Kabtang 7—Pagkondukta nin Progresibong mga Pag-adal sa Biblia
Pagpamibi Kun Nagkokondukta nin Pag-adal
1. (a) Taano ta tamang ponan asin taposon paagi sa pamibi an sarong pag-adal sa Biblia? (b) Paano niato ikakaintrodusir an pamibi sa sarong pag-adal sa Biblia?
1 Tanganing umoswag sa espirituwal an mga inaadalan sa Biblia, kaipuhan an bendisyon ni Jehova. (1 Cor. 3:6) Kun siring, tama na ponan asin taposon paagi sa pamibi an establisado nang pag-adal. Sa parate magigibo niato ini sa kaenot-enoteng pakikipag-adal sa mga tawong relihioso. Sa iba, tibaad kaipuhan niatong aramon kun noarin an tamang panahon na iintrodusir an pamibi. Puede nindong gamiton an Salmo 25:4, 5 asin 1 Juan 5:14 sa pagtabang sa inaadalan sa Biblia na masabotan kun taano ta maninigong mamibi asin gamiton man an Juan 15:16 sa pagpaliwanag kan importansia nin pamimibi ki Jehova paagi ki Jesu-Cristo.
2. Kun an sarong tugang na babae may kaibanan na bautisadong tugang na lalaki o dai pa bautisadong parahayag na lalaki sa sarong pag-adal sa Biblia, siisay an mamimibi?
2 Siisay an maninigong mamibi sa sarong pag-adal sa Biblia? Kun an sarong tugang na babae may kaibanan na bautisadong tugang na lalaki sa sarong pag-adal, an tugang na lalaki an mamimibi, minsan ngani tibaad an tugang na babae an magkondukta kan pag-adal mantang nakakolbong. (1 Cor. 11:5, 10) Sa ibong na lado, kun sarong lalaki na dai pa bautisadong parahayag kan Kahadean an kaibanan nin sarong tugang na babae sa sarong pag-adal, an tugang na babae an mamimibi. Sa siring na situwasyon, maninigo siang magkolbong kun namimibi siring man kun nagkokondukta.
3. Ano an angay na iiba sa mga pamibi sa sarong pag-adal sa Biblia?
3 Kun Ano an Puedeng Iiba sa Pamibi: An mga pamibi sa sarong pag-adal sa Biblia dai kaipuhan na halawig, alagad iyan maninigo na espesipiko. Apuera sa paghagad nin bendisyon nin Dios sa pag-adal asin pagpasalamat sa mga katotoohan na nanonodan, angay na omawon si Jehova bilang an Gikanan nin pagtotokdo. (Isa. 54:13) Puede man niatong iiba an mga kapahayagan na nagpapabanaag kan satong sinserong interes sa inaadalan sa Biblia asin kan satong pag-apresyar sa organisasyon na ginagamit ni Jehova. (1 Tes. 1:2, 3; 2:7, 8) An satong pamimibi na logod bendisyonan ni Jehova an paghihingoa kan inaadalan sa Biblia na iaplikar an nanonodan nia makakatabang sa saiya na masabotan an importansia nin pagigin “paraotob kan tataramon.”—Sant. 1:22.
4. Anong mga pakinabang an itinatao kun pinonan asin tinatapos paagi sa pamibi an sarong pag-adal sa Biblia?
4 Dakol an pakinabang nin pamibi. Iyan nagbubunga nin bendisyon nin Dios. (Luc. 11:13) Iyan nagdodoon kan pagkaseryoso nin pag-adal sa Tataramon nin Dios. Mantang an inaadalan sa Biblia naghihinanyog sa satong mga pamibi, sia nakakanood kun paano mamibi. (Luc. 6:40) Dugang pa, an mga pamibi na minagikan sa puso na pano nin pagkamoot sa Dios asin nin pasasalamat sa saiyang daing kaagid na mga kualidad makakatabang sa inaadalan sa Biblia na makapatalubo nin personal na relasyon ki Jehova.