“Mamibi Kamo nin Arog Kaini”

ARAM daw nindo an mga tataramon sa Pamibi kan Kagurangnan? Iyan modelong pamibi na itinokdo ni Jesu-Cristo. Durante kan saiyang bantog na Sermon sa Bukid, si Jesus nagsabi: “Kun siring mamibi kamo nin arog kaini.” (Mateo 6:9) Poon kan iintrodusir iyan ni Jesus, parate nang inaapod iyan na Pamibi kan Kagurangnan, na midbid man na an pamibing Ama Niamo.​—Sa Latin, Paternoster.

Tinuom nin kadakol na tawo sa bilog na kinaban an Pamibi kan Kagurangnan asin parateng inoorootro iyan, nin aroaldaw gayod. Sa nakaagi pa sanang mga taon, sinasambit nin paorootro kan dakol an pamibing ini sa mga eskuelahan asin sa pampublikong mga okasyon. Taano ta pinapahalagahan na marhay an Pamibi kan Kagurangnan?

An teologo kan ikatolong siglo na si Cipriano nagsurat: “Ano pa an mas espirituwal na pamibi kisa kan itinao sa sato ni Cristo . . . ? Ano pang pagpamibi sa Ama an mas totoo kisa kan itinao sa sato kan Aki na iyo an Katotoohan?”​—Juan 14:6.

Sa katesismo kaiyan, an Iglesia Katolika Romana naniniwala na an Ama Niamo iyo “an pundamental na Kristianong pamibi.” Rinerekonoser kan The World Book Encyclopedia an mahalagang kabtang kan pamibing ini sa gabos na relihion nin Kakristianohan, na inaapod iyan na saro sa “pinakapundamental na deklarasyon kan Kristianong pagtubod.”

Minsan siring, dapat na admitiron na dakol na namimibi kan Pamibi kan Kagurangnan an dai lubos na nakakasabot kaiyan. “Dawa anong klaseng pagka-Kristiano an nanodan nindo kaya gayod nindong sambiton na garo rapido an Pamibi kan Kagurangnan na dai ngani minapondo nin kadikit tanganing maghangos,” an sabi kan peryodikong Ottawa Citizen sa Canada, “alagad tibaad madepisilan kamong sambiton iyan nin luway-luway na may pakasabot.”

Talaga daw na mahalagang masabotan an satong mga pamibi sa Dios? Taano ta itinao sato ni Jesus an Pamibi kan Kagurangnan? Ano an kahulogan kaiyan para saindo? Tokaron niato ngonyan an mga hapot na ini.