Magkondukta nin Progresibong mga Pag-adal sa Biblia sa May Pinto Asin Paagi sa Telepono
1. Ano an katuyohan niato sa pagkondukta nin mga pag-adal sa Biblia?
1 Kanigoan na kagayagayahan an makapoon nin sarong pag-adal sa Biblia! Minsan siring, kapinonan sana an pakanompong nin saro na interesado sa pag-adal sa Biblia. An katuyohan kan pag-adal iyo na tabangan an sarong tawo na magin tunay na disipulo ni Cristo. (Mat. 28:19, 20) Ano an makakatabang sa sato na maabot an pasohan na iyan?
2. Ano an mga pag-adal sa Biblia sa may pinto asin paagi sa telepono, asin taano iyan ta epektibo?
2 Mga Tawong Sibot: An mga tawo ngonyan paorog nang paorog na nagigin sibot. Sa nagkapirang lugar, pira sana an tibaad sa enot gustong magtagama nin bilog na oras sa pag-adal sa Biblia. Tangani na matabangan an mga siring, haloy na kitang ineenkaminar na magpoon asin magkondukta nin mga pag-adal sa Biblia sa may pinto o paagi sa telepono. Sa primero, an mga pag-adal na ini medyo halipot asin may kaibang pagtokar nin pira sanang teksto sa Biblia na ginagamit an saro o duwang parapo sa sarong publikasyon, siring kan librong Itinotokdo kan Biblia. Kaomaw-omaw nanggad na dakol na parahayag an nagkokondukta na ngonyan nin siring na mga pag-adal sa may pinto o paagi sa telepono!
3. Taano ta maninigo niatong hingoahon na dagdagan an oras na ginagamit sa pag-adal sa may pinto?
3 Minsan siring, maninigo daw kitang magin kontento na magdanay na sana sa pagkondukta nin pag-adal sa may pinto? Dai. Minsan ngani madonong na kita dai maghaloy na marhay sa may pinto sa enot na pagpoon nin pag-adal, An Satong Ministeryo sa Kahadean na Agosto 1990, pahina 8, nagkomento: “Oras na establisado na an pag-adal asin tuminubo na an interes kan kagharong, puwede nang gumamit nin mas halawig na oras sa pag-adal.” Mahalagang marhay ini. Sa pag-ilustrar: An sarong aki na nag-agi nin makuring gutom puedeng pakakanon nin padikitdikit sana sa kapinonan sagkod na bumalik an saiyang gana, alagad dai nanggad niato sia malalaoman na makabawi kan saiyang bilog na kosog asin tumalubo nin normal kun sia pakakakanon nin padikitdikit sana sa laog nin halawig na panahon. Kaagid kaiyan, an inaadalan sa Biblia nagkakaipo nin mas pormal asin regular na pag-adal tanganing magin maygurang na lingkod nin Dios.—Heb. 5:13, 14.
4. Ano an mga pakinabang sa pagkondukta nin pag-adal sa Biblia sa laog kan harong?
4 Mga Pag-adal sa Biblia sa Laog kan Harong: Mas marahay na magkondukta nin pag-adal sa sarong pribadong lugar—sa laog kan harong o sa iba pang angay na lugar. Ini magigin mas nakakatabang sa pakanood asin makakatabang sa inaadalan sa Biblia na masabotan an Tataramon nin Dios. (Mat. 13:23) Papangyayarihon man kaiyan an nagtotokdo na orog na ikabagay an pag-aadalan sa mga pangangaipo kan inaadalan sa Biblia. Dugang pa, an mas halawig na pag-adal magpapangyari na magkaigwa nin mas detalyado asin nakakapakosog sa pagtubod na pag-oolay dapit sa Tataramon nin Dios.—Roma 10:17.
5. Paano niato gigibohon an pag-adal sa may pinto na magin pag-adal sa laog kan harong?
5 Paano nindo gigibohon an pag-adal sa may pinto na magin pag-adal sa laog kan harong? Pagkatapos nin nagkapirang halipot na pag-adal, taano ta dai mag-alok nin pag-adal sa mas halawig asin espesipikong panahon? O puede kamong gumamit nin bakong direktang pamamaagi paagi sa paghapot sa saiya, “May panahon daw kamo ngonyan na tumukaw asin pag-olayan niato ini nin magkaibanan?” o “Gurano kalawig na oras an gusto nindong gamiton ngonyan sa pag-oolay kan temang ini?” Kun bakong mapanggana an saindong mga paghihingoa, ipagpadagos na sana an halipot na mga pag-adal sa may pinto. Sa angay na panahon, probaran giraray na ibalyo an pag-adal sa laog kan harong.
6. Sa anong katuyohan maninigo niatong gibohon an satong ministeryo, asin paano makakatabang sa sato an mga suhestion sa artikulong ini na magibo an katuyohan na iyan?
6 Mantang nagpapadagos kita na hanapon an mga maninigo, dai niato paglingawan an satong katuyohan sa pagpoon asin pagkondukta nin mga pag-adal sa Biblia. An katuyohan niato iyo na tabangan an mga sadiosan an puso na magin dusay asin bautisadong mga lingkod ni Jehova. Logod na bendisyonan nia an satong mga paghihingoa mantang ginigibo niato an satong ministeryo na ini an katuyohan.—2 Tim. 4:5.