Hapot
◼ Maninigo daw na magkulbong an sarong babaying parahayag kun may kaiba siyang lalaking parahayag sa pagkondukta nin pag-adal sa Bibliya sa may pinto?
Kun an sarong babaying parahayag nagkokondukta nin regular asin nakaiskedyul na pag-adal sa Bibliya kaiba an sarong lalaking parahayag kan Kahadian, maninigo siyang magkulbong. (1 Cor. 11:3-10) An The Watchtower na Hulyo 15, 2002, pahina 27, nagpapaliwanag: “Saro ining sesyon nin pagtutukdo na patiinot na iinareglar kun sain an nagkokondukta kan pag-adal iyo an mismong nanginginot. Sa siring na mga kamugtakan, an pag-adal nagigin ekstensiyon kan kongregasyon. Kun an sarong bawtisadong babaying Saksi nagkokondukta nin siring na pag-adal kaiba an sarong bawtisadong lalaking Saksi, tama sana na magkulbong siya.” Ini an maninigong gibuhon baga man an pag-adal ginigibo sa harong, sa may pinto, o sa iba pang kamugtakan.
Sa ibong na lado, kun dai pa man establisado an pag-adal sa Bibliya sa may pinto, dai kaipuhan magkulbong an sarong sister kun may kaiba siyang lalaking parahayag, dawa pa an katuyuhan kan pagdalaw liwat iyo na idemonstrar an pag-adal sa Bibliya o ipakipag-ulay an sarong topiko sa saro sa mga publikasyon na irinerekomendar sa pag-adal sa Bibliya. Huling an mga pag-adal sa may pinto sa parati naeestablisar nin luway-luway, paagi sa regular na pagdalaw liwat, kaipuhan kan mga parahayag na konsideraron an mga kamugtakan asin magin rasonable sa pagdeterminar kun nuarin maninigong magkulbong.