HAPOT HALI SA MGA PARABASA

Paano matatabangan an mga tugang na sensitibong marhay sa parong kan mga pahamot?

Dipisil an sitwasyon kan mga tawong allergic sa pahamot. Posibleng marhay na dai ninda malilikayan na makaparong nin pahamot sa aroaldaw na pakikiiba ninda sa mga tawo. Pero, gustong maaraman kan iba kun posibleng pakiulayan an mga tugang na dai maggamit nin pahamot o cologne sa mga pagtiripon sa Kingdom Hall, asembleya, asin kumbensiyon.

Siyempre, mayo man nin Kristiyano na tutuyuhon na madipisilan an saro sa pag-atender sa Kristiyanong mga pagtiripon. Kaipuhan ta gabos nin pampakusog nin buot na makukua sa satong mga pagtiripon. (Heb. 10:24, 25) Kaya kun an saro nasasakitan nang makaatender sa mga pagtiripon huli sa grabeng allergy sa pahamot, puwede niyang ipakipag-ulay iyan sa mga elder. Iyo, bakong maka-Kasuratan o bakong tama na maggibo nin mga susundon para sa mga maatender sa pagtiripon dapit sa paggamit nin pahamot, pero puwedeng magtao an mga elder nin impormasyon na matabang sa mga tugang na masabutan an problema kan iba. Depende sa kamugtakan, puwedeng magdesisyon an mga elder na tukaron sa sarong lokal na pangangaipo sa Pagtiripon sa Paglilingkod an napublikar nang impormasyon dapit diyan, o magkaigwa nin mataktikang paisi manungod sa bagay na iyan.a Pero, kaipuhan na likayan kan mga elder na pirming magtao nin arog kaining paisi. Pirming may bagong nag-aatender na mga interesado saka bisita sa satong mga pagtiripon na dai nakakaaram kan problema, asin gusto ta na magin komportable sinda. Habo tang mag-alangan sinda huli sana sa pagpahamot ninda.

Kun igwa nin arog kaining problema asin kun suno sa kamugtakan sa saindong lugar, puwedeng iareglar kan grupo nin kamagurangan na patukawon an mga may allergy sa pahamot sa sarong medyo napapasuhay na lugar sa Kingdom Hall. Halimbawa, tibaad igwa nin conference room na may sound na puwede sindang magtukaw tanganing makinabang sa mga pagtiripon. Kun dai pa kaini masolusyunan an problema asin nadidipisilan pa man giraray an mga may allergy, tibaad puwedeng irekord kan kongregasyon an pagtiripon o iareglar na madangog ninda an pagtiripon paagi sa telepono, arog kan ginigibo para sa mga dai makaluwas sa saindang harong.

Mapadapit sa bagay na ini, dapat man kitang magpahiling nin espesyal na konsiderasyon kun nag-aatender sa mga pangrehiyon na kumbensiyon. Huling kadaklan na kumbensiyon ginigibo sa mga saradong lugar na naka-aircon asin sa parati imposibleng makahanap nin lugar na puwedeng patukawan sa mga allergic sa pahamot, pagpahiling nin pagkamuot kun lilimitaran ta an paggamit nin makusog na pahamot. Pero, dai ini dapat gibuhon na sarong susundon para sa mga pagtiripon sa kongregasyon, asin dai ini dapat sabuton nin arog kaiyan.

Sagkod na yaon kita sa sistemang ini nin mga bagay, gabos kita nagsasakit huli sa maraot na epekto kan satong minanang pagkabakong perpekto. Kaya talagang pinapahalagahan ta an paghihinguwa kan iba tanganing mabawasan an satong pagsakit! Tibaad sakripisyo para sa iba na dai maggamit nin pahamot o cologne tanganing dai masakitan sa pag-atender an ibang mga tugang. Pero, papahiruon kita kan pagkamuot na gibuhon iyan.

Pinapatunayan daw kan sekular na mga reperensiya na talagang nabuhay si Poncio Pilato?

Midbid si Poncio Pilato kan mga parabasa nin Bibliya huli sa nagin papel niya sa pagbista asin paggadan ki Jesus. (Mat. 27:1, 2, 24-26) Pero, dakul na beses man na naglataw an pangaran niya sa iba pang magkakakontemporanyong rekord nin kasaysayan. Sigun sa The Anchor Bible Dictionary, an pagsambit sa pangaran niya sa sekular na mga rekord nin kasaysayan “mas dakul asin mas detalyado kisa sa iba pang nagin Romanong gobernador nin Judea.”

An pangaran ni Pilato pinakaparating minalataw sa mga isinurat kan Judiong historyador na si Josephus, na nagrekord nin tulong espesipikong pangyayari dapit sa mga problemang naeksperyensiyahan ni Pilato kan namamahala siya sa Judea. An ikaapat na pangyayari idinagdag kan Judiong historyador na si Philo. Pinatunayan kan Romanong parasurat na si Tacitus, na nagsurat kan kasaysayan kan mga emperador sa Roma, na si Poncio Pilato an nagtao kan pagbuot na ipagadan si Jesus kan si Tiberio an namamahala.

Kan 1961, sa suanoy na teatro kan Roma sa Cesarea, Israel, nakakutkot an mga arkeologo nin halakbang na gapo na may pangaran ni Pilato sa Latin. An inskripsiyon (nasa ibaba) pidaso na sana pero sa orihinal, arog daa kaini an mababasa diyan: “Idinusay ni Poncio Pilato, Namumuon na Opisyal nin Judea (ining) Tiberieum para sa kagalang-galang na mga diyos.” An sinasabing edipisyo posibleng sarong templo para ki Emperador Tiberio.

Kaipuhan daw na magkulbong an sarong babaying parahayag na nagkokondukta nin pag-adal sa Bibliya kun may lalaking parahayag na presente?

Sa sarong “Hapot Hali sa mga Parabasa” na ipinublikar sa The Watchtower na Hulyo 15, 2002, sinabi na dapat magkulbong an sarong sister sa pagkondukta nin pag-adal sa Bibliya kun may lalaking parahayag na presente, bawtisado man ini o dai pa. Pero, ipinapahiling kan urog na pagsiyasat na kaipuhan nin dikit na pagbabago sa instruksiyon na ini.

Kun bawtisado na an lalaking parahayag na kaiba kan sister na nagkokondukta nin pag-adal sa Bibliya, siguradong gugustuhon kan sister na magkulbong. Pag ginigibo niya iyan, ipinapahiling niya na iginagalang niya an areglo ni Jehova sa pagkapayo sa laog kan kongregasyon huling ginigibo niya an sarong papel na sa parati responsabilidad nin mga brother. (1 Cor. 11:5, 6, 10) Pero puwede man niyang pakiulayan an brother na iyo an magkondukta kan pag-adal kun kuwalipikado asin puwede ining magkondukta.

Pero, kun dai pa bawtisado an lalaking parahayag na kaiba kan sister sa sarong regular nang pag-adal sa Bibliya asin bako man niya ining agom, dai man hinahagad kan Kasuratan na magkulbong an sister. Minsan siring, dawa sa arog kaining mga sitwasyon, tibaad may ibang mga sister na pahiruon pa man giraray kan saindang konsiyensiya na magkulbong.