinakaangay na paagi nin pag-alok.
6. Gurano kahalaga an pamibi kun nagmamaigot na makakua nin totokdoan sa Biblia?
6 Pamibi: Dai pagmenoson an puersa nin pamibi. (Sant. 5:16) Nanunuga si Jehova na hihinanyogon nia an satong mga pakiolay kun iyan kaoyon kan kabotan nia. (1 Juan 5:14) An sarong brother na sibot na marhay an iskedyul namibi na logod magkaigwa nin tinotokdoan sa Biblia. Iniisip-isip kan agom nia kun igwa pa sia nin panahon para sa sarong totokdoan, lalo na kun ini dakol nin problema. Kaya sinabi kan agom na babae an bagay na ini ki Jehova kan ipamibi nia na makakua logod nin totokdoan an agom nia. Pagkatapos nin mga duwang semana, sinimbag an pamibi ninda kan an sarong payunir sa kongregasyon ninda makanompong nin lalaki na gustong mag-adal asin ipinasa ini sa brother. An agom na babae nagsurat: “Para sa siisay man na an pagmate dai nia kayang magkondukta nin pag-adal sa Biblia, ini an masasabi ko: Magin espesipiko sa ipinapamibi, asin dai magpondo sa pagpamibi kaiyan. Mas dakula an nagin kagayagayahan niamo kisa sa inaasahan mi.” Paagi sa pagmamaigot, makakakua man kamo nin totokdoan sa Biblia asin makakaeksperyensia kan kagayagayahan sa pagtabang sa saro na maglakaw sa “dalan na pasiring sa buhay.”—Mat. 7:13, 14.