Hapot

◼ Maninigo daw kitang mamibi kun nagkokondukta nin pag-adal sa Biblia sa may pinto?

Dakol an pakinabang kun poponan asin tataposon niato an pag-adal sa Biblia paagi sa pamibi. Sa pamibi, hinahagad niato ki Jehova an saiyang banal na espiritu para sa pag-oolay niato. (Luc. 11:13) Paagi kaiyan, ikinakadoon man niato sa inaadalan sa Biblia na dapat seryosohon an pag-adal asin natotokdoan sia kun paano mamibi. (Luc. 6:40) Kun siring, marahay na iintrodusir an pamibi sa pinakamadaling panahon na mapupuede. Minsan siring, huling laen-laen an kamugtakan, kaipuhan kan nagkokondukta nin pakamansay sa pagdesisyon kun baga mamimibi sa pag-adal sa Biblia sa may pinto.

An sarong mahalagang bagay na dapat konsideraron iyo an kamugtakan na dian ginigibo an pag-adal. Kun iyan bakong matawo, tibaad puedeng magkaigwa nin halipot sanang pamibi sa pagpoon asin pagtapos kan establisado nang pag-adal. Minsan siring, kun iyan makakaapod kan atension nin ibang mga tawo o kun bakong komportable an inaadalan sa Biblia, tibaad mas marahay na maghalat sagkod na puede nang gibohon iyan sa pribadong kamugtakan. Saen man ginigibo an pag-adal, maninigo tang gamiton an marahay na paghusgar tanganing madeterminaran kun noarin iiintrodusir an pamibi.—Helingon an Abril 2005 An Satong Ministeryo sa Kahadean, pahina 8.